SONY STP-WS1 皮手腕繩

發佈日期 : 2012年 2 月23日    圖 / 文 : 巴斯

仲未有相機到手，但係手繩就一早睇中，呢條係 Sony 自己出品的手繩，售$190。

雖然我覺得一點都唔平，但佢擁有的功能，是我個人能力無法找到其他代替品，最終都係買佢。

用佢來影相會靚 D ? 我話係，你信唔信先 ?  ^_^

手繩通街都係，但無一條合我心意，一係個款唔得，一係個色唔得，一係就無得索手腕，總之硬係無一條合我心意。

唔知係我黑仔，定係本身貨量唔多，我行過幾間Sony專門店，都剛剛好賣晒。

其實無相機的我，根本就唔急買手繩，唔知點解，硬係要摸下，見下實物先得安樂。

呢日經過海港城 Sony Store，居然見到有幾條咁多，雖然未有機，為免到時有機到手，又輪到手繩缺貨，都係死死地氣買左先。

你睇我幾咁可憐............買完之後仲要比我見到呢張咁型的海報...............

機呀機，你幾時先到貨架，年初四到依家，真係等到頸都長喇~~。

等呀等，等呀等，前晚，望穿秋水的NEX-7終於到手，咁呢條手繩就可以和相機結合了，呢條手繩吸引我最主要係有三點 : 

第1 : 繩頭夠粗

市面上的手繩，連接相機或手機扣呢個部份的繩頭，一般都好幼，無見過好似呢條咁粗，安全感好重要架，

你話影影下，因為條帶幼而磨斷左，連機帶鏡飛落地，噢~~~~~想起都覺得痛啊~~~

第2 : 有得索

你睇，條手繩仲有得索手腕，呢個防脫手慘劇發生的設計，你話喇，呢 $190係咪值得比先。

第3 : 黑色

顏色對我來講好重要架，手繩同機身一樣顏色的話，會自然好多，唔會同NEX-7爭搶風頭，完全低調 ( 似我 ) ^_^，

你睇條手繩配上NEX-7之後幾型，實在愛死她。

你睇紅色小人借比我果部機用條咁樣的手繩，真係好騎呢，我完全唔想正視佢，衰相到呢~~~搞乜野啊。

但紅色小人好喜歡架播，無法啦，部機問佢借嘛。

拿拿拿，你話喇，你要邊條手繩丫? 

紅色小人果條好D? 咳咳.......無野喇...........

圖為呢款手繩的前後包裝樣子。

背面附有使用圖示和產地來源。

附在包裝上的狀態非常之好，因有三點魚絲固定位置，所以Show出來時，無論是垂直掛著，或平放，手繩都能保持最佳Pose。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。