MTV 7000D 旗艦機

發佈日期 : 2011年 3月22日            

強項

呢部 MTV 7000D，係Magic TV最新旗艦機型號，講得旗艦機當然同家族其他成員有分別啦，

最大分別咪就係價位囉 ，多謝 $3980丫，咁點解收得咁貴呢? 因為靚囉，咁點解靚呢 ? 咪因為貴，所以靚囉 。

既然鹽都可以盲搶，機頂盒都可以丫~~~

不過發燒友一向都唔會咁幼稚，呢招對他們用不著喇。

MTV 7000D和家族其他成員最大分別，就係佢可以和有線或Now呢兩部機頂盒接駁一起，

並可收錄節目內容到硬碟上，方便日後重溫再重溫。

機背提供模擬輸入，咁就可以把石器時代的VHS錄影帶，Hi8帶，DV帶..........乜帶物帶，襯住D帶仲未壞死前，

一一咁錄落硬碟上備份，而且錄完仲可以就地正法咁利用內置小學生都識用的剪接功能來剪輯。

MTV 7000D更可容許為檔案完成品進行命名，不過只係可以提供到數目字和英文字母，並唔可以輸入中文。

接管收費電視節目表

如果你係有線或Now用戶，單係見到以下呢個操作介面，都知我講乜架喇~~~

一講起他們的節目表，一定會一肚火，

個死人節目表，想話睇下有乜節目，我強調只係想睇下有乜節目，慢到佢呢........真係好難相信係屬於呢個年代的產品。

睇住呢個由MTV所提供的未來七天 iEPG節目表，Un Un 腳來設定預錄節目，真係開心死，我保証用家用過一次之後，返唔到轉頭。

MTV 7000D 強項之一，就係居然可以接管有線或Now節目表，成為屬於自己操作介面。

用過 MTV產品用家，都知他們的未來七天 iEPG節目表係幾咁開心啦，真係可以用得心應手來形容，

所以唔少有要求的朋友，都會買一部廳用，一部睡房用就係咁解。

今次加上呢個接管有線或Now的節目表功能，真係做福人群，使到錄收費電視節目變成樂趣。

接駁方式就係如下圖咁簡單，接駁完之後，原本的有線或NowTV搖控都可以收埋落床下底了，

因為 MTV 7000D正式接管有線或Now後，只用 MTV 7000D 單一個搖控，就可操作有線或Now。

珍貴片段備份

在錄影帶年代，出現過大大小小不同種類制式機種，各街坊屋企都有唔少錄影帶蟹貨留低，硬件事小，內容事大。

那些什麼周年紀念日，小明第一次上廣州，芬女大學畢業禮，

B女第一次識得企.........呢堆有錢都買唔到的珍貴片段，一一收錄在日漸變舊的錄影帶內，

想買個保險的話，就可以接駁去 MTV 7000D ，直接錄落硬碟作保存備份。

圖中所見機背圖，紅圈位置是給那些柴油式老爺機輸入用端子，作為錄影到硬碟內的訊源。

　跟機有一個 500GB 硬碟殖入體內架喇，如果都唔夠用的話，可外置硬碟機都仲得。

雖然呢部機，錄影外部視頻源時，用戶可以選用十級壓縮，但係依家D硬碟平得咁緊要，豪比佢啦唔需就住用嘛。

何況硬碟又可以Delete無用的內容再用過，唔好煩啦縮乜鬼野Jack~~~

溫馨提示

提提你，千萬唔好以為用 MTV 7000D 來轉換成數碼畫面後，畫質會比美我們今日的高清畫面，

經過內置的 A>>>D 所轉出來的備份畫面，相對地是比較矇，別太過對這機有過份的要求啊。

你要理解成是格式轉換，而並非優化畫質呢。

另外下圖呢班耆英，個個年事已高，在 2011年她們還運作到，基本上是一個奇蹟..........Sorry應該係神蹟先對，

所以要進行轉檔時，第一盒放入的帶，千萬不要放入有紀念價值的帶，應該先放入一些無關痛癢的帶入去試返十多分鐘，

確保佢老人家運作正常先好比重要工作交比佢做，否則一開始入珍貴帶的話，萬一佢腦人痴呆症發作，發起癲來食帶就握噢了。

剪輯過程完結後，剪輯時落過的剪刀位，會留有下圖所見的三角標記，

用家不必把這些三角標記清除，因為這是可用作日後重溫片段時，作為章節之用。

重溫時用搖控一按，就可以一步到位跳到該個三角標記位置，節省不少時間啊~~~

  VIDEO  

其實以上打一大堆字，我自己都唔知自己講乜，有無人睇都成問題，

睇唔明以上我打的字，可直接收看官方所提供的片段更實際。

請立即收看以下短片，可對MTV 7000D有更深入了解。

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。