我看頭文字D

發佈日期 : 2005年 6月24日

昨日星期四是頭文字D第一日上畫的日子，由於DTS中文版示範碟內有兩段短片，看過後對這電影產生興趣，

以好奇的心態去觀看這電影，選擇了尖沙咀新港戲院下午3:50的一場來觀看，

有不少學生入場觀看，雖然不是爆滿，但入座率算不錯了。

雖然這電影是DTS電影，但在電影內沒有很大發揮的空間。

在電影院內，我身邊包圍了不少周杰倫的Fans，她們都是少女，時不時當周杰倫出現，都聽到她們細細聲講好靚仔，好有型...........

啊~~~~我真係Feel唔到囉，只係普通做型之嘛，邊度有型啊?Fans喜歡真係無計!!!

看完全片後的感覺很好，入場前以為如果不賽車時會很悶，但原來不賽車時，也有不小笑位，

當然啦，這些笑位，周杰倫的Fans就笑得特別大聲呢!!!不過有某幾段的笑位都不錯。

杜汶澤的攪笑角色，在片中起了化學作用，我很喜歡他的演出，另外秋生的角色和做型，也是我喜歡。

全片只是有幾分鐘是覺得悶，其他就算係對白交代的位置，也不會覺得悶。

賽車方面，總不可能由頭賽到落尾吧，但也不會只是一頭一尾先有賽車，普通啦，可接受。

所有男主角我都滿意他們的演出，但唯獨是鈴木杏，我真不知何解會找她來拍這個角色?

整體來說我好滿意這電影，希望他日一推出DVD時，第一時間買回家，用自己的器材再看一次。

當然，如果你硬要和原來的版本比較，一定是不滿意了，你就當成獨立一套電影去看，你會接受多一點。

再講丫，這電影是近日的熱門話題，就算有人講你知這電影唔好睇，但我覺得都要入場一看，究竟有幾唔好睇呢!!!

否則你又點同你身邊的人去溝通呢?就算係不滿，你都要睇過，先可以講出你的不滿吧。

唔好想咁多喇，這個星期六和日，就去看這電影吧。

以下是我幾位好朋友，對頭文字D電影的評價，因為他們是頭文字D迷，

他們的評價很精彩，而且好攪笑，又到肉，所以我把他們的對話，貼上來和大家分享。

A君

以後唔好再叫我去D咩數碼戲院，超大畫面高畫汁戲院，冇一間好過黄埔UA。

啱啱睇完<<头文字D>>超靚畫汁。巴斯你點搞呀！你下次都係o黎黃埔睇把喇！

故仔都還可以，聲就有冇DTS都冇咩所謂o羅，但賽車時D音樂就冇曬，點搞呀！

一D都唔夠勁投入。同動画電影版差成條街。我講o緊聲同音樂部份。

B君

我都睇完啦.我坐第三行啊.

如果能夠用返動畫第一集的音樂就好好好好多啦.尤其係片尾果首啦.用返move唱果隻就正喇..

套戲如果未睇過漫畫或動畫的話.的而且確幾夠娛樂性啦.幾好笑又幾過引.

我在觀看時極力忘記漫畫的故事.因為有很多細節事情他們都表達唔到.

可能係因為要在短短的兩個小時內.講晒十幾期漫畫的事情.跟本上係做唔到的.

所以要作很多在漫畫上沒有的東西.

C君

我都o岩o岩睇完。作為一套港產片,我都覺得好有水準喇, 剪片和分鏡做得好好,

 齋睇賽車場面, 你都唔好話, 好睇過動畫版, 係「踭趾 close up」太假, 一看就知係外行人做, 

其實既然都睇唔到樣, 為何不直接找那些日本專業車手做呢？

至於劇情方面, 正如步步所講, 因為套戲一起過講到涼介成立新遠征車隊「Project D」, 

所以整套戲內容好豐富, 講真丫, 漫畫版同動畫版直頭拖劇情喇, 劉偉強濃縮得好！

巴斯, 我想話你知, 夏木戍樹呢個女主角, 的而且確係咁o既款, 角色唔討好, 好多人都彈呢個鈴木杏演得差, 

我覺得中規中矩啦, 不過佢明明同拓海話買左件好少布o既泳衣... 但到頭來著出黎o個件..  

呢個大話實在太唔應該了.. 導演係咪攪錯左呀？ 唔係呢件來架下話..  

今時今日, 咁樣欺騙 d 觀眾唔得架喎, 係咪想人又 BT 丫

B君

我都很同意音效和氣氛都做得很好啊.選角方面.我都十分喜歡.

可惜係每一位角色性格都有些少偏離原著故事.

找黃秋生演老豆文太十分之好.之但係無啦啦講到文太係一個唔多清醒的人.

(在漫畫中他只不過在三十一期當中都沒有張開過眼睛.雙眼成一條線.)

但唔代表他是一位唔清醒的人啊,但他還可以一邊飄移.一邊點煙啊.

而衣著也十分潮.完全唔似文太....

陳冠希 如果係做細佬啟介的話.會比較好.可以話係入型入格.無論樣子.

性格也和他的本人十分之相似.但不知可解現在會做了大佬.但又唔見了細佬......

杜汶澤做啊樹都十分之好.之但係唔知可解性格又完全唔似原著故事....

周杰倫做拓海也很似.樣子傻頭傻腦咁..掂..

陳小春又很型.又似漫畫中的須藤京一.但須藤京一的技術沒有電影中講到這麼差.只是說他是一位識業車手就算了...

而他的戰車EVO3有什麼特別也沒有特別交帶.因為漫畫中講述須藤京一的EVO3是一部經過特別改裝的戰車.

某段時間在網上也有很多人討論須藤京一的EVO3入面的"偏時點火系統"是什麼也沒有談及...

連用"油門來轉彎"也隻字不提...所有關於飄移的技術都沒有講過.

所以如果沒有看過原著故事再看這套戲是沒有問題的.

但當你看過之後.就會覺得完全沒有了很多仔細事情了.一點也不好看啊.

到最後諗深一層.一班年過三張幾野的啊叔.來演一班高中生.實在很難令到我這個頭文字D迷信服.

在預告片中還說什麼燃燒青春.....他們的青春一早就燒光燒盡晒啦.

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。