Silverline Audio “Grandeur II”

第 二 集

發佈日期 : 2008年 6月25日

讀者投稿 

圖 / 文 :譚威威

這篇文章所有圖片與文字版權屬譚威威擁有

真係唔好意思嘞，哩個 “Part 2” 一拖就拖咗個幾月，因為公務纏身， 總之“一千句 I’m SORRY”！

  今次其實我係想講下、介紹下全港第一位Grandeur II用家佢嗰套音響系統，

順便當係一個新居入伙後家訪Report，偕因Part 1嗰D相其實係佢舊居，佢早排已經搬到另一個安樂窩。

我今次諗住係Part 2裏面update下佢D器材資料同埋影返D靚相同大家分享下。

 哩位Grandeur II用家是一位骨科專家，屬於極之繁忙嘅富貴黨一族，要同佢約啱時間家訪影相都唔係咁容易，

但係諗到佢D靚器材同埋影到D靚相，難約都要約啦！

 Grandeur II當然係好嘢黎喇，以哩位朋友嘅money，要買甚麽Wilson、Avalon一定唔係D乜嘢問題，

但佢點解偏偏揀Silverline Audio “Grandeur II”，唔洗講梗係靚聲兼啱聽啦 (否則我都唔會成為第三位用家)！

　

　

對公仔好得意喎，用黎裝飾定或校聲用？！

　

 

哩位骨科專家都可謂食得 “了能”，一般高檔矜貴前後級擴音機有大把選擇但佢就唔啱聽，

搞黎搞去結果係美國揾一間著名器材公司嘅世外高人幫佢custom-made一套極品膽前後級擴音機黎聽，哈……問你服未？！

  睇下哩對後級，淨係個EL34膽陣就已經 “賓虛” 咁嘅塲面，再加埋左右兩個重量級電源，

嘩………我都唔敢問佢幾多錢囉，廢事嚇到個下巴跌落地下就失禮人喇。

 

其實之前佢嗰套前後級都已經唔錯嫁，Threshold T2加埋兩部T400玩Bi-amp，

有氣勢又有幼細，咁玩法已經比起好多人奢侈好多囉。

 

　

　

嘩，極品Oracle CD Player呀！哩位富貴朋友都好鬼捨得花錢買器材。

Oracle將CD碟D訊號毫無保留讀晒出黎，

經擴音機再由Grandeur II搾乾搾淨100%傳送到發燒友嘅耳仔，妙絕！妙絕！

 

因應機主同埋美國高人嘅要求，嗰套custom-made既膽前後級擴音機唔方便露面，

以避免江湖上嘅是是非非，所以嗰D器材都係以 “琵琶半遮面” 嘅形式出現。

 

　

　

機主用客廳黎聽音樂，個聆聽環境我估約四百平方尺，地方四平八穩，

用黎聽音樂已經相當唔錯囉。兩隻Grandeur II相距約6、7尺，離後牆估計約3至4尺。

雖然個廳無乜特別treatment，但實際出黎嘅音響效果仍然非常理想。

  當日用黎試聽嘅CD碟：

 

聽嗰隻黑貓仔 “A taste of DMP” ，音樂一出，成間屋突然間就變大咗，

後牆就好似突然向後縮咗好幾尺，無錯………隊band就係企咗係嗰幾尺位置！總之整個舞臺就擺咗係我哋面前。

 

講動態同弦樂，隻Olympia 卡門就啱晒key嘞，打到 “彭彭” 聲對Grandeur II都仍然從容不迫，

去到幾大聲都依然比人有“大大都撐得起嘅感覺”。但當去到弦樂嘅時候，

Grandeur II又比人有一種幼滑如絲嘅感覺，無吹牛，真係好正。

 

套組合另一特色係分晰力極高，就似係一副超級顯微鏡。

當日無論聽 Master 嘅 “Female Audiophile”、 陳潔麗嘅 “一水隔天涯” 

定係 Leslie Ritter 嘅 “Hearing the song Listening to the silence”，我都覺得眼前有一種 “飛蚊症” 嘅感覺，

硬係覺得面前個音場有好多零碎嘅聲響同埋空氣份子嘅震動分佈在上下左右，係好細聲嘅、

又好細粒嘅、又不停閃爍顫動嘅………….用 “飛蚊症” 去形容真係好貼切。

哩種分晰力真係要親身感受過先至可以理解，筆墨好難100%去形容。

 

好嘞，大家都睇過哩位獨具慧眼嘅Grandeur II用家所用嘅器材嘞，不如就此暫時收筆，

等我係Part 3再繼續同大家講下我自己嗰對Grandeur II嘅表現喇，bye-bye！

 

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。