Ocean's11碟評

Ocean's 11【盜海豪情】

By Andy Carlo

日期: 2002年6月10日

George Cloony, Brad Pitt, Julia Roberts, Matt Damon淨係呢4個演員既片酬加起上黎都成五千萬美金.

再加埋Traffic, Erin Borckovich同Out Of Sight既金像獎導演 Steven Soderberg,

淨係睇明星盜海豪情點計都係一定要睇. 但係一定要睇未必等於好睇.

成套戲拍到非常之有型, George Cloony, Brad Pitt同Andy Garcia加埋佢地著個件西裝真係型到...

導演既技巧又出神入化, 又分鏡, 又跳接, 有時又玩下倒敍,鏡頭又拍到D演員有咁型得咁型.

但成套戲係就只得個型字. 劇情講George Gloony計劃一晚內打劫Andy Garcia既3間賭場,

於是班馬組軍湊夠十一人,但係George背後有D不可告人既秘密. 劇情其實好簡單,

主要觀眾都係想睇各個大明星大鬥演技, 但係各大明星既對手戲非常有限.

只係得George同Brad既對手戲最多, 其他既都係一場起兩場止.阿茱姐仲全套戲只係出左10分鐘左右.

連非常搶戲既Don Cheadle(即係Traffic裡面個黑人FBI) 都無乜戲做. 笑料有D, 但唔係狂笑個隻.

食腦橋都有, 但有D比較天馬行空. 演員非常有型, 但無乜戲做.

(成編野我諗出得最多就係個"型"字)

畫質方面, 唔知點解近期華納D新片, 好似A.I., Harry Potter, 同今次Ocean's11,

個畫面都比以前華納既碟粗糙. 又唔係話好似美亞舊時個D咁差,

但係就唔似同係華納出既Matrix或者Wide Wide West等示範級碟咁滑咁smooth.

講返呢隻碟本身就係2.35:1 anamorphic, 除左畫面粗左D, 其他既只係okay,

好似有幾個shot 拍拉斯維加斯D五光十色既景色, D顏色都唔係好sharp.我就唔係好滿意.

音質方面, 有DD5.1同2.0, 又係無乜表現機會. 套戲九成都係對白,對白表現非常清晰,

唔睇字幕都明白D演員講乜. 唯一問題係D中文字幕,

我知道香港既市場係好細, D廠商唔會專登為我地造一條香港地道既中文字幕.但係都唔好咁離譜,

今次D中文字幕我完全唔知佢講乜, 小弟自問中文成績唔差,

但係本片既字幕文法上同香港既語法都有幾大出入. 譯得唔係好直接.我唔睇中文字幕仲明多D個劇情. 扣分.

特別收錄方面有兩個making of, 各約十五分鐘, 有中文字幕.

最精彩當然係收錄左兩條評述commentary track啦. 一條有導演同編劇既評述,

另一條有Brad Pitt, Matt Damon同Andy Garcia,

聽過Brad Pitt o係Fight Club同Seven既commentary都知道佢講commentary都唔差, 又風趣,

又有好多拍戲時既小故事講. 今次都唔例外, 三個演員非常casual, 有講有笑,

非常開心. 最後有3條本片既Trailers.

總括來講, Ocean's 11得個型字, 如果各位想型下不妨租黎睇下,

買就除非你好鐘意睇本片既明星,因為都係百零蚊就可以日對夜對十一個非常有型既明星.

即係每個明星都係..........You do the math.

有型指數: 爆燈

抵買指數: 2.5 out of 5