發佈日期 : 2013年 7月2日 圖 / 文 : 巴斯
上星期經過 旺角聲耀全音，見到 Cambridge Audio 推出了 Minx Go 呢款藍芽無線喇叭， 個樣好流線，加上係最時尚的白色機身，容易入屋襯到家居擺設。 Minx Go 個名都話了給你知係可以帶走四圍去的喇叭。 無線喇叭好處也就是可以帶著她通屋走，浴室，廚房，客廳.............就算帶出街BBQ或去沙灘都方便。
發燒 ? 唔好玩啦，無線喎~~~無線同發燒係拉唔上關係的，唔係乜都要發燒先關注下化。 藍芽無線就係佢強項之一，用上 Cambridge 自家研發 DSP技術， 內部搭載 5個單體，包括兩個19 mm鈦金屬高音，兩個 50 mm低音單體， 主角當然係個後置輻射式低音。
輻射式低音 呢類座檯喇叭一街都係，一般低頻都不存在， Minx Go 除了樣子吸引我，第二項就係位於背面呢個輻射式低音。 無人講過她所產生出來的低頻會打心口，但最起碼有入得耳低頻出到。
背脊會震 透過下圖可大約猜想到輻射式低音實地使用時狀況。
座檯腳 看過以上動畫，相信對輻射式低音運動有一定了解，心水清的你一定即時想到咁震法，個喇叭豈不是會自己跳芭蕾舞 ? Minx Go 底部灰色面積，都是防滑物料，對防止喇叭移位有一定作用。 加上底部有隱藏式短腳，加強其隱定性。
正所謂力從地起，如果用家刻意把 Minx Go 擺放在玻璃或雲石這類光滑表面上， 當大音量輸出時， Minx Go 依然是會芭蕾舞上身。 把她放在不平滑表面上，就算如一本書上面，防滑物料是能發生效用。 何況玻璃表面，也不是一個使喇叭好聲的物料吧。
Minx Go 藍芽功能，最多可記憶配對 8組裝置。 藍芽喇叭其中一個好處，無論是喇叭或者訊源，同樣可進行聲量調節，非常方便。
隨身充電器 圖中所見背面USB插口，並不是代表有傳輸功能，她是給隨身裝置借用作充電用。 上面寫著 5V 500mA，哈~~~即係流動尿袋 ，充幾耐就.........嘿我估因為安完關係， 所以跟接電腦USB速度差不多，總好過無的。 當朋友手機能源訊號燈著左等救命的話，流動尿袋的出現，加分野來啊。 你想唔想好似佢咁先 ?
唔好講救命喇，顧惦自己先，餵飽內置鋰電池，可連續運作播放18小時。
AUX IN 上圖所見中間一個名為 MP3 的標準 3.5 mm接口，點解會叫 MP3 架 ? 唔該搵人通知間廠，改返佢做 AUX IN 。 明明係類比輸入，做乜寫 MP3 ? 咁寫的話，意思只係接駁到 MP3 ? 當然唔係啦，其中一個接法，用家可以用呢個 3.5 mm接口來接電腦，成為電腦喇叭，佔用一個功能。 另一方面，藍芽功能依然可以有效運作，即係當一早配對好的無線裝置發聲， 咁 Minx Go 就會佔用了本來屬於電腦的聲音， 到用家聽完藍芽，把裝置關閉，Minx Go 又會自動跳回有線接駁的電腦做訊源。
淡入淡出功能 藍芽功能手機接駁後，Minx Go 由於無咪的關係，不可以用來做免提，但播歌狀態來電淡入淡出功能當然係有啦。 只不過接電話用返個手機來聽，唔可以用喇叭發聲做到免提功能吧。 用家手機收線後，歌曲也會淡入歌曲，喇叭再次發聲。
個人評價 Minx Go 內置D類擴音機，箱體屬於密封式設計， 以一部 $2000港元有找的 Cambridge Audio 無線藍芽喇叭來講，效果不錯。 尤其咁靚仔，流線形設計，帶出去BBQ或沙灘享樂時做背景音樂，唔會失禮人嘛， 加上 Cambridge Audio呢個名，差極有個譜。
物理關係，無可能在一個咁薄身聲箱，低頻做到下下打心口效果， 但作為欣賞流行曲，背面的輻射式低音，對低頻效果有一定幫助。
在家聽首歌遮，唔需要下下皇帝位下化? 以方便為大前題，手機係一個不錯選擇，只不過喇叭唔夠聲吧，無線喇叭可幫到手， 連電腦都唔需開，就可以聽到歌，方便到極，又多一個唔開電腦的理由，嘩~~~~哈哈哈~~~
當然流動裝置，唔只聽歌可以靠佢，睇片都可靠佢發聲呢。
開箱圖
好喇，唔好淨聽我在這裡吠，咪人講你就信先得架。 自己親耳感受一下 Minx Go 效果，旺角聲耀全音，提供開放式陳列品任試任用。 記得帶埋自己熟識的歌曲去試呀~~~唔買都可以去八下掛，點都叫自己試過嘛。 放心，老闆好好人，唔買唔會面黑架。 聲耀全音 香港旺角西洋菜南街1A百寶利中心1405室
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
Video 
