Public Enemy

§§小強新聞組 網頁版 §§ 小強新聞組 新聞組版§§

韓版三區Public Enemy (暫譯 :人民公敵)

By Andy Carlo

日期 : 2002年5月25日

近期又多左韓國片在港公映, 但係可能野蠻女友同我老婆係大佬收得,

上得戲院既全部都係笑片. 其實韓國拍得最多既係melodrama.

今次介紹既人民公敵, 其實係好難分類既戲. 套戲三月先係韓國上畫,

五月就有DVD, 套戲又係直至目前韓國今年既賣座亞軍,都算犀利.

故事係關於一個警探追查一個變態殺手.

講到呢到你可能會諗套戲大概會好似Seven或沉默的羔羊個類鬥智片(起初我都係咁諗).

咁就錯啦, 講都唔信, 呢部係有少少黑色喜劇feel既劇情片. 全片長138分鐘,頭個一粒鐘真係耐力大比拼,

唔係戲裡面D角色, 係觀眾同套戲既耐力比拼.導演用左成粒鐘描寫殺手同警探既性格同背景,

因為戲裡面無個好人(包括主角警探), 所以好難討好觀眾.

所以真係如果你忍到頭一粒鐘, 直至警探同殺手頭一次碰頭開始,

套戲就突然醒晒. 本來想同大家講多D個劇情, 但係講落去實會穿橋,所以唯有停筆.

但係奉勸一句等大家有心理準備, 如果想睇警賊鬥智,呢套戲無(個警探係非常衝動兼火爆, 有時仲打橫黎),

如果想睇打餐死動作場面,呢套無乜(有幾場警探既爛仔架都算ok, 但係數埋五隻手指都無),

加上有部份殺人場面非常真實(用刀狂插), 同埋D角色(由其主角)有太多黑暗面,一定唔係個個喜歡.

如果想睇下另類韓片就絕對推介.

畫質方面, 係2.35:1 anamorphic. 畫面比較粗糙, 有幾多noise,同韓版我老婆係大佬dvd個畫質差唔多,

但係顏色較為實淨.雖然套戲咁新但係個菲林copy都有D白點, 點解佢地唔搵個新D呢.

總括來講都okay, 放大都唔會有曚既效果.

聲效方面有韓文5.1 同2.0揀, 套戲仲有英文同韓文字幕. 個5.1音效唔錯,

開場警察訓練時既鎗聲非常清脆, 之後部戲既配樂都好勁.其他動作場面(雖然少)既效果都唔差. 非常滿意.

Special features方面, 由於本片係2 dvd set,所以大部份extras都係o係第二隻碟度.

Disc 1

係dvd9,extras只有演員同導演資料, 演員個part仲有interview. disc 2係dvd5,

影像extras方面 : 收錄左40分鐘making of, 4條deleted scene, 大量NG片段, Music video

本片trailer同另外三部快將推出既韓片trailer

(有快樂到死女主角全度研新作No Blood No Tears, 特技格鬥片火山高同笑片funny movies),

最特別係收錄左導演之前四部作品既片段, 每部戲5分鐘. 文字extra有production

notes同story line. 當然全部extras都係韓文無中英文字幕啦.

套戲我幾鐘意, 個警探角色寫得好好, 個演員演技唔錯. 不過頭一個鐘真係難頂,

所以略為扣分. 相信呢部戲不久將來都會o係香港上(應該會三級,或者二B剪少少), 如果大家想先睇為快,

就有買快手(聽聞阿Joe哥呢隻尚餘少量存貨炸)

推介度: 3 out of 5.

§§小強新聞組 網頁版 §§ 小強新聞組 新聞組版§§