藍牙 3D 眼鏡 

發佈日期 : 2011年 4月30日

以前我好睇唔起三星電視機，但近年他們的產品，一次做得比一次好，而且在我個人心目中，

做得比$ony還要好，尤其在外觀或設計上更得到不少加分，

早前畫面同步搖控器和電視纖薄掛牆Mount就係一個好例子。

而近日她們最新 D8000系列 3D電視，機身厚度只有 29.7mm，更把包邊突破到僅 5mm，使到薄屏電視外觀顯得更貴麗。

三星早前話自己係領導全球消費電子品牌，我今日唔會完全否定架。

昨日經過圓方百老匯，在向外的飾柜，見到三星最新推出的 3D眼鏡正發售中，呢款眼鏡不是跟機送，而是另外發售。

她當然都係配合返自己 3D電視技術的主動式啦，唔通會係幾蚊副，電影院有售的鏡片咩。

主動式眼鏡，因為要用電能，所以比較笨重，但呢款眼鏡重量就唔夠 30g，以全球主動式來計，最輕係佢喇。

呢款眼鏡屬於充電式設計，你睇佢設計得既時尚又簡約，真係唔錯。

佢把最笨重的零件部份，由太陽穴左右兩則，改為擺放在後腦位置，睇落蕭灑好多~~~而且佢係用藍牙傳輸。

據官方講 :  透過藍牙傳輸，有效減低影像傳輸時的相互干擾；就算在日光燈下也不會有閃爍情形發生。

見到下面圖解當中，有提到鼻樑位的設計嗎? 

和平日我們見慣的普通眼鏡設計差唔多，我推測用起上來應該會合身一點吧。

無線充電器

雖然眼鏡係充電式設計，但無需用線接上作為充電。

原來用電磁感應技術，即係無線充電，係咪好型呢~~~圖中呢個就係充電器喇。

充電過程，只係把3D眼鏡放上去就可以充到電。

而每次可同時為四副同類眼鏡充電，而充電時間和平日用接線時間差不多。

不過唔好誤會，呢個無線充電器，笨唔係跟眼鏡來，係另外比 $ 買的。

無放眼鏡時，充電器就係咁樣架喇。

個人評價

講左咁耐，都無講到幾 $添，對於 3D電視用家來講，尤其係 55"以上用家，一點都唔貴，眼鏡每副港幣 $1980 ，2千蚊仲有 $20找。

計我話，以一個四人家庭，最少應買六副，因有客人來的時候，先可以一起睇。

你唔係話我知，到時唔夠數，你推我讓咁失禮下嘛，所以最少都要家庭成員再加兩副，先夠用。

相比起個眼鏡的話，無線充電器可以講係超值，因為同一時間可以為四副眼鏡充電，只係需要買一個就夠喇，

感覺係咪抵好多呢? 幾錢 ? 平到你唔信，都只不過係同眼鏡一樣價錢港幣 $1980 ，2千蚊仲有 $20找。

平成咁，要買就襯早喇，有可能搶購一空架。

幾萬蚊部 3D電視都買下來，區區幾副眼鏡加埋個無線充電器，又算得乜呢?話晒都 3D 技術嘛。

我就話對3D反感無得講遮，買得3D電視，一定係好喜歡 3D效果，所以先比貴咁多買3D型號架嘛。

加上電視機又提供 2D轉 3D技術，基本上3D眼鏡日日用，無浪費架播。

我又唔係好相信買部幾萬蚊3D電視返來，會唔用 3D功能架，所以我相信買得3D電視的人，一定日日用3D功能的。

依家用緊舊款 3D 電視朋友，快轉款喇，手上的款式，無論外觀和技術都Out晒架喇~~~

你見3D電視款式用季來做量度單位，你就知淘汰得幾咁緊要。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。