副廠電對應 NEX-7 

發佈日期 : 2012年 2月23日    圖 / 文 : 巴斯

還記得 NEX-7 在剛推出的時候，不兼容副廠電嗎?

不兼容副廠電 

NP-FW50 電池，香港官方網站以每粒 $450港元發售。

NEX-5 是可對應市面上副廠電，副廠電價錢 一般都不出 $200 港元有交易，有不少NEX-5用家都用副廠電。

但並不代表 NEX-7 可兼容副廠電，實地用了圖中這一款，原本可用在 NEX-5 身上的副廠電，現在就不可對應 NEX-7 。

必需用回 NP-FW50  原廠電池，NEX-7 先可以運作正常。

放入副廠電到NEX-7身上的話，雖然可以進入正常畫面，

但不出10秒內，畫面就會跳到這個警告字句，然後機就關上了。

成功解碼

日子一日一日的過，後來聽人講，話某某副廠電，終於可對應到 NEX-7。

但全都係聽朋友的朋友講，朋友又無提供過圖片出來証實，都唔知係咪真，曾經問過店鋪，佢的最佳答案係唔識，把責任交返比消費者。

這日經過旺角星際 天祥斜對面 這家店鋪，老闆聲稱其中一款副廠電池己解碼，可對應到 NEX-7 。

由於當時我都未有相機在手，無法即場証實，不過老闆好好人，拍心口話一定得，如果唔得退返錢比我。

你知啦，呢個年代，好少人會拍心口講野嘛，在好奇心驅使下，加上由年初四訂相機，

數數手指，都應該差不多有貨喇掛，就算無相機的我，都先買下來吧。

圖為這款副廠電池，包裝不是密封式，可不破壞包裝的情況下取出電池，

可能因為咁，萬一唔得的話，都可以再放貨架上出售，

不過老闆係用斬釘截鐵語氣講話得架，所以我對佢有信心。

圖中可見呢粒電在這間店鋪係以$130發售，我無在全港 19區格過價，我並唔知道呢個價係全港最平定最貴?

如果你見到其他地方買$10三粒的話，千萬唔好講比我知，我會好唔開心架。

唔該，唔該，好耐都唔該。 ^_^

這是電池背面，雖然字樣上有印著 NP-FW50 電池字樣，

這點只可以確定是和原廠電一樣的型號電池，但不代表NEX-7可對應。

哈~~~真係講你都唔信，正好我買完這粒副廠電池，離開星際之後，我就接到百老匯的電話通知取機，真係巧合加幸運呀~~~

放入這粒副廠電池到NEX-7啟動後，超過十秒都無問題，果然係運作正常，而且電量有大約 70% ，

起碼如果未返屋企，都可以在街上玩一陣先，唔需好似 NEX-7 跟機來的原廠電池係零電量，有機無電用，好殘忍遮。

  Video 

透過以下短片，可見一個鏡頭落，

見到這粒代用電，放入NEX-7體內，並即時使用作高速連拍和使用閃燈回電效果。

副廠電安全問題? 

唔....呢條問題如果唔熟的陌生人，我一定咁樣答 : 

我絕對唔建議用非原廠電池，太危險了，雜廠電池爆炸的新聞大家都睇唔少，

有無人可以企出來拍心口保証某副廠電一定無問題丫?所以.........都係用原廠電池好。

NP-FW50 原廠電池，Sony專門店售$ 450一粒，一口氣買兩粒都只不過係 $900，一千元仲有一百蚊找。

相比起一萬幾千蚊枝鏡頭，千幾蚊個相機袋，電池售價真係濕濕碎。

如果百老匯仲平，每粒 $380 就可以買到了。

套用某類人最喜歡用的金句 : 唔係有錢買機，無錢買電下嘛? 

如果你係我好熟好熟的朋友，咁我會答你 :  我用緊副廠電池囉，唔排除下一次出省城買多粒用天~~~

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。