叛教 2

发布日期 : 2012年1月4日    图 / 文 : 巴斯

转系统唔系讲笑，仲要系手机....Sorry系智能手机，咁贴身用的物品，更加要想清楚，咪人换自己又换。

由 iOS 转 Android ，有好多野要放弃，不过得到的又有不少，视乎要放弃的对自己有几大影响。

今日系与 Note相处的 10日，绝对是个热恋期，直到今日，我无一刻是对呢部机反感，系一秒都无，

如果依家比返现金我，我依然会用来再买 Note，不过就会转用黑色，

iPhone ? 我再讲一次，我返不到转头了，依家对 Note进一步了解后，就算 iPhone 5推出5.3" 屏幕，

如果 iOS功能不变的话，我都唔会返转头。

还记得当日买机时，第一个要面对的问题，也是最重要的问题。

就是由 iPhone 用的细卡，转成大卡，因为留在 iPhone 内的联络人资料，

对好似我呢D小市民来讲，唔系咁容易过户到Note上去，因为联络人资料，如果当初并不是Save落Sim卡的话，

iPhone 系无得把殖入体内的联络人资料，过落Sim卡内。

虽然透过 gmail过户都可以，但要搞好耐，一般市民都唔识搞。

幸好百老汇的员工帮手，用另一个比较快的方法，为我完成今次过户联络人资料手续。

那位哥哥仔透过一部 htc 做中间角色，经我和 iPhone 4同意下，透过蓝芽进入我的 iPhone 4，

把联络人资料全数Copy到佢的htc手机内，然后再透过蓝芽，向Note吐进联络人资料，

过程非常之快，事后哥哥仔在我面前清楚消毁 htc内，我的联络人资料。

还为 Note 贴上保护贴，又无迫我买埋D垃圾，

呢种帝皇式服务，只欠生果盘和长脚蟹三点式招待，就达到卖手机完美境界喇 ^^ ，呢个Copy联络人资料好全面，

因为内里有Model的衫围和鞋的Size在里面，原来都尽数抄了过来，唔单只系电邮和电话号码咁简单，

真系再一次多谢那位哥哥仔给我坐享其成，感激~~感激~~再感激。

就系咁，我部Note仲未有Sim卡的情况下，体内就拥有我所有的联络人资料，

离开百老汇15分钟后，我在附近数码通，免费得到大卡，一插即用到Note体内的联络人资料。

反手静音功能

当来电时的一刻，荧幕好自然有来电显示与铃声加震动，唔想听呢个电话，又唔想即时飞线，

只需如图就咁凌空反转部机，留意系凌空都可以，Note就会即时变成静音，而且不会震动。

用家就可以唔需要再定住部机，喜欢点摆部机都可以，由于连震动都停止了，所以放在桌面上都唔会震动到而影响到其他人，

这时来电依然是在屏幕上出现，等对方自动放弃而收线。

下一个电话再来的时候，当然是正常的响声吧。

呢个 食碗面反碗底 静音功能，在其他智能三星机都拥有，而且系预设功能，

无需开启设定就可以用，如果用家唔喜欢，可进入设定内关闭呢项功能。

iPhone 有无呢项功能? 你话呢~~~~

电话功能

虽然是智能手机，但打电话的功能好唔好用先?

我最不满是人头像好细个，唔系因为个荧幕大而影得个头像细，而根本个头像只可以Set咁细个。

你睇佢搞到我个沈佳宜头像几细个? 劲不满呀。

iPhone 的来电显示头像填满整个荧幕架。

联想号码

拨号时，只要输入前两或三个数目字，Note就会跟据电话薄内有的联想号码列出来，

对于我呢个脑部长期零思考的人来讲，方便好多。

不过.......我......我想讲，我连头三个号码都想不起，打电话时只记得人名，根本由头到尾无记号码，对我受益唔多。

呢项功能，好多手机都一早拥有，唔系什么新功能，不过 iOS 5之下的 iPhone 是没有呢项功能，

不过无呢个功能，系唔系唔用得先~~~~我觉得有咪用，无又无所谓。

不过如果用作换机籍口，都可以架 。^^

如图所见，输入头四个数目字，除了有最接近的一个显示出来外，还提供多几个给用家去选择，非常贴心的功能。

拨号前编辑

拨号前编辑功能，系方便身在海外拨打区号时的实用功能。

好多手机都一早拥有，唔系什么新功能，不过 iOS 5之下的 iPhone 是没有呢项功能吧。

能源

3G上网功能加蓝芽，Whatsapp.........天气........Facebook.......等等需要长开的 apps 要推送通知，

新鲜感填满每一分每一秒，日搅夜搅部机，加上 5.3"的彩色巨屏，区区 2500 mAh的电池又如何?

如果我咁样都可以话呢部机省电，你都唔会信吧。

一粒电系无可能用到一日，最多只可以用到下午2:00- 4:00 咁上下就用完。

经自己个人喜好，最终我都接受唔到用尿袋，索性每日开盖两次来换电池，电池自己用充电机来充电。

充电池好过部机长期接上尿袋用，我知咁对个背盖好大损耗，不过呢个系唯一解决到使用上潇洒的方法。

我真系接受唔到一边接着尿袋，一边用机啰，人唔笑，狗都吠呀~~~ 

买背盖都唔会名贵吧，点都好过要我用尿袋啰。

个荧幕 1280 x 800pixels 解析度靓得咁紧要，要减弱她的亮度，为的就是节能 ? 

对我来讲，最精彩系个荧幕光又抢眼，你叫我减弱来用? 仲残忍过煲仔饭呀阴功。

简直系一个笑话，不如出街把上网功能全关闭，只用电话功能啦笨。

做人平日都就住就住架喇，连用部手机都要就住用? 唔系对自己咁残忍下嘛?我做唔出啰。

iPhone 无得换电就无计遮，呢部机有得换，点解要接尿袋咁丑样，真系影响市容架。

话用咁大部手机贴面倾电话异相，异相得过接住尿袋用?

Whatsapp 录口讯问题

Whatsapp对我来讲，其中一个强项，就系可以录口讯，文字表达一向差的我，用口讲就最好喇，呢个功能是我常用的。

左图所见呢个位于Whatsapp内的咪，系用来录口讯的，真系无法子想像到，用内置呢个咪录出来的口讯，

对方如果系 iPhone用家的话，佢系听唔到呢段录音口讯，只对应 Android Only ，真系比佢激到你死死下。

咁用拍片丫，把镜头放贴书桌面来拍片，变相成为录音咁得喇挂。

好可惜，录片只录得12秒最大容量，就唔比录了，得咁短时间，讲得乜?

　解决录音呢个方法，系用第三方apps来传口讯。

每次打算透过Whatsapp 录口讯比对方时，就用一个叫 netMemo 的 app 来录，

录完就有得选在 Whatsapp 发送，咁就可以解决到问题。

由于佢都算系一步到位的 app，所以我接受到咁样用第三方app来帮手解决问题，我无觉得反感，

不过如果下一个版本可以修正呢个问题，我会好开心啰。

捷径

我最喜欢一步到位的事物，Note可以容许好多程式，直接放在第一页的桌面上，就以 Whatsapp 为例，

我把常常要透过用 Whatsapp 通话的汀叮，一步到位咁把她的 Whatsapp 专属设定键，放在桌面上。

只需在桌面的空白位置笃实唔放，咁就会出现如图的选项，可见其中一个叫捷径的选项，

透过以下几步，就可在桌面建立 Whatsapp 汀叮的一步到位键，以后想利用Whatsapp联络汀叮，

一笃落去就进入Whatsapp谈话内容，无需再在人堆中找她出来。

蓝芽耳机

如果亲友第一次见到我用Note的话，个个好似夹定咁，话用咁大部机来听电话好异相，我唔觉好异相啊，

在 iPhone 年代，因为方便听歌，一向都用蓝芽耳机，

何况面油多，唔想搞到部机的荧幕咁狗肉，所以好小直接贴面听，

来到 Note就更加啦，部机唔贴面，可以一边讲电话，一边搞部机丫嘛。

最合我心的 Sony MW600 蓝芽，依然是可以配合到 Note 来正常操作，

听歌仔来电时，淡入淡出呢D基本功能一定做到，就算是来自 Whasapp 的推送通知，同样能在耳机内听到。

音色方面也没有因为是蓝芽无线而影响到我个人对这产品的声效要求。

 USB GTO

平日用大机影相，回家途中想用个大一点的荧幕重温返刚刚的作品，以前是 iPad 的工作，但由今日起，Note取代了她的工作，

呢个要系 iPad 先做到的倒相功能，Note做得比 iPad更好。

Copy 是包括硬照和Video一起都可以。

由于是对应读卡器，咁用什么记忆卡，都难唔到佢。

左图可见，在 8:52 分开始 Copy 约 3GB合共 642 个档 ( Video 加硬照 )，

8分钟后 ( 即右图所见 9:00 )就抄完，我个人非常满意呢个速度。

提提你，这 Copy是原档无压缩 Copy，咁即系话，去旅行时，都可以用呢个方法来做流动军火库作为备份用途。

何况仲可以在回程中欣赏重温这几日的成果来打发时间。

来自大机的AVI档案，虽然唔可以用跟机来的废中废播放器睇到，但只要安装 MX Video Player 呢个免费 app，

就可以非常流畅地播放来自大机所拍得的 AVI 影片。

分门别类

Note的图像档案管理得好好，会自动把不同的图片归类，

图中可见，佢会把来自相机影的相，来自Print Screen的相，来自Whasapp的相，来自Video.............  一一分类。

唔会一堆咁堆晒比用家自己掘返想要的相出来，系好有系统咁分类显示出来，值得一赞。

最利害系其中一个Folder系把云端之上的 Picasa 网路相簿，都显示埋出来，

如果你系 Picasa 网路相簿的用家，就会觉得劲得呀~~~~

待续............

一

各师兄与朋友，这篇文章，如非商业用途，欢迎转贴再转贴，如需借图片使用，

请自便，但敬请不要抹去图中的 avbuzz.com签名字样，感激感激再感激。

◆   avbuzz.com精神，人人毒我，我毒人人 ◆

　谢谢收看这篇文章，你是第 个收看这篇文章的读者。