將軍澳 STAR Cinema 戲院正式開幕

發佈日期 : 2012年 4月5日    圖 / 文 : 巴斯

將軍澳港鐵站的爆谷商場新落成，有專屬大堂 C 出入口。

2012年 3月31日也是 STAR Cinema 戲院正式投入服務的日子。

這裡為顧客提供 6間迷你電影院，裝修除有優雅時尚天窗，還有落地大玻璃透入天然光線照耀大堂，很有空間感。

戲院三大特色

以下就是這戲院所擁有的三大特色。

特色 1 : 購票輪候服務

想買戲票的顧客，來到大堂，第一時間並唔係去排隊，而係去圖中所見的位置，按鍵取號碼，

即係好似平日我們去等維修服務咁呢? 先取號碼，然後等叫號碼。

得到輪候號碼之後，係無需要排隊，自由活動，行又得，企又得，好似其他等候人仕一樣，像喪屍咁無目的在柜位附近行來行去，

總之就係聽叫號碼啦，咁係咪只能用耳聽呢? 

當然唔係啦，每一個柜位後面，都可以見到輪候號碼的數目字顯示。

拿，好似依家咁，一號柜位咪叫到 282號囉，二號柜位咪叫到 283 號囉，對號埋位就得架喇。

當叫到自己所屬號碼，就可以行埋柜位前，

像平日買票一樣咁劃位，就可以在現場買到戲票架喇。

特色 2 :  QR Code 入場服務

顧客如透過 Hong Kong Movie 所提供的 app 作網上訂票，成功訂票的話，該個 app會提供一個QR Code比顧客。

當顧客來到驗票口時，就會見到圖中右手邊所見的QR戲票入場處。

這個鏡面位置，可見到清楚指示，顧客這時，取出早前該個 app 所提供的專用 QR Code出來，

放在掃描器上，咁就完成核實身份，驗票員透過身邊擁有的顯示器，就會確認到顧客身份，歡迎該顧客來臨。

而呢種高科技潮人帝皇式專用服務，單係呢份優悅感都值回票價，所以...........唔收貴D的話，直頭係侮辱了你顯赫的尊貴地位啦，係咪? 

何況用 QR Code的話，又唔需要把戲票資料打印出來，係咪好環保呢? 

咁要環保係咪要比錢先，他日我們人人有機會要廢物徵費，環保意思，咪就係收多D錢囉。

平日網上訂票收大約每張戲票 $7 額外手續費， 用這方式訂票，每張戲票需額外多附 $9 手續費，多謝晒~~~

特色 3 :  Infrasonic 系統

即係震動椅囉~~~~這裡一共有6間迷你戲院，不過只有三間提供震動椅功能，分別係 1號院，2號院 和 4號院 。

所以買票的時候要多加留意啊，而震動椅是整個房間每一張都提供震動功能，唔似 THE ONE 咁，只係隔行先有震動功能。

披肩借用服務

和其他電影院一樣，有為客人提供披肩借用服務，每件按金 $50 ，歸還時如無損壞，憑收據可得回全數按金，不另收費。

直到這刻為止，在我個人眼中，依然都係嘉禾院線的披肩最厚料，女生用起上來，保暖之餘更有一份安全感，按金 $100，不另收費。

限時優惠

又話唔需排隊買票，咁點解呢度又咁多人排隊呢? 

哦~~原來做緊惠優。

以下就係優惠的內容，計一計，唯起上來都只不過係$40一張戲票，都著數架，

何況附近居民一定方便，且一定用得晒。

在票務處旁邊，就是小賣部，

入場前可以在這個位置買到小食入場，爆谷當然一定有售啦。

如果小食部的食品唔合個人口味的話，行去另一邊，有這類重量級小食。

新戲上畫

呢套都算係新戲 ? 新架，新戲來架，明珠 930做過 ? 3D丫嘛，你有無睇過3D版先，無就當新戲架啦。

套戲係上一個世紀末在電影院上映，時為1997年，掘指一算，15年前，一般 90後都應該無在電影院睇過，

在電視台重播又要忍受廣告時段，DVD碟畫面又唔夠大，今次有機會在電影院睇返，3D版係最佳選擇。

大家一定好有興趣，唔好得個講字話支持，真係買票入場嘛。

片長 194 分鐘 ( 三個幾鐘 ) ，全程 3D 都只不過係 $80 ，我比 $80你丫，你提供到乜野娛樂可以磨到三粒鐘先?

一個字講晒，抵!!!!!

我就唔受得3D喇，三個幾鐘用 3D眼鏡睇片 ? 睇怕播到一半都捱唔到，要Call白車了。

加上當年由電影院睇到出LD碟，再睇埋後期出的 DVD，真係咪搞我。依家講講下我都有點漏啊，唔講喇。

仲有五分鐘開場喇~~~~ ，你睇幾爆。

個人評價

在我眼中，圓方6號院，依然是我個人眼中最好的香港電影院。

這裡的座位唔夠斜度，前排的人高度，會有少少影響到我，銀幕又唔夠大，另一方面，地區唔太方便我，

我對這家電影院一點都不反感，只係地區不方便我，所以今後都應該唔會再來這裡睇電影。

但我覺得住在這區的居民，應該是來這個電影院睇電影的，因為實在太方便了，而且附近都有不少食店，但就要等位囉。

新商場嘛，我住咁遠都會八掛下啦，何況這區的原居民? 單係新魚感就應該李這裡睇電影嘛，

4月12日上畫的異形海戰，這裡都會上畫，唔知這裡的街坊，是否都會來這裡睇過套電影呢?

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。