FOCAL XS BOOK 開箱圖

發佈日期 : 2012年 1月14日    圖 / 文 : 巴斯

       Hi Fi 用來睇 。  Hi Fi 用來睇     

 Hi Fi唔只用來聽仲要用來睇，唔通佢醜樣，我都要日日對住佢咩?

在書桌放喇叭，個人第一志願係 harman/kardon GLA-55，因為夠靚仔囉，

呢對全球只造 2000對，香港只可以分到 80對，個樣靚仔到呢，但索價接近$8000，咁名貴，點買得起啊。

騎牛搵馬之下，雖然我自己不太喜歡 Micropod SE 的聲音表現，但樣子是我喜歡的，

幸好有M&K KX12 低音炮補不足，免強還可以用 2.1作為電腦喇叭組合用。

日子一日一日的過，還是找不到合適自己個人口味的代替品。

終於 Focal 推出了 XS BOOK ，唔單只靚仔，以書桌喇叭來講，仲好好聲，非常適合我個人口味，

所以打佢主意，成為 2012 年第一件玩具，也可以了結我一直來的心願。

呢對喇叭建議零售價係 $3280，旺角星際城市的 DMA 泛音都係一樣呢個價。

http://www.dma-audio.com/product_detail.php?id=1704

會員優惠

但如果係他們會員的話，會平少少，但呢個價，我只係求其格過，

無行過19區後所得出來的結果，究竟呢個價，係全港最平定最貴我都唔知。

是但啦，旺角方便我嘛，如果太遠，車錢同時間都比返晒佢。

http://www.dma-audio.com/personal_registration.php　

會員的話，可以用 $3120買到。

點先可以做會員? 斬雞頭，燒黃紙 ? 唔係三合會喎老細，無咁覆雜下嘛，登記咪得囉。

三樓分店

 DMA 泛音在星際城市二樓和三樓都有門市，二樓顧客較多，一向自閉的我好怕人，所以上三樓，

位於三樓分店那位店員好好人，因為我的會員資料有少少問題，

係我搞錯一些資料，幸好在佢幫助下終於都完成到。

因為唔係會員的話，一定要用正價買了。

由於趕時間，加上之前又在其他地方試過聲，所以無驗收，無拆箱，原箱帶走 。

那位店員，見我成個生意失敗 Look咁款，平多 $20 比我坐車返屋企，太感動了。

店員仲唔只平 $20，仲送多一隻雙CD，你睇睇幾厚淨~~~~

送架播，可能你覺得無野啦，但對我來講，算係店鋪的心意架喇，起碼唔會因為要平比我，好似我去乞佢或者囉著數咁丫。

又有得平，又有野送，開心加開心。

計一計共平了幾多錢先，其實只係 $140，唔係算好多，但過程開心丫嘛。

何況$140可以在牡丹樓買好多個虛心樂園餐架喇。

再一次多謝那位好好人的店員。

 身份顯赫

不過如果覺得以上平得少，又睇唔起人家唔係送靚號碼發燒碟的話，我誠意推介去金鐘的DG購買。

你淨係聽個地點都貴氣好多啦，就好似頭等機位，同一班機，目的地一樣，但票價就差好遠喇。

金鐘地處山腳，專做半山街坊生意，這裡所發售的 XS Book 是港幣 $3800 ，非常適合好似閣下咁身份顯赫人仕光顧，

旺角買平得果幾百蚊，都唔夠踏幾腳油，何必呢?

試想像一下，人家問你的 XS Book 在那裡買，你話金鐘買，而我就只可以答旺角星際，你話喇，金鐘買係咪高級好多丫。

店鋪的燈光與高級餐廳一樣，燈光越暗，格調越高，收費越貴，

邊D最高級? 點蠟蠋果D咪最高級囉，唔通開晒光管，成間跌打館咁款果D高級咩? 

DG行 Lifestyle 路線，行入鋪裡面，自己都覺得好似高人一等咁，淨係呢點都值得比貴幾百蚊買。

店內還有大量  iPhone 4S 和 iPad 2 現貨發售，正價? 你話呢? 如果正價，你覺得我會話你知咩? 我買晒去先達放啦。

另外，屬於代理的昇和影音，位於中環和尖沙咀陳列室，都有發售和提供陳列品給顧客試用架。

唔好講咁多喇，開箱先，

好彩有呢個外層紙皮箱，因為當日下微雨，我又無帶雨傘，

究竟裡面係報紙定磚頭我都唔知架，依家返到來先拆來睇。

究竟.........................

打開之後，起碼見到個 FOCAL 箱，證實唔係磚頭或報紙。

面頭有兩張圓型半透明貼紙封口，可見是未開過封。

好喇~~~~用界刀開架喇~~~界了就代表開封架喇，

拿 1 ~~~~2 ~~~~3!!!!!

好似我呢D咁賤格的人，如果有心開封又唔比人知，我就會反轉個箱來開，由底部取出個BOOK，

用完就由底部入返部機，都係可以唔需要開封就可得手。

不過我絕對相信 DMA 泛音 和他們任何一位店員都唔會咁做，所以我好放心。

開封後，打開 FOCAL 白箱，就可以見到第一層發泡膠蓋。

把發泡膠蓋移走，其中一隻 Book就出現在眼前。

移走第一隻BOOK，再有第二層發泡膠，移走之後，就可以見到另一隻 BOOK。

而左手邊還可以見到另一盒白色的物件。

即係話箱內有一對喇叭和一盒圖中所見的配件。

啊原來白盒內所擺放的是玉女心經和所需線材，玉女心經係簡體中文，無繁體，

但唔緊要啦，都唔會睇，就算睇都估到簡體字吧，再唔係睇英文囉。

圖為白盒內的訊號線和電源線，當中還有這個電源插轉頭。

左右喇叭的背面是不一樣，這個 BOOK 喇叭設計，是屬於有源喇叭，背面接口和電源開關，都是放在右喇叭，

而左喇叭只有一個接口，是與右喇叭接線的。

中國成為世界工廠，連 iPhone都是中國所做，你應該會接受一對三千多元的FOCAL 書桌喇叭是中國做吧。

下集會和大家分享這喇叭的表現 ，待續...............

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。