一街都係 LG Cinema 3DTV 示範

發佈日期 : 2011年 5月19日

近日經過幾間大型電器店，都見到LG積極咁在場做了專用展示位，

你知啦，要放門口當眼位，仲要有個專用屏台，一定用一大筆錢架喇，睇來LG真係好重視呢個市場！

眼見近排 Samaung最新推出 D7000系列和D8000系列，個勢勁得咁緊要，我都覺得呢批機外型設計靚仔到無朋友，

如果我近日打算買電視，一定選佢，事關我當薄屏電視係傢俬多過影音產品。

無論D7000的透明幼膠邊，定係 D8000的金屬幼邊，同樣咁靚仔。

Samaung外型同 LG 比的話，LG部機個樣就平凡同埋務實好多，不過勝在機價平少少，而最重要係佢用了新技術，使到旗下新款3D電視，

可以用平好多，而且輕身好多的被動式偏光眼鏡來睇，即係戲院 $6 有售一副那款呢~~買10副都只係 $60，

相比起成千銀一副主動式眼鏡，價錢上就真係差得遠喇。

所以會見LG做示範時候，店鋪都好豪咁放幾隻眼鏡出來比客人自取，而且無任何防盜設施。

呢一點不設防示範方式，成千蚊一副主動式眼鏡一定唔可以咁做喇，客人有心睇就一定要問店員先可得到。

當然，有某D店鋪提供高度升降柱，但數量唔多，由於又唔可以左右移動，想試下可視角度都唔得。

LG除了在大型電器店增設當眼位置展示外，仲搵了黎明，衛蘭和 Janice Man一起，做了隻3D藍光動畫碟作為3D示範用。

如果有你睇過，都知道唔係什麼彭彭聲，非擁有不可的內容，尤其無啦啦 Janice Man 唔知做乜，脫去個Bra唔要。

又唔係真人做呢個動作，只係動畫炸播。

叫做知有件咁野囉，送比我一定要，如果要用錢買就.......不過買LG 3D電視機的朋友係可以免費擁有呢隻碟架。

題外話 : 呢張相係我偷影的，影的時候，我眼尾見到遠處店員係啤住我，不過我同自己講 : 你睇我唔到，你睇我唔到.........哈，得左!!! ^_^

又要再一次引用  Steve Jobs 名句，呢個世界無完美的產品，LG賣點係有佢優勢，但她技術上並唔可以同時提供到左右眼達 1080解像度比用家，

即係用家左右眼，各自最多只能見到 540P解像度，不過你又唔好比佢的數值嚇親，

一般市民，唔講比佢知，淨係睇立體感和顏色等等，與主動式效果一樣的，一般市民係唔覺得有任何不滿之處。

反而呢一種技術的缺點，就係要用水平視點方式來觀看，先可以得到最佳效果，如果好似圖中呢條友咁擺電視的話，

由於電視機擺放位置，矮過座位關係，就算戴上3D眼鏡，都依然係見到疊唔正畫面，

而且上或下角度越大，就越疊得差，呢種效果，就平民百姓都見到。

( 留意 2D轉3D無呢個問題 ) 只要用家保持在水平角度來睇的話，就一定無畫面疊唔正問題。

唔好以為上述所講的狀況，就代表主動式最好，事實主動式設計也有她的不足之處，

這技術就算身處水平皇帝位原地不移動，但頭部只要像他一樣側..........畫面就會疊唔正。

上述提到過店鋪所提供作示範用的高度升降柱，正好也隱藏這個缺點。

其實多間大型電器店內，都可以免費又容易睇到實況，近日經過，可以去八下掛，睇睇佢的角度，你是否能接受到?

如果想打主意，記得去樓上鋪格下價，聽講現金會有得傾個好D價錢。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。