再有韌體升級

發佈日期 : 2011年 9月2日

對於一向無耐性的我來講，今時今日，錄影節目係非常之重要，因為要我去睇有廣告又有悶場的直播節目，確實係非常奢侈。

如果只看重播的話，一唔對路就飛，飛，飛，同埋飛，爽得太多喇吧~~~

節目重溫對你有幾重要 ? 我唔知呀，我講我自己炸，咁..........你........能在下圖得到答案嗎?

Magic TV 現在所用的 streaming功能，無錯係一項非常好用的直播電視功能，

但美中不足係無法播放到MTV 7000D硬碟內，一早錄好的電視節目。

但..........

無錯，又係但........永遠都係有個但字跟尾，點解係但呢? 

因為 Magic TV 意圖及企圖，打算下週推出他們最新韌體，所針對的依然是提供給 MTV 7000D 這個型號獨享，

需要 MTV 7000D 和 iPad /  iPhone 雙方更新，到時 iPad /  iPhone會有 app 更新，而且 Magic TV也會安排大家在官方網頁得到新韌體。

新版本主要是可以透過 iPad /  iPhone ，收看錄了落 MTV 7000D 硬碟內的節目，而收睇範圍，當然是屋企睇又得，出街睇都得啦。

重溫節目方式

重溫 MTV 7000D錄好在硬碟的電視節目，可在 iPad / iPhone 這個直播節目畫面狀態下，按左下角的選台鍵。

你用手一篤左下角的節目名..........

咁就出現以下呢個平日見慣的選台表，但留意因為更新了韌體版本，就多了綠色圈所見的錄影節目選項。

用家只要用手篤一篤佢..........

咁............就如圖所見，MTV 7000D硬碟內的節目，就以列表方式顯示出來。

上面有節目基本資料，相信一般用家都能理解邊集打邊集喇掛~~~

喜歡重溫邊個節目，只要用手指直接篤下個節目名...............

咁個節目就開始重溫架喇~~~

見到下面條 Bar嗎? 我話下面條綠色 Bar呀，唔係上面，唔該集中精神丫，唔該~~~唔該~~好耐都唔該。

條綠色 Bar係用來飛畫面用的，用家覺得唔對路，唔想面對悶場，就可以利用佢來飛。

還有黃色鍵暫停鍵，紅色關機鍵和右下角的Stop鍵。

週街睇

留意左上角所示，可見到重溫節目，是可以透過3G環境下使用。

只要用家係用無限上網月費計劃的話，咁就可以在街上，用呢個方法重溫節目喇。

不過用之前一定要問清楚所屬電訊商，自己的所謂無限月費計劃，

係咪你自己解理的無限數據月費計劃，，否則月尾收到張幾十萬的單咁就大近視了。

到時就算你話有個黑影飄過，搞到你隻手卡住個 iPad 而上錯網，都係無法走數的。

由今日起，重溫電視節目，唔再需要返屋企喇，

我可以在車上，街上，在餐廳裡.............都可以爭取時間來重溫節目，實在太幸福了吧。

就算在家中，都可以無需開電視機，一樣可以重溫 MTV 7000D內的節目，我可以選擇在廚房睇又得，洗手間睇又得，

冬天在暖暖的被窩中睇就最屍伏喇喂~~~~~

尤其離開香港，入住其他國家的酒店，唔再需要忍受當地悶死人節目，

用房間所提供網速，用呢個方法睇家中一早錄好的節目又得，睇直播節目又得，得左!!!!!你話幾爽呢~~~

500GB內置硬碟的節目，任你在海外重溫，點都好過睇當地節目掛~~~

就以圖中所見 ，可重溫返明珠生活在 2009年所報導的音響展又夠好啦。

再唔係可以重溫返美女廚房的幾位美味天使舞姿丫~~~~

和你同房的人一起睇，你自己都型好多啦，係咪? 

到時你就唔會話MTV機頂盒貴架喇，呢D功能，市面上的 Cheap雞機頂盒點比呀?

不一樣的搜畫

用手指拖拉圖中所見白色點，可前後移動搜畫，期間有時間顯示，方便用家知道飛幾多，

首先選好想飛的時間，然後先按中央的去鍵，咁畫面因為要Load，就會黑了一陣，

再次有返畫面時，就是所飛目的地了。

過程有別於我們平日睇住畫面快鏡飛馳。

 修改節目名稱

今次韌體更新，仲有埋修改錄好了的節目名稱。

用家如果覺得錄好的節目名，唔能夠表達到真正需要的意思，可自行用  iPad /  iPhone 修改。

　以下示範修改一個叫中華英雄的節目，在所屬的箭咀 ( 綠色圈 )按一下。

咁.......操作介面就會換成如圖所見的一頁，內裡可見到這個節目的基本資料。

留意在長方格內的原有節目名，正等用家去作出修改，用家只要用手指一篤個節目名............

咁就可以用返  iPad /  iPhone  所提供給用家的手寫中文，英文，數目字，都可以輸入去作出修改。

透過下圖，可見到左手邊是原名，而右手邊是我修改後的節目名稱。

修改前	修改後

完成後可見到有關這個節目的名稱被修改了。

返出去已錄影節目表一看，

可見原有的中華英雄節目名，給新名字所取替，再見唔到中華英雄這個節目名。

而重溫這個節目內容時，左下角的節目原有名字，同樣是以新名稱所取代。

係咪好用呢~~~~ ^_^ 

其實以上只係用搞笑的方式做示範比大家，相信各位真正使用時，可以把節目名加長就可以了。

例如 :  東張西望之 ( 中秋特輯 ) 。居者有型屋之 ( 馬來西亞豪宅 ) .........，使到節目名一目了然，對整理檔案有著非常大的用處。

對應外置硬碟

另外，呢個功能，能同時對應外置硬碟節目。

圖中所見，藍色節目名是代表 外置硬碟節目，而黑色節目名是代表 MTV 7000D 節目，

透過這圖你可了解到這個美女廚房 ( 跳舞 )的片段，是來自外置硬碟，係咪好清楚呢。

關機鍵

上次韌體更新提供，就算身在家中的MTV7000D關了機，

iPhone / iPad 都可以搖距把她叫醒來操作，但缺點就是沒有設立關機功能，

今次這個韌體新版本，就會加設這個關機鍵，用家離開這個app之前，

可把圖中紅色鍵按一按，就可以搖距關上家中的MTV7000D，進入待機模式。

缺點

雖然收看硬碟內的節目時，同一時間並唔影響到錄影功能，但就影響到電視機直播節目。

例如屋企人正用緊客廳的 MTV7000 來睇直播，呢個時候，你用 iPad來重溫 MTV 7000D硬碟內的節目，

咁客廳部電視機，畫面就立即由直播節目，跳到當時重溫硬碟內的節目。另外上述介紹過的搜畫，由於每一次搜畫時，都是黑畫面，

用家是無法睇住個畫面來飛，準確度不足，而且黑畫面時是Loading......需一段時間，搞到少不免都唔想飛。

另一個缺點就是無法設換聲軌和顯示字幕。

如圖所見的這個明珠台節目，是無任何鍵提供切換聲軌或中文字幕顯示。

對我呢類英文盲的人來講，都唔知講乜。

而設定介面有別於之前的樣子，但內容都是差不多。只是字面有所出入。

有關設定問題，可重溫當日介紹。

http://www.avbuzz.com/audio-video/201107/mtvu/0.htm

希望大家都享受到重溫錄影節目所帶來的樂趣丫~~~~~

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。