Magic pro ProMini 8000

發佈日期 : 2012年 10月26日    圖 / 文 : 巴斯

呢個盒的包裝邊個設計架，升職加人工啦，非常適合我呢類崇洋 ( 東洋 / 西洋 )人仕，

用來送禮，個盒唔靚，就唔係咁好囉。

這個盒上文字，有英文，有日文，係無中文，就算純銅呢兩隻字，我都只可以當佢係日語漢字咁睇法。

拿拿拿~~~包裝盒上用日文和英文寫，唔代表她的產地來源，以上係我個人咁睇法，並不代表 Magic Pro。

完全係我個人崇洋假像，唔理咁多，總之我覺得包裝靚就得啦。

上週有朋友生日，一時之間想不到送什麼，

剛巧有容量比 Pro Mini 4000 多一倍的  8000 推出，售價只係 $499 ，用來做生日禮物好實用，

尤其我的朋友是用電池容量 6944 mAh 的  iPad 2 ，再加 iPhone 4S，兩者都屬於唔容許有替換電的產品。

我都唔明，乜 Magic Pro 唔係捉到顧客心理喇咩，Pro Mini 4000 有五隻色選擇，白和粉紅萬能襯機色，係人都中架啦，

居然來到 8000，只得兩隻完全唔關事的灰色和銀色選擇，做乜事呀，點襯機呀? 拿拿臨追加返啦。

唉~~~第一志願係白色 ( 因壽星仔的機係白色 ) ，家陣無白色，我無奶油問壽星仔喜歡什麼顏色架，無奈就只好亂選銀色吧。

 我之所以選 Pro Mini 8000 係因為用過 Pro Mini 4000 ，覺得佢好安全又好用，靚仔就唔在講添啦。

最最最重要係 8000有雙輸出，而且係 2.1A +1A，即係同時可作為 3.1A輸出比兩部機打孖來充。

不如開盒睇睇先，把那個崇洋味極重紙盒包裝拿走後，就可以見到內裡有兩格擺放。

係人都見到右手邊係 Pro Mini 8000真身啦，咁左手邊呢 ? 

左手邊的格數內，有圖中所見索袋，

好明顯係用來裝 ProMini 8000 出街用。

跟機線

除了索袋外，還有圖中所見四條跟機線，

跟機有以下幾款常用插口，圖中左手邊黑色是屬於 Samsung Tablet  專用轉接頭。

而右圖所見紅色線，是今次 Pro Mini 8000 配角，一會再和大家介紹。

透過下圖左手邊 8000與右手邊 4000作比較，可大約猜想到實物大小。

由這個角度看的平面，兩者面積接近一樣。

因為 8000電能多足足一倍，體積又點可能會是一樣呢? 

所以在鋁合金外殼的體積方面，也比4000厚得多。

不過依然簫灑，這點也是我買來送給朋友的其中一個理由。

背面印有她資料，並解開她身世之謎。

今時今日，連 iPhone 5都是中國製做，一個流動充電器，會希望她是那裡製做呢? 

 Magic Pro 呢個牌子對我來講信得過，何況用了4000一段時間，更加有信心。

安全最重要

8000 mAh的能量可真不小，帶在身上一定要確保安全先得，否則跟帶一個氣油彈在身上沒有分別。

市場上大陸貨推出過萬 mAh 版本，我一向膽少，我就唔夠膽用喇，何況用來送禮? 

本身呢D產品又唔係好名貴，真係無謂用自己或其他人的生命安全來冒險，我真係唔想為了那一百幾十，成世唔安樂。

和 4000 設計一樣，電源開關是屬於輕觸式熱感設計，圖中所見呢個 4段容量的 LED 顯示屏，

她們每 25%一組，分別為 25% 50% 75%和 100%這四組。




開關時，用家用手指長按圖中所見開關，先可以開到機，

用雜物長按這個開關是無任何反應，一定要用手指長按這個位置 3 秒，方可開啓充電的電源。

就算開啟電源後，如果唔係真正充電，閒置超過 1 分鐘，她會自動關閉電源，非常安全。

查電量

我強調係查剩餘電量，我唔係想充電，我只係想八掛一下還有多少電在 8000 內裡吧，唔好叫我插上手機先知仲有幾多電咁煩。

平日用手指輕掃一下圖中的屏幕，留意是輕掃，其實可以叫做摸都得，總之唔需按厭，

顯示屏會立即顯示還有多小電能，顯示完會自動關上，實在是細心設計。

你話送呢類禮比人家，仲唔係提升自己在人家心目中的形像和地位 ? 

最起碼對方每次充電時，都會想起你掛。

一入二出

一入二出，其中一個屬於 2.1A / 5V 輸出，是她另一個賣點。

留意，一個流動充電器有 2.1A / 5V 輸出並唔係有什麼咁巴閉，其他產品都有，並不是她專有技術。

只不過咁大電流輸出，安全係好重要，過熱自己會停止運作，是我選擇她來送給朋友的另一個理由。

餵飽佢

右手邊是專門負責  2.1A / 5V 輸出，好似 Note或 平版電腦呢類容量大食器材，

  ( Note １ ) 2500mAh ●  ( Note II ) 3100mAh ● (  iPad 2 ) 6930 mAh / ● (  New  iPad  ) 11,666 mAh 

唔通仲用 1.A去慢慢充咩，返到屋企充都未充完都似 ，用 2.1A / 5V 就一定可以比用 1A / 5V 快好多咁就餵飽裝置。

圖中所見，Micro USB 接口就係用來餵飽 ProMini 8000 自己，而 USB 係用來餵飽裝其他置。

無  2.1A / 5V 輸出的充電器，會充得起 iPad ? 慢慢等下啦~~~~

輸入

講左咁耐輸出，大拿拿 8000 mAh ，你唔好話我知就咁用電腦的USB插口來打爆佢下嘛? 

要最快速度咁注滿呢個 8000 mAh ，唔該同樣係要用火牛，否則靠個電腦 USB 所提供的電能，充一日一夜我睇怕都充唔滿。

充之前了解隻牛係咪 1A / 5V ，好似以下呢隻咁。

如果用  iPad 或 Note II 跟機來的的  2.1A / 5V 同樣都可以用來充，

圖中可見 8000 背面有印上輸入為 1A / 5V ，基於安全理由，再多的輸入，也是限流的。並不會因為係 2.1A / 5V 而快充。

用純銅線配合 1A / 5V ，是我們所能做到最佳充電條件。

純銅線

在包裝盒上面提到跟機送呢條 Micro- USB充電線提升為純銅線材。

千萬不要誤會這是專用線，他只是一條純過電能，不會處理Data的純銅線材，

用家如果把這線接上電腦和手機之間，無錯手機會進入充電狀態，

但是電腦一方是沒法見到這部手機的存在，所以電腦和手機是無法互換資料。

所以這條線，是專門用來充電用線材。

純銅物料好處，就是比一般市面上導線，大大降低流失電流率。

用家如果不用這條線，用回普通線，一樣可把手機充滿電。

自Monster耳機帶領扁線潮流下，近年乜線都興用扁線，跟機附上這條線也不例外，而且用上搶眼紅色。

ProMini 8000的另一賣點，就是 2.1A / 5V 和 1A / 5V 同時使用，你睇，Note II 和 iPhone 一起充，你話開心唔開心 ? 

點解開心 ? 你比小小想像力好唔好? 一部係屬於男，另一部屬於女，咁你話浪唔浪漫先 ? 

Note II 大食，當然係比 2.1A / 5V佢啦，iPhone 相比起無咁大食， 1A / 5V 都食得好開心架喇。

這條純銅線長一米，方便用家把 Pro Mini 8000 放手袋或背包，容許手機在充電期間，可以有較長活動範圍。

題外話

留意 4S 和 Note II 屏幕，是來自同一張圖片的，你能見到兩部機，在膚色上的分別嗎? 

噢~~~真出事，有時真係唔好 AB 比較呀~~~ 

配 Dexim 浮跨線

正如 Li Lam 所講，帶埋 Dexim 浮跨線一起出街，充電都成為樂趣。

試想像一下，在昏暗燈光氣氛下的餐廳或戲院裡當眾拿出來充電，你話幾搶眼呢~~~

你睇靚到呢~~~~我講條線定 Li Lam ? 

當然係 Li Lam 啦，唔通你夠膽講條線靚過 Li Lam 呀?  

上面的硬照無法表達到 ProMini 8000 配合 Dexim 浮跨線一起使用時的靚法，

一定要睇 Video 先能感受到她獨有靚法。

提提你，呢個世界靚係要附出代價，不如你答我，Dexim 浮跨線的走馬燈，點解會發光丫拿，想到了吧。

不過 8000mAh咁大容量，消耗少少來得到靚，你自己計計是否值得啦。

    Video 

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。