作死不離3兄弟 好正呀~~

發佈日期 : 2011年 11月8日       圖 / 文 : 巴斯 

當初見到呢張海報就唔開胃，一睇就知係鬧劇一套，

個戲名無論係中文片名或是英文片名(  3 Idiots )  ，在我眼中一點不討好，而且仲好反感添，

不過起碼都留下印像，好過完全唔知呢套戲的存在。

莫講話入場睇，預告片都唔會比機會佢浪廢我寶貴的時間。

日子一日一日的過，每日都在 Facebook上見到有人讚呢套戲，起初我覺得總有一些人是喜歡睇無聊的白痴電影，

但後來我發覺口碑是一面倒的讚，無人彈過呢套戲，真係一個都無彈過，我開始對這套戲改觀，由反感變成好奇了。

後來朋友約睇電影，提意的就是這一套，於是.............

多謝Facebook咁多位鄉親父老，更多謝約我睇呢套電影的朋友，就是因為我白痴，以為係廢片，如果唔係你地，我差點白白錯過一套好片。

呢套印度片，無論內容還是拍攝手法，都比美國那堆特技英雄片好睇得多。

編劇真係一流，而且有好導演配合，演員也演繹得不錯。

不過我最喜歡就是編劇在這套勵志電影裡，帶出非常強烈的訊息，強調唔好死讀書，凡事向正面想，而且事事應該以樂觀來面對困景。

片中不時提醒大家，每當遇到困景，要同自己講  All Izz Well ，向觀眾發出強烈的正能量，我勁喜歡呢一點。

內容不但有使人會心微笑的幽默情節，也有不少感動位，加上導演把片長 171 分鐘 ( 接近 3小時 ) 內容，

用過去和現在同時交錯演繹，節奏一點都不感到悶。

印度片有一個特色，無論係愛情片，催淚片，災難片，定係科幻片，都無啦啦加插歌舞在內，

呢套勵志電影都唔例外，一樣有幾段歌舞加插在內，不過你唔好以為係好老土的歌舞，

旋律好好聽架，屬於好易入耳的印度風格，其中一首名為 Zoobi Doobi 的主題曲好正，勁喜歡。

當中一句 歌詞 Zoobi Doobi ，只聽一次就上口。

片中的女主角唔知點解有時塊面好闊，但有時又好尖，都算係靚女架，

不過跳舞時動作過大，影響美感，其他都滿意。

如果你無睇過呢套電影，我誠意推介，唔睇絕對係你損失，相信我吧，這片肯定唔會使你失望，真係好好睇。

以下就是這首我喜歡的歌曲足版，我回家都聽了好多次，希望你都喜歡這首輕快旋律的主題曲 Zoobi Doobi。

留意片段內，有我好喜歡的主題曲音樂 Zoobi Doobi 。

  Video 

　雖然呢套電影在香港現正上畫中，但唔代表呢套電影是新推出的，

事實上這套電影是屬於2009年作品，台灣數月前早推出過台灣版藍光碟，由於是台灣版，自然是附上繁體字幕了吧。

香港有某些店鋪提供水貨.............咳咳咳..........Sorry Sorry，應該叫平衡進口貨 ^^，

每隻由港幣 $230 - $280不等，視乎個別店鋪而定。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。