Spiderman 3

　發佈日期 : 2007年 5月5日

《蜘蛛俠3》Spiderman 3於 5月1日在香港合共122個上映銀幕開畫，首日開畫票房，錄得738萬港元的超高票房，

即時打破周星馳在 2004年《功夫》所創下的 404萬港元開畫票房紀錄，

《蜘蛛俠3》Spiderman 3 ，正式成為香港開埠以來單日最高開畫票房片王。

今次片長140分鐘，即兩個小時二十分鐘內容的《蜘蛛俠3》Spiderman 3，票價方面比平日貴$10，即每張票售$70。

但依然在黃金時段，是九成入座率，果然利害，

如果我自己不是透過網上訂票的話，即場是不可能在戲院買到票和朋友一起欣賞的。

下圖為香港一間比較大的電影院海運戲院，在星期六晚9:20的訂座圖，

是近日戲院很難見到爆滿的情況，可想而知，這套電影的吸引力。

好!!!!好!!!!好!!!!

嘩~~~~今集蜘蛛俠真係好睇到唔知點形容，140分鐘，由頭打到落尾，絕無冷場，動作場面，是我前所未有見過咁好的打鬥設計。

可以係話袁和平，殷子單的混合武打動作設計，相信今後對武打動作設計的工作人員來講，

《蜘蛛俠3》Spiderman 3 的出現，是一個很大的壓力。

提提大家千萬一定要準時入場，否則錯過了前面長十六分鐘，驚天地泣鬼神式的精彩鏡頭。

男角因為變了黑蜘蛛之後，性格大變，正義得來，帶一點不羈，使人眼前一亮，真係見到佢都忍唔住尖叫。

各位觀眾，2007年全新偶像誕生了!!!!!而女主角方面，表現神奇地比之前兩集要好好多，片中還有不少性感激突的演出，萬勿錯過。

唔好傻啦!!!!呢D年頭，邊仲有呢D電影睇到丫~~~~

以上一大堆影評，係我發脾氣，講反話的!!!!

拍套這樣的戲出來，在香港上畫，票價仲要比平日多收 $10，老老實實，$70票價，我情願比乞兒都唔會比這套電影，

他日推出DVD，Blu-Ray，唔需御我，連明珠930重播我都唔會再睇一眼。

成套戲拍到不知所謂，你等我一陣......等我摺高衫袖數臭佢，

兩個小時 二十分鐘內，我不知自己轉了幾多次姿勢，如果即場可以上網的話，我真係好想上網打發一下時間啊。

成套戲，打鬥場面唔多，叫做 3到4場，尾場叫做大型小小，但打得求求期期，一點都不緊張，打得又唔好睇。

男主角一向我都唔係好喜歡他做蜘蛛俠架喇，今集仲衰，成日都唔夠打，最後仲要人幫手。

你咁差，點做蜘蛛俠呀，我平日都成日比人欺負，入場當然係想睇下你點威架啦，代入自己度丫嘛，

點知你仲慘過我，我洗鬼睇你咩~~~基本上成套戲都係一套愛情片，喂，我真係無興趣想知你最後追唔追到個女主角呀，

你打啦，唔好講喇，你係咁講講講，講完又再講，講極都唔打，我真係頂你唔順。

哎也~~~~唔好提喇，一提起佢我D火又起架喇。

我以為..........係!!!又係我自己以為，男主角變左黑蜘蛛之後，他會做出一些不羈的行為啦，呢~~~類似謝霆鋒果隻feel呢，

我仲幻想他變黑蜘蛛之後，會有什麼絕招或者技術表現到他比之前更有力量。

丫~~~~原來唔係架播，比我想像中差好遠架播，真係激到你呢~~~

最離譜係去爵士吧找女主角的一幕跳舞場面，我真係想一張摺凳車埋去。

講多兩講，使我想起其中一幕蜘蛛俠出現，照例又係在屋頂跳呀跳呀，

丫~~~~跳跳下居然跳左枝美國旗出來，真係睇到我跌落地。

嘩~~~洗唔洗呀，關美國旗什麼事呀~~~~

講到個女主角，我真係不明白點解來到第三集，都仲係由她做，

我覺得換女主角迫切性高過男主角，想唔到第三集依然係見到她呢。

她演技真係不算好，真係好難投入同想像蜘蛛俠喜歡她什麼?

最尾一場英雄救美，我真係好想好想佢跌鬼死，咁下集就有新女主角出現，大快人心喇，

不過..................到時都會有可能篇劇說，這個是她孖生細妹，再次出場都得~~~~

其中有一幕呀，蜘蛛俠錯手打左女主角一把，我即場忍不住叫了一聲  好!!!

今集就連女配角都係唔差得幾多，唉~~~~

反而呢位靚仔哥哥就唔同喇，今集他是綠魔的承繼人，他演失憶前和之後的表情做得好明顯，像是兩個不同角色一樣，

反而我覺得他做蜘蛛俠會好好多囉。

今集他由原本係壞人，後來變返好人，仲幫那個無鬼用的蜘蛛俠打交，可借最後他死了。

咪同現實生活一樣囉，真係應該死果D唔死，唔應該死果D就生歐歐企響度。

圖中呢位奸角沙魔，一點惡的勢都無，我一點都不驚他的威力，而且沒有什麼攻擊能力的。

唉~~~~唔知係唔係我睇得太多戲，睇到麻木晒。

另外今集，仲有多一個壞人毒魔，就係圖中呢個喇，我真係唔明，點解佢會似蜘蛛俠的。

唉~~~~都係不知所謂的做型，打得又唔好睇。

總結

講多無謂，我唔喜歡，唔代表係這套電影不好，只係我個人比效膚淺，唔識欣賞，我發神經吧，

我相信很多人會看完之後，拍晒手掌，話唔定係全年最佳電影都會有架播。

何況這套咁收得的電影，電影公司決定開拍第四集喇喂。

你問我，我D火又滾架喇，如果他日推出第四集的話，唔換男女主角，你唔好叫我入場睇。

不過全城熱門話題，你又點可以唔入場看丫，你無睇過就無資格鬧，而且無話題同人家講，

你總不可能聽說人家話不好看，你就不去看吧，要信自己，不要信人。

所以大家都係早點買票入場，早睇早鬧丫嘛。

記得網上訂票，因為真係好多人在戲院排隊買票，上網訂好好多，好方便的。

以下是三條本港院線的網上訂票網址。

對這套電影有興趣的朋友，可到以下這個網址收看予告片。

http://www.apple.com/trailers/sony_pictures/spider-man_3/hd/

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。