移情別戀 Sony S1 

發佈日期 : 2011年 4月28日

　昨晚在日本官網睇到 S1的介紹，靚仔到佢呢~~~~有WiFi版本，又有3G 版本，好適合我呀~~

iPhone 內的個人熱點，該可以分享出來比佢用丫。

今早起身就見到各街坊紛紛談論佢，呀邊個邊個又話想買，搞到我都對佢性幻想了整整一個早上。

淨睇官網照唔夠架，睇埋Video先啦~~~~

睇完就中毒更深。

講明先，我只係對 S1 有興趣，部 S2太太太太醜樣了，和我一點關係都無，死開。

之前由美國購入的 iPad2黑色，第一時間出售套現，一直等行貨出白色，等呀等，等到終於呢個星期五叫糊喇~~~~

呢個世界就係咁架喇，過了氣，自然熱情就冷下來，想想下都係覺得 iPad2麻麻地。

由一代轉成二代，依然係用唔到Flash，對我平日在街上突然想買電影戲票好大問題，事關唔係所有院線都有app出，無咁點算?

都唔係一次撞板架喇~~真係有點頂氣。

另外就係個死人 Camera Kit ，用在 iPad 1身上，如果張 CF Card好多相片的話，

旨意佢過晒以GB計的相片，佢就死幾次，搞得兩搞都返到屋企啦，洗鬼你搞咩~~~好無癮。

iPad 2 係就係解決了過相期間死幾次問題，可以一口氣過晒所有相去目的地，

但又輪到和讀卡器配撘出問題，搞到有時認到，有時認唔到，激死人。

計劃緊唔打iPad2主意，轉投Sony陣營呀~~~

但

官網的圖片，因角度問題，睇唔到 S1有無USB接口比我插讀卡器，作為就地過相之用，呢點對我來講好緊要架。

好彩比我找到段有關介紹 S1的Video，入面有一個好好的角度，話了給我知佢係有USB的。

真係好喇~~~~

第二個，也是最後的一個問題，就係有無中文手寫先? 無就死得架喇~~~~我仲無奶油無掛，呢點佢應該緊張過我丫。

呢部機話打算秋季推出，咁行貨呢? 行幾時有架?唔好話我知行貨無中文手寫播!!!!!!

死啦，依家先係夏季剛剛開始，幾時先到秋季呀，咁又幾時先有中文手寫行貨架?

有無人生搖控器，可以比我快速搜畫去秋天就好喇，

但........咁跳法，唔跳得幾多次條命仔就夠鐘囉，都唔係辦法.......做人真係痛苦。

部機的屏幕有 9.4吋，解像度 1280 x 800，夠晒我用架喇~~~行 Android 3.0 可以睇到Flash嘛。

不過呢部機係用自家開發，名為 Swift 的瀏覽器，到時睇唔睇到 myTV - tvb.com或者係動新聞架?

機身可否有其他顏色咁呢?例如白色呀粉藍色或者螢光綠咁呢? 

另外 iPad 2機身太薄，加上角位和邊位太圓滑，我有兩次差點洗手跌了落地，依家想返起個心仲卜卜跳。

你睇 S1 握手位置就應該無該個問題了。

前後鏡頭對我作用不大，有又好，無又好，我都係唔會用架啦。

呢部機仲可以透過 PlayStation Suite 來玩 PS的遊戲，如用家全套Sony產品的話，更變相家居中控添。

因為可以透過DLNA技術，和他們公司的 Bravia電視做影音串流，播電腦內的影音檔，遙控SONY影音器材。

我對佢好有幻想空間架，希望秋天推出時，唔好使我失望啦。

其實我並唔可以放棄 iPad的，因為當中我最最最最重要的CAS，

是用 iPad 的Remote app操作，沒有Remote app iPad版，就失去最重要的一環，所以到時出街都係用S1，在家用 iPad。

又引証 Steve jobs 金句，無機係完美的。請問邊位識睇水晶球，可以講我知，到時 S1 係唔係我幻想的機能來架?

售價方面未知，但根據我個人猜測，係界乎港幣  $1000-$1200 上下。

$ony呀~~~~~~~淨係四個英文字母都值 $3000啦，$1000-1200美金就差唔多。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。