aa3.gif){kind=small}
Review 33 小強新聞組 Tower3A討論區 麥嘜討論區 阿柒新聞組 RLII的討論區】網頁版【巴斯主網頁 Review 33 小強新聞組 Tower3A討論區 麥嘜討論區 阿柒新聞組 RLII的討論區】
新聞組版【阿柒新聞組
小強新聞組
巴斯新聞天地
KC Lau軟件DVD新聞組】
一區珍珠港導演版
By Andy Carlo
日期 : 2002年7月22日
記得當初o係戲院睇完套戲, 覺得"嘩"D空襲場面真係好正, 但係套戲D劇情篇排好似唔多掂,
條愛情線撐唔起套戲, 令部戲頭輕尾重. 不過無論如何當佢出碟一定買,
因為果段空襲必定會成為日後試機場面, 正如Private Ryan頭一場一樣. 等左成年,
終於買到呢隻期待以久既四碟珍藏版. 導演版同戲院版既最大分別係D戰爭場面會血腥D,
係戲院睇時會有個疑問, D人比成40mm既機鎗子彈射, 點解無血既.
呢次導演版就係空襲果場補返呢D流血斷肢鏡頭. 其實呢D鏡頭加埋都不過分零鐘,
對部戲無乜影響, 只係令戰爭場面較真實同恐怖. 其餘同戲院版既分別係加左幾下"FUCK,FUCK"聲,
同艾力寶雲飾演既Doolittle同隊raiders既一場o係出發敢死任務前既對話.
最悶同婆媽既愛情戲基本上完封不動, 導演Micheal Bay o係commentary話有剪到少少, 但我就唔多覺.
以導演版同之前出既雙碟版既最大分別係收錄既Special Features, D特別收錄多到要用四隻碟去裝,
都可以話係有DVD以來, 一部戲用最多dvd碟收錄既record
(不過呢個紀錄今年十一月就會俾魔戒導演特別版用五隻碟打破).
廢話講完就講返隻碟, 如果唔係聽日都打唔完, 成四隻碟.
●●●●●●●●●●●●●●●●●●●●●●●●●●●●●●●●●●●●●●●●
畫質
珍珠港導演版成184分鐘, 由於片長關係, 成部戲要用兩隻碟收錄. 碟一以空襲後羅斯褔向日本宣戰完結,
長約135分鐘. 碟二就收埋其餘既50分鐘.
畫質可以講必定係dvd碟既示範級, 2:35:1既畫面比例加上anamorphic既處理,
完全將戲院既感受帶返屋企. 首先隻碟收既品質係THX approved既,
雖然THX approved未必一定好(大家記得美版HighLander第一版DVD嗎),
但係今次真無得頂, 確係醒. 部戲既顏色非常之實, 係戲入面唔同色調既鏡頭下, 每種顏色都非常實在,
唔會有soft既情況出現. 大家都知畫質既三大敵人, 煙, 霧, 雨點, 呢三樣野最易睇到畫質高低,
尤其雨景, 差既話畫面會起格仔. 珍珠港三樣都有齊. 但係表現一樣出色. 單睇空襲果場, D濃煙升起,
黑色夠晒黑, 仲要有層次. 真係我睇過咁多碟中, 表現最特出既. 加上全碟既noise同微粒甚少,
除左有幾場起既打燈同場景關係, D noise同微粒較明顯, 好似羅斯褔總統同官員開會個場ch32,
外面D陽光射入間房, D微粒特別明顯, 同埋呢場既畫面亦都較soft.
另一場Doolittle同兩男主角o係戰艦甲板對話既場面ch35, 可以睇到人物邊有D edge enhanced多左D,
奇怪兩場都係o係disc2. 其餘既時候真係藍天碧海, 濃煙四起, 微黃暖和, 樣樣都非常對板.
呢隻可以話係我睇過過千隻碟, 其中一隻最靚畫面之一.
●●●●●●●●●●●●●●●●●●●●●●●●●●●●●●●●●●●●●●●●
聲效
美版一區收錄既聲效有英文5.1, 英文DTS, 法文5.1, 同埋一條為dolby headphone而設既stereo聲軋.
一如所料DVD既音效同畫質一樣都係示範既級數. 由於器材關係, 只可測試5.1聲軋.
條5.1聲軋係文戲既時候雖然surround無乜表現機會, 但係已經非常出色. 對白既表現非常清晰,
比起其他5.1既碟個音揚特闊. 文戲已經唔錯, 到動作場面更加一絕.
五條聲軋加埋subwoofer既活動幾乎未停過. D飛機聲爆炸聲此起彼落.
其中咁多場戰爭場面最精彩既都係日軍襲擊機場個幕, 零式戰機D機場打落機場地面個D"咚咚聲"特別出色,
比大爆炸時更test到subwoofer既力. 特別為headphone而設既stereo track亦同用耳筒聽5.1有D分別.
Stereo track配合stereo耳筒個音域比5.1廣, 環繞既效果更加明顯.
呢隻碟o係音效方面真係無十分都有九分.
●●●●●●●●●●●●●●●●●●●●●●●●●●●●●●●●●●●●●●●●
特別收錄
當然用得四隻碟去裝, D special features亦有番咁上下. 特別收錄主要分佈係第二,三四碟度.
首先由第一隻碟講起. 碟一碟二係收錄左主片上下半部.
而成套戲總共可以選擇三條評述聲軋commentary去一路聽一路睇.
commentary 1係導演Micheal Bay同歷史學家既評述, 第二條係監製Jerry Bruckheimer,
兩個男主角同飾演Doolittle既艾力寶雲一齊講既, 第三條有攝影師, 美術,
服裝同配樂一齊講既比較technical D既評述. 由於時間關係只係聽左第二條commentary同第一條既少少.
可以咁講第二條既娛樂性比較高. 一方面有監製講解拍攝期間既各種困難同經過,
又有艾力寶雲以演員角度解釋一下佢以演員觀點點睇部戲同佢為角色既準備,
有時仲講下歷史同部戲既分別. 但講到最有娛樂效果都係Ben Affleck同JoshHartnett既表現.
佢地兩個大部份時間都係度講笑, 又同其他角色配音又嘲笑戲中佢地既角色係基既,
又講下係片場上既笑話. 非常有趣, 有時仲好睇過部戲, 值得一聽. 對比呢條主要由演員既評述,
導演既就較為平淡同悶啦.
講完碟一就到碟二, 碟二除左有電影下半部,
仲收錄左主題曲MTV,
國家地理雜誌製作既珍珠港電影特輯既預告, 同埋套戲本身既製作特輯, 長約47分鐘.
其本上碟二收錄既同上次美版一區雙碟版係一樣既.
真正新製作既o係晒碟三同四度. 碟三o係menu將特別收錄分為兩部份, 分別係Film同History.
故名思意, Film係主要有關部戲既製作準備, History就講成個珍珠港事件歷史多D. Film既收錄有製作日記,
當中有十段小製作花絮, 總長一個鐘左右,主要focus係電影既特技方面. 其中七段仲可以揀導演評述.
其他Film既收錄仲有一段用超八米厘拍既影片, 主要拍黎俾戲裡片當歷史片段.
但o係Film入面最有趣都算係名為Boot Camp既特輯. 當中有兩段片,
一段有關D主角演員拍攝前參加軍事集訓, 即係好似Tigerland或者Full Metal Jacket果種地獄訓練營.
睇到Ben Affleck做英雄時咁有型, 但係現實連爬繩都爬唔到, 做掌上壓又求其到暈, 真係好笑.
另一段係艾力寶雲參加軍官訓練營既片, 雖然無之前果段咁辛苦, 但係都好有趣.
最後Film既收錄有本片預告片兩條. History就收錄左兩段關於珍珠港歷史既紀錄片,
分別係Unsang Heroes Of Peral Harbour同One Hour Over Tokyo, 分別各四十五分鐘.
最後仲有一段由當時真正既護士講返佢地既經歷,
呢part就長約五分鐘.
講左咁耐終於到最後一隻碟.
碟四有解拆片中空襲場面既特輯, 可以選擇4個畫面7種音效既配搭.
跟著有同樣關於特技既分析, 今次係關於爆炸船艦場面, 形式好似Matrix或少林足球加長版咁,
睇片途中按右下角圖案就有D技術人員講解. 跟著有一段動畫模擬既空襲片段,
係導演當初構思既襲擊情形. 關於部戲既仲有圖片集,當中有劇照, 故事板, 海報宣傳品等超過一百張圖片,
有排睇. 碟四最後收錄既係歷史時間線, 記錄由1846年到珍珠港歷史既重要時刻, 每按時間線上既公仔,
就有一段有關該歷史既片, 當中仲有日本侵略我國既記錄.
如果你以為完晒就錯, 全碟仲有兩隻Easter Egg, 分別係碟一同碟二,
碟一既係解釋闊銀幕同Pan And Scan既分別, 碟二既係十分鐘既搞笑蝦碌片. 都好易搵到.
所以大家找找看, 搵唔到先話你知.
●●●●●●●●●●●●●●●●●●●●●●●●●●●●●●●●●●●●●●●●
總結
寫到寫到手軟, 何況睇晒咁多. 如果睇晒起碼二十個鐘以上. 淨係聽晒D commentary同睇埋套戲都十二個鐘.
俾兩舊水有成咁多粒鐘娛樂真係超值. 加埋咁高既質素, 真係有dvd機既都應該買一套守門口.
不過碟既包裝就化學D, 尤其放碟果度, 咁拎法隻碟實花, 我有個小貼士,
大家可以用CDR個D白紙袋先入起隻碟, 再將紙袋, 開口打橫放入盒放碟個位, 個位o岩o岩好,
咁就唔怕拎碟時D指模印晒落隻碟.
P.S. 我手上既係一區碟, D特別收錄係無任何字幕既, 即係要玩廿粒鐘listening.
如果唔想咁, 可以買三區版, 你計下以一個字盒廿蚊, 四隻碟就八十既價錢, 3區依家個價都算超值.
不過三區既中文字幕唔包括commentary(除左導演既個條),
所以都唔係十全十美.
推介度: 5 out of 5
網頁版【巴斯主網頁 Review 33 小強新聞組 Tower3A討論區 麥嘜討論區 阿柒新聞組 RLII的討論區】
新聞組版【阿柒新聞組
小強新聞組
巴斯新聞天地
KC Lau軟件DVD新聞組】