「浪攝流」二 ( 人像 )

發佈日期 : 2011年 6月10日

上回講到 X100的 Snapshot 表現，今集就用X100來影人像，唔知效果係點呢? 

光圈先決

呢部定焦機，無得 Zoom，我無可能同你講佢會好得過其他單反機吧，由於佢有 2.0大光圈關係，

要做到背景有淺景深，只要主體和背景有一段距離，就不難做到，而膚色方面也是沒有投訴。

拍攝當日，天氣唔係咁好，有時出太陽，有時又無，無太陽時候，天有很厚的煙霞蓋著，不是一個好的拍攝環境，

以呢一張相為例，拍攝時候快要 5:00，當時太陽被煙霞蓋擋著。

透過原相的EXIF數據可見到，當時用上 2.0大光圈，但 Zoie頭上白花布紋，是非常之清楚得到重現，白位完全無爆到。

在呢個環境下，我依然滿意其膚色表現，我唔知你仲想部機點，但我就收晒貨架喇。

可Click以下圖片看原圖

下圖所見太陽有出來，但不強勢，用肉眼可短暫直視煙霞中的太陽，當時是下午 4:30，由於光源比上一張為好，

所以 Zoie臉色會好一點，同樣是 2.0光圈，白色頭帶的紋，依然可以見到。

可Click以下圖片看原圖

把握時間，在呢個環境下，利用 X100 拍攝不同的圖片。

可Click以下圖片看原圖

可Click以下圖片看原圖

時為 6 : 30，是日太陽伯伯提早離開我們了~~~~現在只能用餘下光度，在戶外進行拍攝。

以呢個光度，普通機仔用來影人一早死晒架喇，但  X100 還可以接受到。

可Click以下圖片看原圖

閃燈

雖然 X100 有屬於自己的 Hot Shoe ，可另配所屬外置閃燈 ，但機身依然有閃燈殖入體內。

不過..........是否可以達到實用性呢?

太陽下山了，時為 6:45 ，好快我就唔再在戶外拍攝，離開戶外之前，用閃燈來補一補，看看效果如果。

圖中可見，除了Zoie的雙眼和眼鏡頂部可以見到少少反光外，圖片中其他任何一個位，都無出現爆光位，補光補得非常自然。

不過不得不承認當時還有天然光線的幫助。

可Click以下圖片看原圖

如果室內呢? 室內再無天然光線幫助了，商場內換來有其他黃射燈，在這個環境下進行閃燈又如何呢?

唔............你睇睇，咁都唔滿意? 不過我就收晒貨喇~~~同樣自然。

可Click以下圖片看原圖

不如來多兩張添丫~~~~~同樣地係補得好自然。

右手邊的一張是刻意安排 Zoie站到黃色廣告燈箱旁，看看補閃燈的效果會否被黃色廣告燈所影響，結果滿意，

咁相比起第左手邊的話，當然無黃色廣告燈會好好多啦。

可Click以下圖片看原圖

遮光罩

呢個遮光罩套上去機身之後，確實係型仔好多，不過心水清的朋友應該有留意到上一張圖片可見，

Zoie的手出現了一個黑影，這個黑影是由我後期套上去的遮光罩所做成，來自閃燈部份光線，

被遮光罩擋著，出現該個黑形，所以用家打算用內置閃燈的話，就唔該先移走遮光罩啊。

講起個遮光罩又真係奇怪，佢係自己一個獨立包裝，唔係和相機的包裝一起存放，

萬一碰上粗心大意的售貨員，而客人又唔熟部機有乜配件，咁就分分鐘比漏。

左圖所見就係個遮光罩包裝喇，開盒後內裡有三件東西，兩個圈和一個袋。

原來個遮光罩係由兩個圈轉動組合而成，要套上機身的話，就先要把遮光罩二合為一先，

然後轉走機身上本來的細圈，再轉上整個遮光罩，所以換遮光罩多少要花點功夫。

現場光表現

色溫的重要性，在剛剛認識投影機時候就了解到，後來接觸到攝影，發覺色溫影響照片方面更重要，

王家衛所拍的電影色溫係咪錯晒呀，

係!!!仲超錯添，

但Arm唔Arm睇呀，

超靚~~~~　

究竟色溫準係咪一件好事呢?我真係答你唔到，不過大家用了咁耐相機，最有經驗食店影相效果，

普通市民的要求，只要影得Arm睇自然，就算係色溫準架喇。

日常我們最多使用拍攝室內照片，多是食肆內，而這些地方，一般燈光都是比較暗，加上用閃燈會影響到其他客人。

如果相機光圈夠大，配合相機內可接受的 ISO，咁就可以借助現場光而唔用閃燈。

不過如果相機白平衡做得唔好影響色溫，不但人的面色唔好，而且仲影響埋現場氣氛添。

但這機就沒有呢個情況出現，我個人是滿意X100用現場光拍攝效果。

這家食店現場的光線較暗，如果光圈無反咁上下的話死硬。

可Click以下圖片看原圖

現場光表現

現場光除了室內，還有室外，如果是室外就好一點，因為活動範圍可以轉換到適合的燈光下先拍攝，唔似得在食肆內定死位置，

室外的話，可走埋去街燈附近又得，店鋪廚窗又得，再唔係廣告燈箱都是一個能提供較好的光源，

但先決條件是該部機的色溫要好先得，否則人面變色的話，影到都無用呢，你唔好叫我返屋企後製播。

下圖這個景是一個大幅燈箱，燈箱會不斷轉換其顏色，有時黃有時藍，又時又會轉成白色..........

總有一個色是配合到適合睇的色溫，加上另一面有街燈照著，所以可不用閃燈拍攝。

方法就是等丫~~~~等到佢轉咁咪影囉，又唔係要等好耐，等一陣之嘛，影相係咁煩架喇，無要求咪唔需煩囉，但係有丫嘛，有就要做架喇。

可Click以下圖片看原圖

個人評價

整體都滿意呢部機，但係個人習慣關係，部機唔好計個遮光罩都好大部，

我平日 Snapshot相機係放在褲袋內，以她的體積用來做 Snapshot 機，對我來講佢並唔方便。

最近對焦點10CM，並不是我最佳飲食拍攝機體。

起動慢了少少我還可以忍受到，但對焦都比機仔慢，我就比較難接受。

講到拍片方面，普通市民如果用來拍生活紀錄就一定媽聲四起，部機定焦無得Zoom唔在講，對焦又慢，

如果有父母打算用佢來影呀仔校運會就死得架啦，爬行比賽都死呀。

不過.............廣告話呢部係浪攝流，想真點又無奶油用來影校運會架........^0^

最後，以我最低工資來講，成萬銀一部DC我真係買唔起呀~~~ Snapshot 都係用返DC機仔算了。

講完佢身上的缺點，不如講下優點丫，

佢的大光圈定焦用來拍有Feel的片真係正到無朋友，我就係喜歡佢失焦加大光圈散景的夢境感覺，實在愛死她。

ISO 長期處於 800 真係一點問題都無，用得好開心，以畫質計真係收晒貨架喇，

講到個內置閃光燈都係強項之一，她的閃光作為補燈真係好自然，補得來唔會破壞現場氣氛，值得一讚。

用家只要每次用閃燈前，緊記轉走遮光罩就無問題，轉出來並不難，最多一至二秒就可完成該動作出來。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。