Belden 8字頭線
發佈日期 : 2010年 6月26日 圖 / 文 : 巴斯
國人早兩日介紹了一條好好用的 8 字頭線給我，很適合用在普通入門級機上，
呢條線係針對一些電源接口屬於 8 字頭的器材，用得 8 字頭，你話係乜野機丫，十之八九都係入門級平民機種，
這類機的跟機線，不單插頭內的保險絲睇唔順眼，最囉命係幼到無法接受的香雞電源線。
呢類入門級平民機，唔通會買條仲名貴過佢身價的電源線比佢咩，
就算唔介意，都無奈是 8 字頭，接唔上 IEC 頭的靚線。
雖然市面上有 8 字頭轉 IEC 的轉換頭出售，價錢 $20內有交易，但你會相信發燒友會架床疊屋，自打咀巴去用轉換頭嗎?
今次國人介紹我用的線，係旺角秋葉原代工的Belden 線，唔好以為又係讚到天上有地下無個D，身價千千聲或萬萬聲的發燒神經線。
Belden 線在發燒友心目中，一向都係合理用得過的線材，
正路又正氣，世上最靚線一定唔係佢，但衰聲一定無佢份，更加無人會覺得佢唔合格。
某些兩聲道頂級器材的跟機線，都係用Belden 線，仲比人用來吹到天下無敵，
一條名廠跟機線，都可以賣返 $600-$700，仲要配給先有，其實只係一條 Belden 線遮，又會真係有人信到十足比錢去買。
眼前呢條 4 呎長的 Belden 線，連埋發燒友無人唔識的 Wattgate 插頭，和 8 字頭，連工包料售價港幣 $266 ，
豪比佢啦，好過自己買料做嘛，一條比 PS3 薄版用，一條比藍光機用，心理上滿足得來，價錢又合理。
店內還有其他長度可供選擇，問完即試，試完即買，買完即走，再唔係訂做不同長度都仲得。
Wattgate 頭加 Belden 散線自己做無難度，因為Wattgate 頭只係接上羅絲位，小學生都識做。
但要去找呢個 8字頭的話，我都唔知去邊處買，
就算買到 8字頭，都仲要焊，另買熱縮通來做靚仔佢，依家放低錢即買即走好方便。
再提多一次，呢條線一定好過跟機的香雞線，但如果要求接上之後，又話要薑又話要醋，
唔該自己走去搵D江湖術士，比佢作一筆，順便做埋心理輔導，咁會安樂D。
雙層熱縮通，做得好靚仔。
無論外型和質料都一定好過跟來的香雞線。
包裝 ? 無包裝架，透明膠袋算唔算包裝丫， 土炮 ?
係土炮架，港幣 $266 你打算要什麼包裝咁呢?
Wattgate接頭加 Belden線都唔係已經係最好包裝嗎 ? 唔通又要搵D江湖術士出來賣下武先可以叫靚線 ?
我同你講丫，呢條線唯一缺點，就是售價太平，比人睇唔起，
如果賣 $1000 港幣的話，再吹多幾句，我保証下星期賣斷市。
港幣 $266 ? 給人回應的咪就係一句 : 得唔得架 ?
秋葉原地址
東京都千代田區外神田 4-3-1
Sorry Sorry...... 太掛著日本了 
香港的秋葉原正確地址應該係 :
旺角山東街47-51號中僑商業大廈 7字樓
秋葉原電子中心有限公司
如果你唔清楚位置，可用滑鼠參閱以下的拖拉圖，了解附近的環境。
用滑鼠按實圖片後，再上下左右拖拉圖片，就可以360度球形觀察到附近環境。
各師兄與朋友，這篇文章，如非商業用途，歡迎轉貼再轉貼，如需借圖片使用，
請自便，但敬請不要抹去圖中的 avbuzz.com簽名字樣，感激感激再感激。
◆ avbuzz.com精神，人人毒我，我毒人人 ◆