F40 的美滿禮物

F40 的美滿禮物

發佈日期 : 2012年 8月1日

我眼中的F40

F40在我眼中是一線人像攝影師，他的強項係可以在光線最惡劣環境下，

可以唔用閃燈，也不靠腳架，都可以拍攝到超靚人像相出來的人。

如果在正常的光線下，其色彩就更加係繽紛豔麗，充滿日本色彩，完全中晒我所希望得到的攝影世界。

上星期親手收到由 F40 送的禮物，多謝晒，真心喜歡這份禮物。

其實大家肉眼只能見到呢份禮物的一半，另一半只有我自己先感受到。

先和大家分享見得到的這份禮物，你睇個袋幾咁靚?實物靚好多，因為有閃閃的。

登登登~~~~凳，就係呢份喇~~~

係一本影集，我強調唔係寫真集，因為寫真集這個名詞，在香港使用，是使人嘔心的意思，

與日本使人有視覺享受和帶有美感的效果是兩回事，請不要再侮辱寫真集這個名詞。

沒想到一本影集居然還可以用膠箱來運送，太珍惜了吧。

你睇，這個箱是剛剛好擺放到這本影集在內，試想想帶出外給其他朋友睇的時候，

係幾咁方便呢，就算放在背包裡，都可以得到全面的保護，十個讚呀F40。

封背是如圖樣子，連封背相，都係咁靚，無得講。

這本影集是標準 A4 Size ，透過 Wing Shya為 Angelababy 拍攝的 Paradise 作比例，可大約猜想到實物的大小。

唔好誤會，這影集並不是在市面發售，只係屬於 F40 與 Model ( Tiffie ) 的紀念品。

尤其是對第一次到日本的 Tiffie 來講，今次難得與 F40 在日本拍攝，實在是非常難忘。

把透明盒打開，就可以見到這本影集，正如我之前提到過，在日本被受尊重的寫真集，封面的面越硬，級別越高。

F40 這本影集的面也是硬面的材料。

不如睇清楚這本影集的樣子丫~~~~先睇封面。

封背這張我都好喜歡。

這是 ( 96頁 ) 的一本影集，是用上非常厚料的175粉紙，每一頁都是手感十足的厚度。

細心留意釘裝，華麗嗎?

首頁用牛油紙作為開頭的序幕。

以下幾張圖是由 F40 提供 :

回港後，F40積極製作這本影集，又執相，又排版，最後印了五本出來，

這晚 F40 相約 Tiffie 交收的同時，順道為這書提上名字。

如果你係 Tiffie ，第一次去日本，仲有一本咁有份量，咁有質素的影集作為紀念，

不如你話我知，心情係點丫拿~~~~答案不難在 Tiffie 臉上見到。

前言

除了 F40 與 Tiffie 各自擁有一本外，還送其中一本給巴斯，非常感激而且榮幸。

文中開頭我提到，影集只是肉眼見到的禮物，另一半肉眼見唔到，就是親耳聽 F40講述今次拍攝的過程，

非常吸引，而且在過程中學到好多野，這對我來講是非常之珍貴，我們傾了三個多小時，我仲唔係好捨得走，多謝F40。

大家點解會喜歡睇 007，就係因為自己做唔到，而片中的 007做到晒，靚仔，有型，好打，智慧型，信用卡任碌，

住親酒店都總統房，又有名車用，擁有最先進的武器，而且仲有大量美女常伴左右。

所以有錢又靚仔，仲好打得的 ironman 近年也大受歡迎，就係咁解。

父母對子女都係同樣道理，自己做唔到，所以成日聽某D父母要子女做律師，做醫生.........

你唔會聽到父母叫自己的子女去做同樣係服務市民的實Q，倒垃圾或者洗廁所，

因為呢類工作，他們都做到丫嘛，所以咪寄望子女能完成他們未能達成的夢想囉。

想 F40 去日本拍攝，一直是我心願，雖然他的作品效果是很出色，但每次他都是參加影會或小組活動，

需知道呢類活動，無論拍攝地點或是Model，都是由其他人一早安排好，加上有其他人在拍攝，

想走近一點 Model，都會阻到其他人，轉景點也是需要得到其他人的同意，創作能力大大減低。

私影拍攝就唔同了，所有大小事都係由自己安排，就連Model要配什麼服裝，Set那一款頭，也要和Model詳談，

萬一碰上天氣不好，又要如何面對? 在街上拍攝，變數之多實在是一項又一項的挑戰，

但如果 Model能配合到，成功感自然大好多。

終於今日見到 F40的成果，而且效果沒有使我失望，真係好感動，這影集我在回程的路上又睇，返到家中又睇。

F40 說，以印 5本影集來計，印刷公司收他每本 $700 ，對一般市民來講，$700一本相薄，閒直係不可思議，

F40 所用的印刷公司，並不是使用市面上那些罐頭低能軟件排版的平價版本，

而係選用自己自由組合方式排版，所以成本上會高好多。

但對攝影發燒友來講，這個價錢是超值的，

因為攝影發燒友，手上所用的相機幾萬銀就一定架啦，求其買支鏡頭都一萬幾千，

單係求其找一支鏡頭前防 UV 的鏡片，都幾百一塊啦，所以一本印得咁精美的影集，這個價對他們來講，一點都唔貴。

唔係有錢買機，無錢晒相下嘛? 不如擔心下有無咁多心機做執相和排版好過啦。

錢，大把人有，附出心機和時間先係最難得，如果唔係對攝影有濃厚興趣和執著，那來咁大的動力?

F40今次帶了三枝鏡去日本，這輯相只用兩支定焦鏡來完成，分別是 24mm 和 135mm ，另一支 24-105mm 只作備用。

只用兩支鏡頭就可以完成整個旅程的作品，好一個 F40啊。

個人評價

與 Model 到日本拍攝是非常難得，不但雙方都可以把香港工作放下，

一方面，Model 的樣子，Set頭與化粧，至到擺 Pose的能力，都需要達到 F40 的要求，

當然， F40的個人品格或攝影質素，也是需要得到 Tiffie 的信任，你可以想像到 Tiffie 無可能係人都會跟對方去海外拍攝吧。

以上只有一項不適合的話，都不能成事。

我又夠想同高海靈去海外拍攝啦，人家會唔會理我先得架?

透過這影集裡的 Tiffie 表現，我非常明白點解 F40 在眾多 Model之中選擇 Tiffie 。

日本風格與樣子的 Tiffie ，非常配合到整個日本景物。

睇完這輯影集，使人好想去日本影相，這點 Tiffie 做得相當之好，整輯相當中我最喜歡多麼川的表現，

斜陽的角度，配合 Tiffie 的眼神與自然發自內心的笑容，加上不做作的 Pose。

以上種種都是吸引人之處，好難相信是一個出道只有一年的 Part Time Model 所能做到，

相信當時 F40 必定提供一個好舒服的氣氛，Tiffie 先可以做到咁自然。

好佩服F40能把今次的作品，除了計劃推出網頁版外，還印出有質素的影集，

由於成品真係幾好，我...........也正想把我自己過去的作品，都印出來做一個紀念。

F40憶述，在整個旅程裡，每天在回程的 JR車箱裡，

Tiffie 也累得熟睡，可見她每天都盡力地去完成每一個F40給她的主題。

事實上F40也大讚 Tiffie 的性格非常之好。

為了給 Tiffie 在旅程有一點細藝，而且可以透過 Tiffie 的攝影眼看日本，

聰明的 F40 ，安排了一部機仔給 Tiffie 跟身，讓她拍下她自己喜歡的日本景物。

以下是 Tiffie 的作品部份縮圖，影集內都有登出架。

請睇下面兩張圖

呢兩張相，並不是在印刷品內出現，只係和大家玩個遊戲吧。

考下你丫拿 ( 答中無獎 ) ~~~點解 F40用大機所影的淺景深相片，可以咁快在 Tiffie 的 iPhone 上見到呢?

提示 : 唔係 Wi-Fi SD Card 。 ^_^

: 全文完 :

答案 : F40用大機影完，取出記憶卡，透過 On The Go 線來連接 Samsung Note ，

得手後， Whatsapp 比用 iPhone 的 Tiffie 。 ^_^

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆ avbuzz.com精神，人人毒我，我毒人人 ◆

　謝謝收看這篇文章，你是第個收看這篇文章的讀者。