求戀期 Sony ZX-1

發佈日期 : 2014年 4 月1日  圖  :  雷霆救兵  /  巴斯   / 文 : 巴斯

等到喇~~~~等到喇~~~~呢日對雷霆救兵來講好重要，落訂多時的 Sony ZX-1，今日終於等到店鋪來電通知取機。

入店鋪前要影返張紀念相先得，入到鋪，認單唔認人，一手交錢，一手交貨。

苦等多時，最慘係呢段期間見到街鋪有售，

但自己一早訂了，見水唔飲得的心情，真係唔知可以同邊個講，不過今日終於可以拿佢返屋企，屍伏晒 ^^ 

打開驗下貨先，機身好靚仔丫，尤其左下角 Hi-Res Audio 徽號。

之但係...........原來咁靚的一個徽號，只不過係貼紙來架炸，日後會自動脫落的，唔係化?

喂~~~店員去左邊，點解叫人驗機，自己走左去? 返來呀~~

趕時間啊~~~

啊~~太好了，原來店員襯 雷霆救兵 驗機期間，爭取時間去找保護貼，

在眾多保護貼之中，找到呢塊合適。

我覺得識得貼保護貼的人好叻架，就正如好似女生們覺得男生識換燈膽好Man一樣。

我覺得應該把貼保護貼，列為非物質文化為遺產囉。^^

店員真係叻，找來的副廠保護貼，好 Fit  ZX1的邊位，而又剛剛好唔需要撕走個 Hi-Res Audio 徽號。

比十個讚你呀，不過相信個徽號都應該過幾日用用下會脫落。

尾數找完，機又驗過，連保護貼都貼好，係時候離開吧，

丫~~~~臨走時都要舉機影多張紀念相，真係服左你。

靜靜話你知丫，上次來這裡，因為買不到現貨，唯有接受落訂，

由於不想空手而回，於是即時購入 Sennheiser IE80 作為填補空虛心靈。

由當日開始為這對耳機 Run In，煲好了的這對耳機，這日即時得到回報喇。

其實個盒裡面有什麼東東呢?

以下時間去看個究竟。

盒內有盒，內盒都唔失禮，透過盒背可以見到這機容量為 128GB，

仲有 Wi-Fi ，藍芽，NFC........乜乜物物咁囉。

保用証和其他無用的東西，都可以在盒內找到。

打開內盒的蓋後，就可以見到 ZX-1真身了。

把面層放機的一層取走，可見到下層有另一層存在。

這是一個長盒，盒裡所擺放，主要是葵花寶典和玉女心經。

再把這一層移走後，可見到最底部一層。

而 USB 線也在這層找到，天啊呢層是最底層，係咁多喇~~~~火牛呢? 

五千幾買部機，唔係火牛都無下化? 耳機唔跟都算喇，火牛都無 ? 

呢條 USB 線，接上 ZX-1方向，並不是我們平日見慣接口，而是 Sony 自家設計，無論係充電，又或者傳輸資料到電腦，都要靠呢條專用線。

天啊，如果 雷霆救兵 想公司與屋企都有這條線，即係要多買一條線吧，好明顯腦場幫唔到手吧，

而百老匯話佢都無，唯有去旺角或者銅鑼灣呢兩間 Sony Style 先有現貨發售。

這條線，究竟幾錢可以買到呢?

咁係咪唔買丫，有權唔買架喎，咪係囉，最終咪鬧住，仲要親身去買囉。

嘩~~~~乜咁多人等維修，好彩係來買野，唔係維修，否則又等就慘喇。

哈~~~~

原來咁樣行入去買呢條 USB線，係納入與維修的人一起等，

買野有幾巴閉呀，襟飛仔先啦唔該。 ( 買野喎~~~~ )

等了約 10分鐘就輪到了，付款 $80即取 USB線。

就係咁，雷霆救兵一條線放公司，另一條線放屋企，咁就可以兩邊都補給到能源了。

跟機還有一個機套，嘿~~~~~個機套紙札咁款，喂~~~真係 99.9% 像紙札的，你話七月十四跌響街，分分鐘嚇死人，

附件仲有件墊片，吸塵吸得好非害。

好喇，箱裡面係咁多喇。

究竟雷霆救兵滿唔滿意 Sony ZX-1的效果呢? 

待續............

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。