 |
歡迎來到Frankie的器材網頁
建立日期 : 2003年12月21日
大家好，其實上左巴斯呢個網已經有一段時間，因為可以在這裏可以同很多人一起分享有關影音方面的知識，
又可以睇到唔同發燒友家中的器材，所以現在每日都會抽時間上來睇睇，但由於本人十分懶的關係，
所以通常都只做CD-ROM(只讀唔會寫)，其實我一直都很想將自己的器材Post上來同大家一同分享一下，
但我又唔想打咁多字（我打字好鬼屎），而我近來比較得閒，所以想將我多年玩影音歷程同大家一齊分享一下，
亦希望為這個網頁盡一點力，並想在這裏多謝之前在討論區解答了我很多問題的高手，特別係我之前屋企裝修，
在討論區得到很多高手幫助，解決了很多影音擺位上問題。好啦現在開始同大家分享我的影音歷程。
我仲記得要２１００大元（大佬，緊係記得喇！當年對我來講２１００蚊並唔係一個小數目，
左夾右夾，仲要農曆新年前去超級市場兼職做埋包花紙男至夠呀，諗返真係．．．．．．慘，
但買到自己心頭愛都係值得０既），買呢部機原因係因為0個時開始鍾意聽日文歌，
返學放學都可以一路搭車一路聽，幾爽，呢部Discman成部機外殼都係鐵造，但避震方面就麻麻，
因為仲未發明ESP，所以行路時聽都要就住就住，但當時我已經非常滿意喇，初時仲每日都攞出街聽添。
 |
有左部CD機，自然就緊係想擁有埋LD機喇，
於是就0係我中五暑假做暑期工所賺第一個月糧買左上面部Pioneer CLD-737 LD機，
這部機以當時我能力範圍內所能負擔到的已是最好的，我買它的主要原因是它有數碼定鏡，
因為當時大部份LD機只會播CAV碟（大部份都係DEMO碟）時至有定鏡，但播CLV碟時就無定鏡，
而CLD-737就連播CLV都有定鏡，又有自動反碟，
雖然效果不及當時的CLD-939好（大佬，比７３７貴成一倍有多呀，我份暑期工係做速遞男咋，又唔係做印銀紙，點買呀？），
不過我都好滿意部CLD-737，因為佢有好多Function玩，我記得當年暑假我買左部７３７之後，
每日放工返屋企我都會去租戲返來睇返幾粒鐘至訓覺呢，
而聲音方面我就駁左落部Sony Mini Hi-Fi度，電視就用Sony 16吋單槍電視機。
過左幾年後，開始出來社會工作，屋企人又搬了一個較大單位，自己可以擁有一個房間（雖然得７０尺），
自然想將自己的房間變成一個私人影院，當時諗可以訓０係度睇戲幾爽呀，
咁就緊係唔可以再用Mini Hi-Fi黎睇碟啦，於是就０係我正式出來做嘢出第一個月糧後，
咁啱又同時攞到我人生中第一張信用咭，咁我就拿拿林攞住張信用咭去買左部AV AMP同埋喇叭番黎，
當時我買左YAMAHA 1000DSP（只得DOLBY PROLOGIC 的，仲要係１００V要加變壓火牛）同埋一共七隻喇叭返屋企，
當時０個種滿足感真係難以形容，比起而家我哋同胞楊利偉可以上太空仲更加興奮，但好快就好後悔，
因為有AC-3 解碼擴音機０係三個月左右就面世，當時０係影音舖感受到AC-3效果所帶來0既震撼，
同自己部YAHAMA 1000DSP比，真係差天共地，但係無計，啱啱買左幾個月唯有默默接受，之後亦升級過一、兩件器材，
將１６吋電視轉為２４吋PANASONIC 16:9電視機，將CLD-737升級做HF-9G（已經賣左），
之後因為LD碟 開始停產，自己亦停左無玩兩、三年時間。
到左大約２０００年左右，ＤＶＤ機愈來愈普及，咁就買左第一部DVD機PIONEER S-6D返來，
但無DTS擴音機，出來０既聲總係覺得唔夠好，加上開始上好多關於影音網頁，比呢度 Ｄ人日毒夜毒，
疲勞轟炸，咁好快咁就買左部ONKYO TX-DS787 Surr. Amp,過左一排，開始興玩投影，見到大畫面咁正，
咁咪開始左度右度，希望可以０係間７０呎０既房內玩到投影，終於比我諗掂，
咁就飛快咁（差D仆親添）去買左當時最hit０既Panasonic AE-100番黎，
有AE-100就緊係要買埋部有progressive scan ０既Philips Q-50 DVD機啦，以下張相就係我間房內最後樣貌。
 |
即我隻眼到個幕距離為８呎半左右，唔好以為將隻幕掛到咁高，睇戲會好辛苦，因為我會訓０係張床度睇，
位置經過我精密計算後啱啱好，但聲音方面就．．．．．．．．而幕方面我就用左OS 70吋４：３白幕，
投射出約６３吋１６：９畫面，我記得當我同個朋友一齊裝好部機，放隻朱羅紀公園II落去試機時，
真係感動到流淚，０個種臨場壓迫感係以前０係屋企用２４吋 １６：９電視機比唔到我的，
嘩，食肉恐龍唔好行埋黎呀，救命呀！！！有無人救我呀？？？（唔好意思，投入個頭）。
到幾個月前，屋企開始裝修，將一個近客廳的睡房拆掉，令到個客廳大左成一倍面積，
咁就緊係將所有影音器材搬出去廳玩啦，加上而家聆聽環境有１４呎X１６呎，
咁咪可以買多部Integrated Amp 來聽歌囉，而喇叭用左咁耐，索性一次換埋佢，
一次過放血（紅十字會快D搵人黎救我呀！！！）全部換過佢啦，以下就係我最新器材名單：
| 器材種類 | 器材型號 |
| Projector | Panasonic AE-100 |
| Screen | 80” 16:9 OS Pure Matt II Plus |
| AV Amp | ONKYO TX-DS787 |
| Power Amp | Cayin 1205.1A (5 channels power amp) |
| Integrated Amp | Gryphon Callisto 2200 |
| DVD | Philips Q-50 |
| Front Speaker | B&W Nautilus 804 |
| Center Speaker | B&W Nautilus HTM2 |
| Rear Speaker | PSB Alpha Surround |
| Sub-woofer | Paramount HCS5100PS |
| Speaker Cable | AudioQuest CV-6 DBS |
| Power Cord | Isoclean Premium |
而家先黎幾張全家福比大家睇下先：
 |
 |
 |
 |
相信大家從相片中可以大約估到,聆聽面積大概為１４呎X１６呎，
皇帝位到投影幕的距離為１１呎，投影幕拉落時剛剛好在電影機前。
 |
投影機用Panasonic AE-100，揀呢部機原因唔駛多講，因為此乃當年人氣產品，而且售價相宜，
直至而家為止，好好彩仲未有‘七星岩’現象，圖中所見，我亦為AE-100加上ND-2 Filter，
令到畫面液晶格不太明顯，同埋令黑位改善了，而大家可能會問我：「點解要加多一塊板黎至裝部投影機上去呀？」
咪因為而家D機好多都係短焦距機囉，而家部機到個幕距離大約九呎六吋，啱啱好投到最細８０吋，
如果無左塊板，咁最細都要投８６吋，但如果買９０吋幕又好似大過頭，我又唔想將部機裝０係天花，
因為怕日後換機時個位唔啱又要再重新鑽過窿，搞到過天花千瘡百孔就唔好啦，
咁咪唯有裝修時叫木工師傅幫我造一塊板縮短番投影機至幕的距離，希望日後新機可以有D長焦距就好啦。
幕方面選用了80” １６：９OS PURE MATT II PLUS，因為之前都係用７０” ４：３ OS WHITE MATT，
鍾意佢有慢回捲功能，利用鏍絲桿吊低一呎，令到睇戲時唔駛向上望咁辛苦。
 |
 |
AV Amp 方面用ONKYO TX-DS787作為前級，效果只算一般，比起現在四、五千蚊0既YAMAHA 擴音機差，
好似缺乏了一種現場感覺，用五聲道輸出，其中中置及後置聲道輸出至Cayin 1205.1A，
而主聲道則輸出至Gryphon 2200，用左Cayin 1205.1A作為中置後級，
感覺上最大改變係力水方面好左唔少（不過唔知係未同喇叭都有關係）。
 |
 |
合併Amp方面用Gryphon Callisto 2200，
因為試機時鍾意佢聲底較暖同埋甜（但唔知點解返到屋企無左個種暖０既感覺，可能我屋企比較凍掛！！！）。
而電源線用Isoclean Premium直接插入牆身電制上。
 |
 |
 |
佢同Gryphon Callisto 2200一起０既效果我都非常滿意（全靠之前巴斯網友給予我很多意見最後才揀到這對喇叭），
而中置方面因為想用埋同一系列，所以買埋HTM2，喇叭線用上AudioQuest CV-6 DBS，single wire接上N804。
後置方面用PSB Alpha Surround，貪佢白色外殼夠靚仔，又襯到裝修，但係效果唔多好，
環境效果聲較差，可能係位置放在後牆０既關係掛，而高度則位於聆聽位高二呎半左右。
 |
 |
Sub-woofer用Paramount HCS5100PS
 |
總括黎講，我對AV Amp方面效果並未滿意，唔知係未本身環境所限或是AV amp本身關係，
而純音响方面，現階段仲物色一部CD機，但仍考慮買一部純CD機抑或買一部SACD機,，因為銀彈有限，
恐怕同價位SACD的質素會比CD機的差很遠。
