網頁版【巴斯主網頁 Review 33 小強新聞組 Tower3A討論區 麥嘜討論區 阿柒新聞組】

新聞組版【阿柒新聞組 小強新聞組 巴斯新聞天地 KC Lau軟件DVD新聞組】

修羅雪姬

By Andy Carlo

日期 : 2002年7月9日

自從o係今年香港國際電影節欣賞過日本片"修羅雪姬"之後,一直期待佢既DVD推出.

令人期待既原因除o左"修羅雪姬"本身既魅力(漫畫大師小池一夫既故事+水著女星釋由美子既演出),

最大既因素係甄子丹既動作設計.

個人認為甄子丹既動作設計o係香港算係數一數二,

如果你有睇過佢導演既處女作"戰狼傳說", 一定同意以上講法.

"戰"片既動作設計充分活用拍攝環境既地形(片中是以叢林為背景),

配合甄子丹拳拳到肉既技擊, 拍出以一打百既刺激感.

"修羅雪姬"某程度上同"戰狼傳說"既動作設計非常類似,

但加入左武士刀既技擊招式, 同樣非常刺激有型. 連第一次拍戲,

平時淨係擺下性感pose既由美子都拍到真係好似好好打咁.

當然除左動作之後故事都好重要. 若果相對舊版既"修羅雪姬", 新既就較為失色.

故事講500年後既日本, 政府瓦解, 人民失去希望, 官員互相勾結,

更利用暗殺組織剷除異己. 雪姬所屬既殺手組織原本係日本其中一個城國,

但後來因為雪姬既父母, 即係城主同城主夫人, 去世既關係而淪落至暗殺組織.

其後雪姬知道母親原來被殺手組織既頭頭空暇所殺, 但係行刺失敗,於是展開逃亡.

逃亡時遇上革命黨員-隆, 被隆既關懷同理念所感動,漸漸過回常人生活.

但好景不常, 隆被革命黨高層利用,而空暇亦找到雪姬..........................

可能甄子丹D動作實在太出色, 可能個故仔又無乜特別,

一無動作場面既時候就有D悶, 中段更無任何打鬥.

好彩男女主角釋由美子同伊藤英明既表現都擦出到火花, 令人睇得好舒服.

令到結尾仲有少少傷感添. 電影節我睇既兩部日本片(另一部係殺手阿一),

修羅雪姬算較為出色了. 不過唔知點解香港無片商買, 連美國都就黎上映,

香港片商真係唔識貨, 淨係入D精子女鬼.DVD畫質方面, 一百分無得頂.

呢隻係我既第二隻買既日本版故事片DVD(另外一套係Samurai Fiction,其他D日版都係水著, concert),

畫質可以話係最好. 拍到D人物皮光肉滑,

叢林D景又層次分明, 唔會有noise. 畫面比例係1.85:1, 有對應anamorphic.

唔怪之得真係睇過日版碟, D美版一區都要行埋一便.

由美子性感的一面

由美子動的一面

聲效方面只得DD 5.1, 但係都非常出色. 幾場動作場面D音效唔錯,好似頭段眾殺手行刺政要,

有一幕個保鑣開鎗, D子彈好似向住觀眾射一樣.

仲有各場打鬥D刀劍聲都非常清脆, 唔錯.不過最大問題係全片並無任何字幕support,

所以唔識日文可能會少少唔明.

Special Features方面, 碟一有預告片同導演監制既日語commentary.

仲有可以好似Matrix DVD咁按下右下角圖案, 切換至特技製作特輯既互動功能.

碟二則收錄長達126分鐘既影像特典. 全程日語對白無字幕,除左所有有甄子丹參與既部份.

所以全部特典最親切既就係Donnie評述佢設計既動作場面, 總共成25分鐘,

Donnie全程英語對答, 非常流利. o係訪問集裡面都有Donnie既訪問仲成十分鐘長,

當然Donnie亦都係英語回答, 其他訪問片段仲有男女主角, 導演同特技設計.

其他special features有10分鐘deleted scene, 可選導演及特技設計師評述;

6分鐘NG鏡頭; 亦都可以選導演同特效設計師評述既製作日記.

最後碟一互動功能看到既特技製作特輯, 碟二亦全部收錄, 仲可選擇設計師旁白.

總括來講, 我非常滿意全碟, 最大Bonus係甄子丹用英文參與Special Features,

本來諗住唔多明既碟二, 突然變成最有收藏價值. 雖然全片無任何字幕,但係睇畫面都可大意明個故仔.

鐘意刀劍片既朋友必睇.

推薦度:4.5 out of 5

( 觀看其他 Andy Carlo 的影評 )

網頁版【巴斯主網頁 Review 33 小強新聞組 Tower3A討論區 麥嘜討論區 阿柒新聞組】

新聞組版【阿柒新聞組 小強新聞組 巴斯新聞天地 KC Lau軟件DVD新聞組】