野獸之瞳

野獸之瞳

By Andy Carlo

日期 : 2002年7月15日

睇到架上面放左呢隻買左成年都未睇既DVD, 難得興之所致,加上想睇古天樂既演出,

於是放入DVD機欣賞. 呢隻碟係中國醒中期既出品,但係已經為日後高水準既質素打好基礎.

大家千祈唔好俾封面o危左,雖然寫住LetterBox, 其實隻碟係有anamorphic. 音效有DTS同5.1選擇.

特別收錄方面仲有Trailer同五分鐘既製作特輯. 咁豐富既內容當然要用DVD9單面雙層先夠裝. 價

錢仲要俾依家既出品平, 記得我一年前買全新都係$45, 一年後既今日可能已經列入$100/三隻既貨仔.

故事係講吳彥祖飾演既沖, 一日接到佢"異卵雙生"既哥哥古天樂既死訊. 可能係雙生兒既關係,

可能係因為哥哥自小離家出走, 沖決意了解哥哥既死因,

過程中認識到哥哥既女友谷祖琳同哥哥打黑市拳既經理人譚耀文.

導演梁柏堅秉承佢師父吳宇森, 將成套戲都拍得非常風格化, 從角色造型, 場景設計, 美術等,

都算係港產片中講究既一部. 講故事既技巧亦都唔錯,

正如譚耀文戲中所講古天樂既角色係一個人物, 回憶同現在互相交替,

慢慢將你代入古天樂謎一樣既傳奇中. 演員表現更加滿分, 譚耀文好戲唔在講,

古天樂演來亦充滿野獸既感覺, 唔係打打殺殺, 就同異性交配, 非常切合角色.

連吳彥祖平時呆呆既都難得演出感情. 最緊要三個男主角都非常有型,

特別古天樂打拳既pose真係唔打得都睇得. 或者D男角太搶太型, 女角方面較為失色.

新人谷祖琳亦都發揮唔出個種令到野獸古天樂一見鐘情既野性同令佢死心塌地既魅力.

既然故事以黑市拳為背景, 動作場面當然唔少得. 本片既拳賽亦都拍到個種血脈沸騰既感覺,

尤其安排古天樂/吳彥祖呢D都唔係好大隻既演員挑戰D高佢地成個頭既職業搏擊手, 真係非常刺激.

尤其古天樂戰個韓國仔個場,戴著鐵拳套拳拳到肉咁打, 打到血花四飛. 唯一缺點係部戲拖得有D長,

同埋個結尾累贅左D. 但總括來講, 可以話係舊年港產片其中一部佳作.

雖然本片唔係依家美亞同中國星聯手出品, 但係質素同樣無變.

Anamorphic1.85:1既畫面非常清晰. 套戲場景大多數都係夜晚同陰森既地方,

但係D黑位都非常實淨, 唔會有好多pixel. 其中有一場拳賽, 個拳手慢慢係黑位現身,

面部輪廓同黑位都層次分明. 個copy亦都算幾新幾乾淨, 唔會有好多白點同花痕.

唯一較差始終係D特技鏡頭, 一有呢D戲就畫面較曚, 較散. 不過呢D係香港做特技既先天缺陷, 無得救.

音效方面都唔差, 5.1聲軋可以測環繞聲既位無乜, 但係幾場拳D中拳聲, 澎澎聲都非常有勁, 低音方面唔錯.

對白位亦非常清楚. 亦無出現港產片5.1常有既回音現象. 算係港產碟做得唔錯既音效.

特別收錄有果時戲院上畫o係大堂播既製作特輯, 約五分鐘, 有演員/導演/監製既訪問, 同少少幕後花絮,

不過五分鐘旨在宣傳居多, 唔夠深入. 仲有本片預告片.

港產片來講算多special features啦.

如果喜歡睇演技發揮, 本片會係唔錯既選擇, 淨係睇阿譚耀文由意氣風發到爛泥既演技轉變,

已經值回票價. 加埋dvd碟既質素唔差, 價錢唔貴, 套戲又okay. 真係唔能夠唔推薦一下.

抵買度: 4 out of 5