Canon 5D MK III 出貨了~~~

發佈日期 : 2012年 3月26日    圖 / 文 : 巴斯

上星期六的黃昏，銀手細佬接到呢間店鋪的電話通知，Canon 5D MK III 到貨，可立即到取。

銀手細佬聽到之後立即出門口，咁熱門的相機，可以在呢一日出到機，當然係有點辦法吧。

銀手細佬人面廣，今次全靠佢，先可以咁快得到部機。

丫..........話時話，呢位有勢力人士，講佢個名出來，你應該都熟識佢的，佢個名叫錢，英文叫 Money。

~~~啊~~~唔好打~~~唔好打~~~~

讀者 巴斯

咁係丫嘛，唔落訂，識你老鼠咩，部機咁搶手，你邊位呀? 不過銀手細佬都唔係就咁去店鋪落訂，都有一點點技巧架，

就係他找比較遠離購物區的分店落訂，咁成功機會比較大，果然証明係得架播。

呢一間就係位於北角和富中心附近的分店。

差$20就 3萬5千港元的套裝機，唔落訂，你覺得到貨會打比你咩?

店員收到了訂貨單據後，行開去搞手續時，心急的銀手細佬都唔等店員了，就地正法為MK III驗明証身。

呢盒係套裝款式，連同一支鏡頭一起在盒內。

打開盒蓋之後，原來有三格需要一一驗收。

先由第一格開始吧。

第一格所擺放的物品，分別是說明書，保用証和光碟。

再開第二格，就是MK III 的 Body，用防撞粒粒膠袋包著。

最後來到第三格，就是白色的一個大盒。

哈~~~白色盒內還分成兩格，先開第一格吧，這是屬於套裝內的鏡頭，

用發泡膠和膠袋一頭一尾保護著，在發泡膠暗格內也可以找到屬於這個鏡頭的索袋。

發泡膠內一共有三件東西擺放著，分別是遮光罩，鏡頭索袋和一枝  24-105mm f4L 鏡頭。

照例當然要接到機身上試試吧，好喇~~~接好了。

白盒被分成兩格，剛剛睇完屬於鏡頭的一格，另一格打開後，原來就是圖中所見的附件。

送卡? 唔好傻啦~~~自備丫唔該。

銀手細佬帶來一張8GB的CF卡作為試機之用。

銀手細佬擁有很多優質鏡頭，他根本對這支鏡頭無興趣，只不過剛剛好有朋友想要呢枝鏡頭，

於是銀手細佬就順手買這個套裝吧，否則他只會買淨機款式就夠了。

好啦~~~試試先~~~~格擦~~~

滿意嗎? 幾萬銀一部機，在呢個環境下拍攝，無可能唔收貨丫~~~

銀手細佬是MK II 用家，由於他未放出手上舊機，這日跟身來到店鋪時有 MKII在手，於是取出電池來比對一下。

兩者的電池，分別在於MK III 跟機來的電池有生產日期和韓文。這粒電也是新舊機都屬同一款電池。

店鋪還免費附上一粒代用電池。

當然保護貼也是免費並為顧客貼上。

影完開箱圖，食過晚飯後，我們就分手了，雖然銀手細佬好好人，話借部機比我玩，但小弟近日試得太多相機了，

我本身唔係一個好精於呢類工作的人，做得太多我會好無趣味，我係一個人，唔係機械人，何況一直以來我的興趣只是攝影感覺，

硬件工具興趣不大，加上之前幾部機的報導還未完成，所以我推了銀手細佬的好意。

幸好銀手細佬答應在星期日用他其中兩支鏡頭接上MKIII身上影一些試機相，好等其他朋友可以分享到，

直接減輕我工作量，真係好多謝銀手細佬，感激萬分。

以下就是銀手細佬打算用的兩款鏡頭。

Leica Summilux-R 50mm E55	Leica Elmarit-R 28mm

還未欣賞到銀手細佬作品前，不如睇睇MK III的樣子先丫~~

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。