室內設計師下的影院

發佈日期 : 2011年 10月4日

上回講到參觀完周先生 3000萬人民幣別墅後，接著去下一個預約好的 6000萬人民幣獨立屋參觀。

參觀前唔想大家失望，提提今次套家庭影院，與呢間屋身價係唔成正比，因為對方並非發燒友，

只係打算在家中一角，設立一個迷你影院，而且過程都只係交比室內設計師做，連同其他裝修去建做，

希望大家用參觀家居心態去睇就可以了，否則會好失望。

到步後先在外圍望一望吧。

單看外型就知道非富則貴的地方啦。

6000萬人民幣呀，私人泳池一定有架啦。

個泳池並不是一個長方池咁簡單，因為在尾段是另有一個水力按摩池的設立。

唔.............真懂得享受，我覺得明珠生活應該來呢度訪問一下。

盛夏的時候，你話可以在這個地方暢泳一下你話幾好呢~~~~

好喇，正式入屋了，大門用了近年很受觀迎的指紋密碼電子鎖。

入門的樓底空間感，就足夠使我知道6000萬人民幣的價值了。

這物業樓高四層，但我今次所能活動範圍，只是其中一層，其他並不接受拍攝呢。

但我可以有機會入屋參觀和拍攝都好滿足了。

嘩~~~~條樓梯好靚呀~~~~

不過屋主可以唔需行樓梯架，座升降機啦~~~

唔...........真係奢華啊，電梯旁的地柜好優雅呀。

叮~~~~~

到喇，呢層就是我能參觀活動範圍了。你睇這一層電梯轉角位，同樣是有及腰的優雅地柜擺放。

與剛剛的地柜比較，各有特式，兩個我都好喜歡。可惜我屋企細，送比我都無本事放。

話時話，咁大間屋，就算送比我，要我買滿傢俬擺放，我都無呢個能力呀。

電梯門打開之後，第一個畫面，就係呢個位置喇，感覺好舒服。

嘩~~~~~~闊落到我個相機鏡頭，都無法一鏡過影到全貌，死未?

有無再靚D呀? 我成間屋都無呢度咁闊落，見到咁樣環境，我自覺縮到變左一隻雀仔喇。

開放式廚房，呢邊煮，那邊食，好正呀。

可容納八個人的圓餐台，真係闊到無朋友，週邊還有多的空位，一點都不會有壓迫感。

我知，我知，你屋企張台大過呢張丫嘛，我知架喇，我講緊我屋企無咁大張咁解遮，明架喇~~~明架喇。

爐具放中央，仲有抽油煙機，不過我覺得係工人用多啦，唔通主人自己煮咩? 

就算真係主人親自下廚，都有工作幫手做周邊的工作啦，呢D咪真正享受到入廚樂，又唔需理會事後的手尾工作囉。

廚柜都好靚呀~~~

我............突然想起陳豪~~~品味咖啡。

這裡還有一個遍廳。

單係一個遍廳都好舒服，我好喜歡這個藍色鏡面的茶几，使我想起Sony藍光機面。

燈飾都好襯這裡的氣氛。

大家有否留意到我係全程無需要用閃燈來拍攝呢?

因為這裡有一個好大的落地玻璃，加上當日很好天氣，所以採光度非常足夠。

咁落地玻璃外是什麼世界呢?不如出去睇睇。

唔.................係咪好正呢?

我們剛剛就係由最下層的落地玻璃出來架喇。

呢度有日光椅可以好似 Wall E 咁晒太陽。

而這裡也有一個日式園景。

呢度設計真係好時尚，一點都唔濁氣，就連廚房都附有網線，很細心。

雖然現在Wi-Fi很流行，但有預設總是好一點嘛。

好喇~~~終於介紹完喇，可以入去家庭影院參觀了。

圖中這道門，就是家庭影院的入口喇~~~

好啦~~~~入去參觀一下先。

推門前，向後望一望先，你睇個家庭影院門口，距離落地玻璃窗幾咁遠~~~~~

這個房間面積約 280呎 ( 28平方米 ) ，室內設計師把這裡裝飾成一間迷你電影院一樣。　

器材表

參觀前不如先了解這個房間所用器材吧。

推開門之後，就可以見到這個房間望出大廳仲有幾大面積。

唔.............有錢真係好呀。

圖中就係一對 MK SOUND SURR-55T 後中置，

給三秒鐘考下你，你覺得圖中有什麼不正常呢?

叻仔!!!!快而準，無錯喇，MK Sound SURR-55T屬於 Tripole 喇叭，咁樣成隻喇叭藏了入去死得喇，

得返正單一面發聲，咁 Tripole ............

左右兩側的MK Sound SURR-55T後置同一命運。

問心講，一般市民或室內設計師，都係唔喜歡在家居見到喇叭樣子，所以咪搞成咁囉。

由另一個角度看看房間後排的佈局。

兩排座位，一前一後，做到迷你影院的感覺架。

投影機用上 Panasonic AE4000 ，雖然都是一部好機，但以這裡的派頭，我覺得有好大進步空間。

如果你反問我，點解一定要貴價機先睇得電影，入門級就唔可以睇? 咁我真係無聲出架。

唯有講，最重要係比錢果個喜歡就得啦，其他人插咩咀?

你睇，這裡的氣氛係咪有迷你影院氣氛丫，有咪得囉。

所用的投影幕，是美視投影幕 120寸高清透聲幕，三隻MK SOUND  LCR750，就是放在這隻透聲幕後面。

如果是你，會把 MK SOUND SB1250 低音炮收藏在這個柜內發聲嗎? 

唔會，但那位室內設計師就會喇。聲效如何? 咁放法，你話呢。

設計師打做了這個器材柜，器材可以拉出來接線。

個人評價

這個房間對一般市民來講，無論視覺效果或聲效都會滿意，因為一般市民沒有要求，只要好過他們家中的電視機就可以了。

正所謂顧客永遠是對的，室內設計師又唔會問代理應該點安裝，反正貨就收了，自然運用他個人獨到眼光去設計，

到整個工程都完結了，然後邀請大家參觀他的作品，咁............仲有彎轉?

不過唔重要，Hi Fi係用來睇的，幾好睇丫。

6000萬人民幣大宅，使我大開眼界，住呢類房屋真係心情開朗，整個人的感覺都好享受架，不過睇來我要下一世先有機會擁有到。

雖然這個家庭影院並不是我幻想的好，但我沒有後侮來這裡參觀，平日真係無可能來呢類地方見識同那怕是一層都好開心。

全文完

  其他家訪重溫

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。