Note 3  結局篇

發佈日期 : 2013年 10月5日    圖 / 文 : 巴斯

出機後幾日，收到呢一個訊息，有無咁利害~~部手機唔係幫佢買啊~~咁都知我換了4G手機? 

定係.......他們亂發相同訊息比客戶，只不過我自己對號入座呢?

明明用4G機，無奶油唔把月費計劃轉做4G的，雖然我明知 4G食電好多，但都想體驗一下，

況且  $50 ，算啦去玩下。何況現在有兩塊電在手，能源並不是問題。

就係咁我就在其中一間荃灣門市度出現了 ，丫~~~依家D科技真係先進，

門口職員問我手機號碼，她在 iPad篤幾下，我手機就即時收到以下呢個訊息，勁啊~~

再唔需要紙喇~~值得一讚。

 我輪候號碼係 B24，現在係 2:30 哈~~有埋預計時間 2:47，

咁即係起碼 17分鐘後，不如.....去隔離行下唱片店先。

我在唱片店不時 Click訊息上提供給我的Link，睇下叫到幾多號先，

真係幾方便，唔錯唔錯。

原來一年內無換過Card的話，是無需付$50，我的確係無換過，所以今次3G轉4G是免費的。

好喇，4G都升級埋喇，部Note 2都係時候放售了。

去邊度放好呢? 先達 ? 你無野下嘛，先達咁多武林高手駐場，掃地個嬸嬸都有資格坐館啦，

我拿住部換過Mon的整容機，骨都比佢地化埋都似，唔好喇，我都係去D商場仔碰下運氣。

其實收得機，商場鋪仔又好，街邊檔又好，收機的人都唔會係低B仔，*#0*# 工程模式照妖鏡一定無走雞，

比佢找到小小缺點就無限放大再放大，目的只有一個，就係壓價。

我出門口前睇過我部機無事，只擔心比人一眼睇出換過大銀幕吧，

非常好彩，這家店的坐館睇唔到呢個問題，只係睇到我唔用Mon貼，

但佢睇到個封條被拆過，問我部機換過D乜，

我話唔知，我是二手買返來，他說如果無被人換過內藏，就收我$2500，

於是佢得到我同意下拆機驗。

當時我心情同比左張打劫字條比銀行職員等收錢心情一樣，

好驚呀~佢會否因為咁而見到個Mon換過?

幾分鐘之後，我拿著 $2500 奪門而出。

心裡想著.........

　嘩~~~Note2今日都只係收 $2500，如果他日放售仲傷啊，

還要扣除 $800整容費，實收.......唔好提了.......... 

所以放機真係要狠，否則他日壞機又或者唔值錢先來放售，就慘喇。

個人感受

Note 3 雖然加入好似好多功能，但其實用性並不大，也有一些功能本來都有，只不過簡化後再推出，

你唔好講比我知係因為 4K拍片和支援 24Bit 192kHz 啊，

呢個咁有要求的格式，並不會和手機掛勾的。

在耳機先天輸出不足的平台下，點可能對 24Bit 192kHz 表現好，

況且呢類格式的歌曲，根本唔大眾化，

　我相信大家係聽歌，唔係聽格式吧。

外觀方面，有很多人話Note3 似大陸機，但我由頭到尾無呢個感覺，

只不過覺得四隻角再方形一點就好睇好多，不過現在也可接受，最起碼無咁圓，手掌可握得貼一點。

無可否認，配合S Pen的使用，Note3始終是最適合我個人使用的智能手機，沒有第二部比她更適合我用，

她差不多係為我度身訂做一樣，最起碼我不能接受用尿袋，她都能迎合我的需要。

我成日用的相簿都改進了外觀，使用上更方便而且好看，

最重要係可以預覽到 Dropbox 圖片，而且係全屏顯示，對我轉發出去是很實用的功能。

另外，分割Mon都係Note3的一個強項，雖然Whatsapp  和 WeChat都支援，

但我用得最多的LINE又無囉。

Note3依然不可以把相機模式靜音，當然一刀切把手機靜音當然可以，

但每次在公眾地方影相都要按全機靜音，影完又要記得開返聲，好麻煩。

幸好有其他相機 app有Shutter靜音功能，360呢個相機 app係其中一款解決呢個問題。

非常多謝各位收看一連四集的Note3介紹，

以一篇手機分享寫四集真係有點過份........　

  Video 

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。