|
力從電起 發佈日期 : 2013年 11月28日 圖 / 文 : 巴斯
RX10 採用 NEX 相同的 NP-FW50 電池，對我這個前 NEX- 6 與 NEX- 7 用家來講，累積所得電池使自己過檔帶來方便。 新舊愛，正副厰，加埋合共四粒，那份安全感，是前所未有的。 在 RX10 身上每粒電池，根據說明書所提到， 如用LCD 屏幕可大約拍攝 420張照片，如果用觀景窗仲快無電添，340張就玩完。
拿!!!!唔好盡信，因為實際上那個電 Zoom係一開機就在動，或多或少也在消耗能源。 如果用家好似我咁敗家，不時開相片來睇，得閒又過幾張相去流動裝置取用，得閒又拿出來搞下設定， 睇下相又睇下所拍過影片，你話仲有無可能拍到 咁多張照片丫拿? 旅痕期間我唔係喪影，每日大約 900-1000 張相片上下，兩粒電夠晒用，何況我有四粒在手任意揮霍。
副厰電 留意副厰電體積比原厰電粗了大約一條頭髮絲，強行迫入RX10電倉， 是非常難取出，更可能再冇法取出，這點要留意。 就以圖中所見副廠電為例，只能入到呢個位置，如果再大力度推入，我害怕她被迫死在電倉中，無法彈出，咁就大件事了。 所以我只推到呢個位置，再不夠膽迫入。
而百老匯跟機送的副厰電很緊，是剛剛推得入電倉內，並正常運作。 但想彈返粒電出來就做唔到了，幸好圖中所見有個空位，容許用家用工具借力起返個電池出來。 由於該電池只是不太順，而不是被強行迫入，所以用工具是可以幫助取出。
電倉設計 RX10電倉設計，透過圖中可見底部是有彈弓，當用家把藍色保險鎖打開， 電池就會被彈弓彈射出一節來，用家好容易把電池取走。
圖為當藍色保險鎖打開，原廠電池就會被彈弓彈出一節來，很容易把電池取走。 副廠電因為是被迫入電倉內，所以彈弓唔夠力彈出電池，用家就無法把電池取出。
介刀刮 解決方法是磨細副厰電 兩條邊，使副厰電邊位變窄，咁就可以使副厰電順利滑落電倉內。 可用介刀或沙紙來完成有關動作。 用介刀刮邊後完成品，是如圖所見樣子。
沙紙推 工具二，是使用粗沙紙推大約十多次， 直到能滑落電倉，成功代價是副厰電外觀花。
磨邊前
磨邊後
免責聲明 你知依家的人有幾惡啦，我一定要講以下內容，敬請見諒。 話得説回來，以上只是講述我用一個低能的DIY方法解決有關問題，絕不是官方提供方法， 咁做法有可能對電池和相機做成極大傷害，我自己絕對唔建議任何人去做上述改動， 因為輕則燒機，重則爆炸，我自己咁做，只係我個人問題，其他人看後得啖笑吧。 使用原厰電是最佳解決方法，原廠電池每粒只是港幣 $450 ，買兩粒也只係 $1000有找， 唔係有錢買機，冇錢買電下化 ?
雙邊投注 旅痕期間，如果得一部充電器，首先要等第一粒充完，先可以放入第二粒接著充電， 然後自己先瞓得，否則第二天唔夠電用典算 ? RX10提供機身 USB充電，根本就無需要充電器幫手充，正所謂求人不如求己，自食其力。 但原廠所提供的火牛超慢，根本無法忍受。 根據說明書上面所提到，充滿需時五個多小時。
咁當然唔會用跟機來的廢柴火牛啦，改用iPad好力火牛，再配合純銅淨充電線，好快充滿力量。 相機又充，充電器又充，實行雙邊投注，咁就可以安心睡覺，早上一起身，人和電池都充滿力量喇~~~
RX10 沒有跟機送 NP-FW50 電池充電器，用家要充電池，要額外購買電池充電器。 我個人喜歡日版，點解 ? 睇下圖就明架喇。
都唔明 ? 咁勞煩重溫以下呢篇文章丫~~~ http://www.avbuzz.com/audio-video/201206/nex-7eb/0.htm
免責聲明 你知依家的人有幾惡啦，我一定要講以下內容，敬請見諒。 話得説回來，以上只是講述我用一個低能方法解決有關問題，絕不是官方提供方法， 咁做法有可能對電池和相機做成極大傷害，我自己絕對唔建議任何人去做上述改動， 冇任何官方提意用家用 iPad火牛或 5V 2.1A火牛充
RX10電，我自己更加唔建議任何人咁做，
使用原厰充電器是最佳解決方法，原廠充電器，每個只是港幣 $390 ， 買兩個打孖充也只不過係 $800，仲有 $20找，唔係有錢買機，冇錢買充電器下化 ?
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
