終於得手了

發佈日期 : 2012年 2月25日    圖 / 文 : 巴斯

年初四訂機~~~等等等，係咁等，等到呢日黃昏時份，

終於可以等到電話去取貨，真係安樂晒喇。

店員話呢部機，外面好多人炒，

不過我訂機之後都無理會過佢的消息，正所謂事不關己乜乜物物，外面有無貨都唔關我樹，只知道現在可以有機用就得喇。

初四訂貨時被綑綁式一機一鏡，只可以選擇 24mm  f1.8 連機，無其他鏡選，更加無淨機訂，一係訂一係唔訂。

呢枝鏡質素好唔在講，雖然係定焦鏡，但最近對焦距離近到 0.16 米，方便到無朋友，

大部份我要影的個人取向，佢都大部份滿足到我，係心目中第一志願必買鏡頭，就算唔綑綁都自動買啦。

呢枝蔡司 24mm  f1.8 鏡頭，質素超高，

上次輯 霧鎖山頂  試機相依家個心仲卜卜跳。

店員好心機幫手貼保護貼，靚仔晒~~~~

好可惜當時剛好賣晒 49mm 防UV鏡片，唯有去別處買啦。

雷霆救兵話咁細枝鏡，無需防撞花鏡片，所以佢索性唔用，你話係咪型得來好有性格呢~~~

我唔得呀，我用機好粗，無保護死硬。

我用防UV鏡片最主要係我唔想用個鏡頭蓋，每次取機出來時，要開鏡頭蓋，阻住我影相速度，

所以用塊防UV鏡片，作為保護個鏡頭用，今後都唔夾返個鏡頭蓋了。

用了防UV鏡片保護，唔會直接弄花個鏡頭，就算係花，咪由得個防UV鏡片做替死鬼囉，

花得太離譜到時再換個另一塊，最重要係唔好比個鏡頭蓋，阻頭阻勢。

每次把相機拿出來時，都唔可以第一時間影相，點都要把鏡頭蓋夾開先，對 Snapshot 來講，真係阻手阻腳。

夾開了之後，究竟個鏡頭蓋收在手心，定收返落褲袋先影丫? 搞得來我都影左啦~~~~

就算鏡頭蓋有條繩都唔型仔啦，何況都無丫，每次影完又要夾返埋個鏡頭蓋，邊有咁得閒服待佢呀。

乜都係假，最緊要夠爽，一抽出來就影，要我為了一個鏡頭蓋而煩，

正所謂本來無一物........唔該唔好煩我。

講開本來無一物，一般使用者，為避免不必要的外來擾光進入鏡頭，影響最佳成像，都會用上遮光罩，

不過我個人關係，一來唔喜歡遮光罩阻位，二來反而喜歡有適量擾光入鏡頭 ( 古怪口味 ) ，所以一向都無用遮光罩呢個習慣。

用家購買Filter時，緊記留意該款Filter，是否能接上遮光罩，市面上並不是每一款Filter，都可容許接上遮光罩。

否則用了Filter，用不了遮光罩，咁就唔開心喇。

接下來就係去找一個給我用最短時間，就可以把相機抽出來影相的相機袋，希望找到啦。

唔用遮光罩，有機會使到大量不必要的擾光進入鏡頭內，呢張相被前輩插到我開花，

但........我遍遍喜歡咁，在唔影響其他人之下，我自己喜歡開心咪得囉，其他野我唔理啊。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。