CAS Step 1.1    dBPoweramp

發佈日期 : 2012年 5月6日    圖 / 文 : 巴斯

Rip 碟並非 iTunes 專利，一線發燒友會用售價 $38美元 ( 約$305港元 )的Rip碟軟件 dBPoweramp ，來取代 iTunes 得到更好的效果，

http://secure.dbpoweramp.com/store/product.asp?CAT_ID=71&P_ID=151

有要求的一線發燒友，必定會配合外置 CD-ROM 來讀取 CD碟上的資料。

外置 CD-ROM的電源，不但透過 USB線材所得，而且可以遠離電腦機箱內，各式各樣不必要干擾，尤其機箱內的火牛。

市面上現在好難買到一個淨 CD-ROM，用家可用兼容 DVD / BD / 的 ROM 來代替純 CD-ROM，

是外置就可以了， ( DVD / CD- ROM市面約售 $350上下 ) 。

而 Rip 碟無分 Window 或 Mac，兩者都可以 Rip 碟。

有了 dBPoweramp 和外置 CD-ROM，但還未夠好，正正就是因為一線發燒友有要求，

所以除三害再唔可以好似用 iTunes咁，可有可無，

在這個發燒層面上，除三害是必需要使用，是在 Rip碟前就必需做好，否則虎頭蛇尾，做D唔做D，最後都達唔到最高效能。

配合除三害的工具，包括 FURUTECH  Destat II 靜電消除風扇 $3800 港元 和 FURUTECH 消磁器 $2800港元。

有感而發

Rip碟軟件 dBPoweramp ，外置 CD-ROM，靜電消除風扇，消磁器，一步都不能少，否則就唔係發燒友要求的標準。

就是因為上述的工序和另購設備，一般初學者都唔會貿貿然去接觸 CAS。

永遠都只係會話CAS好高深，叫他們開始時無需要咁高，只用iTunes就可以，但他們又怕唔夠質素。

到頭來CAS一步都無踏出過，遺下一大堆無法解決的問題，白白浪費享受CAS所帶來的寶貴光陰。

很多朋友都不明白，無人話過用CAS來取代CD，打敗 CD ，

CAS只不過係用另一個新的方式玩音響，透過呢個新的方式，增加玩音響的樂趣。

CD都唔係好靚聲啦，黑膠好聲過佢，但黑膠都靚唔過母帶播，唔通又一定要有母帶在家中先聽歌和玩音響嗎?

Rip碟第一步其實好簡單，一係就 iTunes 乾手淨腳。

一係就  dBPoweramp +外置 CD-ROM+靜電消除風扇+消磁器+係咁多。

無乜野值得討論，喜歡就做，唔喜歡咪唔做，有無 CAS ，呢個世界都係咁轉吧。

我本身完全唔覺得用 iTunes Rip碟，無除三害和用內置 CD ROM Rip出來的聲音完全唔聽得，

只不過唔係做到最好，就唔好話自己係一線發燒友，硬碟內所Rip 出來的檔案，就唔好用來作 AB 示範比較。

用最好的工具和心機做出來的檔，訊源會是最好的，但並不代表用 iTunes Rip出來的檔係垃圾。

問題係提供一個簡單的方法出來，又話唔Pro，提供 Pro的方法又話麻煩.........我唔係好明白當中的理由。

其實...........黃耀明講得對，別人的事，根本無需要我呢D人來同意或否定，我自己玩得開心就可以了。

以下係一位朋友，大約一年前的電郵，

當時他在我家感受過CAS之後，我只係口述給他有關CAS的設置和使用，指手劃腳後，

他回家用Window + iPad+ AV amp 2.1 ，就開始了他的CAS之路。

當時事隔一星期，我收到了以下由他寄出的一封好有感覺的電郵，深深感動了我。

昨晚過銅鑼灣同舊同學食飯

坐機鐵經過貸柜碼頭

壹架架起重機,壹排排貸柜無聲飛快閃過

隔窗遠望四週擎天大廈

城市在高速發展

只感到沒有樹木生命的冰冷

這時耳中正嚮起Beyond的遙望;大地;不可一世

下車時紅了眼*-*

就是因為 CAS 方便，iPhone內的歌曲使他聽多了歌，之後他四處找舊歌在他的 CAS系統裡欣賞。

每次當咁好彩找到什麼絕版碟，都會話我知，就以上星期為例，他Line我，話我知他找到一隻鄧寄塵CD。

仲因為想了解佢唱乜，在找封面的同時，順手找埋歌詞，殖入體內添。

睇完以上內容，我好希望依然站在十字路口的你，有一個決定吧。

CAS的門一直打開，只係你唔願意行出第一步吧，還記得華仔作品常言道的一句歌詞嗎? 

拳頭若放開 可擁抱四周

第一次設定

作為第一次設定，當然要話比 dBPoweramp 知道，今後每一次 Rip 碟，檔案應該傾倒去邊個位置，唔好次次問。

講左一次，以後都係該個目的地。

圖中所現，我自己把目的地設為硬碟 F 內，一個叫 CD的資料夾內就可以。

今後無需再理會分類或分明星，分乜分物，唔雖要我們操心， dBPoweramp 會自己搞。

如果你喜歡，就咁把目的地設成 F 也無不可。

以下兩張圖，只是比大家睇，唔係叫大家去搞，呢部份係唔需要搞，用預設就可以。

只不過驚萬一唔知點解預設唔係咁就麻煩，所以第一次就順道入來望一望。

留意呢個設定如果係正確的話，係應該咁樣的。

呢度最主要就係叫 dBPoweramp 幫手自動分類和分碟名，

用家唔需要煩 Madonna和Lady GAGA的歌，應該點樣分開唔會搞亂，應該放邊度。

如果有第二隻 Madonna 碟 Rip入來，咁會唔會同第一次Rip入來的歌搞亂.........通通唔需要用家去煩，

因為你睇， dBPoweramp 一早就把 Madonna 之後，就用專輯一個一個分開了。

就好似今次咁，條路徑係 Madonna 之後就係專輯，專輯之後就係 12首歌。

所以係無需煩惱下一隻 Madonna 倒入來時會搞亂第一批歌。

你查查手上的設定係咪我所講咁， ( 通常無問題 ) ，好喇∼∼可以去下一個設定了。

由於今後是用 iTunes作訊源播放的關係，所以選最佳所素的 AIFF 。

接下來按圖中光碟圖側邊的打直 Bar ，就會出現呢個設定，呢個係話比 dBPoweramp 知，

在互聯網搵邊幾個 Server幫手搵碟內的曲目資料，留意當中一定要有 Music Brianz 和 freebd，因為好多繁體資料，都係佢倆個最幫得手架。

不過我當然盡 Take 啦，只不過講聲你知有件咁事吧。

這裡看圖識字，照 Take 就可以了。

第 4步意思係拖落下一頁咁解，因為呢個表好長，有下一頁。

接下來，按紅圈內的 Encoder 鍵

會出現三個選項，這裡可以由得佢地三個都同樣就咁成為預設。

如唔想有任何不必要的變化，可以Set死佢無得郁都可以，

把圖中綠色圈去一一選為如下的設定即可。

網上追尋封面的解像度，可以由用家自己設定。

一般 900X900 就可以了，不過我多手按了1000。

只要互聯網的Server找到1000以下的該隻碟的封面，都會找回來用。

設定完成

好喇~~~因為做好了第一次設定，今後就唔需要再搞喇。

今後一放碟入去，由於用家的電腦正在上網狀態，所以 dBPoweramp 就會透過互聯網去找屬於該隻碟的封面和歌曲資料回來。

不過呢步會慢少少，可能要等成分鐘都唔出奇，所以要耐心等候，由於呢個軟件讀得比效精細，相比起上來，呢方面 iTunes 就快得多。

在等候期，都只係會見到如圖所見 Track 1 ，Track 2............

等呀等~~~終於等到了~~~~~圖片右下角出現封面喇。

呢個也是大家所謂 dBPoweramp 的強項，自動找埋封面，不過係英文歌就係，一般中文歌的封面，十次都唔知有無一次找到，

由於我手上中文歌為多，所以我都係當呢個功能係廢的，何況就算有，

所找出來的封面解像度都未能達到我個人要求的 900X900 或以上，到最後咪又係自己影封面來搞。

睇睇圖中所見左手邊所顯示的歌名有無錯，無錯的話，就可以按圖片所示，位於左上角的 Rip 鍵開工，然後等收成。

留意上圖 dBPoweramp 為我找來的封面嗎是 750X750嗎 ? 

無錯由於我設定了封面解像度，最大可以去到1000X1000，所以 dBPoweramp 一口氣找來三個不同解像度選擇給我挑選。

但最終我都是用不到，知唔知點解? 心水清的朋友有一定留意到，這三個封面，無一個是我手上實物的同樣子封面。

拿~~~幫我搵到三個又點? 咪又係唔合用? 

最終都係要搵 Google 幫手，或者自己Scan或影封面? 

不過如果找來屬於合適的，咁就可以節省返一個步驟，這又是鐵一般的事實。

等呀等呀~~係咁等~~~~~終於搞惦!!!!!成隻碟 Rip 完了，佢仲比返張工作進度過你睇。

而且該封面都順便殖入埋該輯歌曲每一首歌埋，用家無需再做工夫。

一隻碟就係咁樣 Rip 架喇。

最後一步

雖然 Rip碟不靠 iTunes ，但最終都是用 iTunes 來播放這些擋案。

如果用 iTunes Rip 碟的話，就不存在呢一步，因為 Rip碟過程中， iTunes 會幫用家完成呢一步，用家無需費心。

但如果用 dBPoweramp 來Rip碟的話，呢一步就要自己來，無法子啦，靚聲大晒，係咪? 做啦~~

呢一步，就係把 Madonna 這碟的檔案，接入 iTunes 內裡。

打開 iTunes ，如圖選取 將資料夾加入資庫 ，然後就帶佢去 Madonna 的 MDNA 資料夾，再按確定，咁就得架喇。

完成後，MDNA呢隻碟，就和其他一早到步的碟放在一起，並和iTunes一起運作。

大功告成

資料不適用點算

呢個世界邊有咁簡單丫，隻隻碟資料係英文的話，一定無問題，但一到中文碟的話，咁就有變化了。

就以圖中呢隻艾心的不必太在意為例，dBPoweramp 所找到的第一志願資料是簡體，如果你是國內人仕，咁就拍晒手掌啦，

但我不習慣簡體，不適合我用，我唔收貨，於是我要按圖中右下角紅圈所示的鍵。

咁佢就會彈出另一個表來給我選擇，紅圈是 dBPoweramp 所找到的第一志願資料，

而這個表所提供的其他資料選擇中，由 Music Brainz 所提供的繁體資料合我用，

於是我就 Click 綠色圈的這個 Music Brainz 鍵。

你睇睇左手邊本來的簡體字，就立即變成由 Music Brainz 所提供的繁體字了。

如果萬一有唔滿意某單一首歌的歌名，更可以由 dBPoweramp 所提供的字，來取代。

用家只要Click字，就會得到取替某一首歌名。

返出來睇睇，13首歌名，

還有額頭位置上面的歌手名和大碟名，都是繁體字，噓~~~~屍伏晒。

缺點

用 iTunes 所 Rip 的中文碟，是接近 100% 可得到應有的準確資料，但 dBPoweramp 找不到適合的中文碟資料，絕非奇事。

就以劉德華呢隻5時30分為例，第一志願是如圖出現的亂碼。

剛剛上述講過按圖中右下的 Metadata 鍵，或按左上角的光碟 iCone 去再找，可找到其他Server的資料。

Click完..........結果...............你見啦，依然是亂碼，而且這個第一志願，是唯一的選擇。 

就連繁體字命中率比效高的 Music Brainz 都無呢首歌的繁體資料。

唉..........咁就唯有用人手一隻字一隻字咁打返入去喇。

又或者網上搜尋一下有無適合的曲目，可以給自己剪剪貼貼囉。

無法子啦，用  dBPoweramp 靚聲大晒，係咪? 落手做啦~~~

如果你以為十萬隻先有一隻係咁的話，咁我可以証明比你睇我真係好黑仔囉，

拿，就以 Best Of The Best 97 呢隻 CD 為例，16首歌當中，某些聲軌搵到，某一些又搵唔到，

但就算搵到，都係簡體，咁搞法，今次就算你係國內人都會黑面喇掛。

按 Metadata 鍵，再找到其他Server的資料。

睇到嘛，嘿......死未，呢個第一志願，依然係唯一的一個選擇，咁即係用唔到啦。

唉..........咁就唯有用人手一隻字一隻字咁打返入去喇。

又或者網上搜尋一下有無適合的曲目，可以給自己剪剪貼貼囉。

無法子啦，用  dBPoweramp 靚聲大晒，係咪? 落手做啦~~~

iTunes 無呢個問題

拿，把同一隻碟，用 iTunes 來 Rip 的話，

第一時間找到 Best Of The Best 97 的所有正確無誤資料。

而劉德華呢隻5時30分，所有資料正確，而且仲快過我 Cap圖，

你睇第一首都開始 Rip了，我只掛住 Cap 圖。

國仁 dBpoweramp 教學補購方法

 dBPoweramp 教學寫得最好的，必定是國仁，以上資料，

我都是參照他的資料做主骨幹而成，尤其係極花時間去了解的Take位。

所以想更清楚 dBPoweramp 的操作和設定，還是睇國仁的教學。

國仁由$12 書第 512期開始，就教大家用 dBPoweramp ( 第三輯下週推出 )，錯過了的朋友打算補購呢兩期的話

可去中環雜誌社，同職員講想補購 國仁AV Magazine ，Sorry~~ Sorry ~~~ 應該係 AV國仁 Magazine

哈哈哈~~~講笑講笑，查實係  國仁Magazine 先係真~~~嘩~~~哈哈哈哈~~~~

唔好打~~~唔好打~~~放手~~嘩~~好痛啊~~~~~

補購地址： 香港皇后大道中 99 號中環中心 48樓AV Magazine

電話：2121 7757

辦工時間：星期一至五：上午10：30至下午 6：30　

（中午食飯暫停時間為下午 1：00至下午 2：00）

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。