Belden 8字头线
发布日期 : 2010年 6月26日 图 / 文 : 巴斯
国人早两日介绍了一条好好用的 8 字头线给我，很适合用在普通入门级机上，
呢条线系针对一些电源接口属于 8 字头的器材，用得 8 字头，你话系乜野机丫，十之八九都系入门级平民机种，
这类机的跟机线，不单插头内的保险丝睇唔顺眼，最啰命系幼到无法接受的香鸡电源线。
呢类入门级平民机，唔通会买条仲名贵过佢身价的电源线比佢咩，
就算唔介意，都无奈是 8 字头，接唔上 IEC 头的靓线。
虽然市面上有 8 字头转 IEC 的转换头出售，价钱 $20内有交易，但你会相信发烧友会架床叠屋，自打咀巴去用转换头吗?
今次国人介绍我用的线，系旺角秋叶原代工的Belden 线，唔好以为又系赞到天上有地下无个D，身价千千声或万万声的发烧神经线。
Belden 线在发烧友心目中，一向都系合理用得过的线材，
正路又正气，世上最靓线一定唔系佢，但衰声一定无佢份，更加无人会觉得佢唔合格。
某些两声道顶级器材的跟机线，都系用Belden 线，仲比人用来吹到天下无敌，
一条名厂跟机线，都可以卖返 $600-$700，仲要配给先有，其实只系一条 Belden 线遮，又会真系有人信到十足比钱去买。
眼前呢条 4 尺长的 Belden 线，连埋发烧友无人唔识的 Wattgate 插头，和 8 字头，连工包料售价港币 $266 ，
豪比佢啦，好过自己买料做嘛，一条比 PS3 薄版用，一条比蓝光机用，心理上满足得来，价钱又合理。
店内还有其他长度可供选择，问完即试，试完即买，买完即走，再唔系订做不同长度都仲得。
Wattgate 头加 Belden 散线自己做无难度，因为Wattgate 头只系接上罗丝位，小学生都识做。
但要去找呢个 8字头的话，我都唔知去边处买，
就算买到 8字头，都仲要焊，另买热缩通来做靓仔佢，依家放低钱即买即走好方便。
再提多一次，呢条线一定好过跟机的香鸡线，但如果要求接上之后，又话要姜又话要醋，
唔该自己走去搵D江湖术士，比佢作一笔，顺便做埋心理辅导，咁会安乐D。
双层热缩通，做得好靓仔。
无论外型和质料都一定好过跟来的香鸡线。
包装 ? 无包装架，透明胶袋算唔算包装丫， 土炮 ?
系土炮架，港币 $266 你打算要什么包装咁呢?
Wattgate接头加 Belden线都唔系已经系最好包装吗 ? 唔通又要搵D江湖术士出来卖下武先可以叫靓线 ?
我同你讲丫，呢条线唯一缺点，就是售价太平，比人睇唔起，
如果卖 $1000 港币的话，再吹多几句，我保证下星期卖断市。
港币 $266 ? 给人回应的咪就系一句 : 得唔得架 ?
秋叶原地址
东京都千代田区外神田 4-3-1
Sorry Sorry...... 太挂着日本了 
香港的秋叶原正确地址应该系 :
旺角山东街47-51号中侨商业大厦 7字楼
秋叶原电子中心有限公司
如果你唔清楚位置，可用滑鼠参阅以下的拖拉图，了解附近的环境。
用滑鼠按实图片后，再上下左右拖拉图片，就可以360度球形观察到附近环境。
各师兄与朋友，这篇文章，如非商业用途，欢迎转贴再转贴，如需借图片使用，
请自便，但敬请不要抹去图中的 avbuzz.com签名字样，感激感激再感激。
◆ avbuzz.com精神，人人毒我，我毒人人 ◆