叛教 2

發佈日期 : 2012年1月4日    圖 / 文 : 巴斯

轉系統唔係講笑，仲要係手機....Sorry係智能手機，咁貼身用的物品，更加要想清楚，咪人換自己又換。

由 iOS 轉 Android ，有好多野要放棄，不過得到的又有不少，視乎要放棄的對自己有幾大影響。

今日係與 Note相處的 10日，絕對是個熱戀期，直到今日，我無一刻是對呢部機反感，係一秒都無，

如果依家比返現金我，我依然會用來再買 Note，不過就會轉用黑色，

iPhone ? 我再講一次，我返不到轉頭了，依家對 Note進一步了解後，就算 iPhone 5推出5.3" 屏幕，

如果 iOS功能不變的話，我都唔會返轉頭。

還記得當日買機時，第一個要面對的問題，也是最重要的問題。

就是由 iPhone 用的細卡，轉成大卡，因為留在 iPhone 內的聯絡人資料，

對好似我呢D小市民來講，唔係咁容易過戶到Note上去，因為聯絡人資料，如果當初並不是Save落Sim卡的話，

iPhone 係無得把殖入體內的聯絡人資料，過落Sim卡內。

雖然透過 gmail過戶都可以，但要搞好耐，一般市民都唔識搞。

幸好百老匯的員工幫手，用另一個比較快的方法，為我完成今次過戶聯絡人資料手續。

那位哥哥仔透過一部 htc 做中間角色，經我和 iPhone 4同意下，透過藍芽進入我的 iPhone 4，

把聯絡人資料全數Copy到佢的htc手機內，然後再透過藍芽，向Note吐進聯絡人資料，

過程非常之快，事後哥哥仔在我面前清楚消毀 htc內，我的聯絡人資料。

還為 Note 貼上保護貼，又無迫我買埋D垃圾，

呢種帝皇式服務，只欠生果盤和長腳蟹三點式招待，就達到賣手機完美境界喇 ^^ ，呢個Copy聯絡人資料好全面，

因為內裡有Model的衫圍和鞋的Size在裡面，原來都盡數抄了過來，唔單只係電郵和電話號碼咁簡單，

真係再一次多謝那位哥哥仔給我坐享其成，感激~~感激~~再感激。

就係咁，我部Note仲未有Sim卡的情況下，體內就擁有我所有的聯絡人資料，

離開百老匯15分鐘後，我在附近數碼通，免費得到大卡，一插即用到Note體內的聯絡人資料。

反手靜音功能

當來電時的一刻，螢幕好自然有來電顯示與鈴聲加震動，唔想聽呢個電話，又唔想即時飛線，

只需如圖就咁凌空反轉部機，留意係凌空都可以，Note就會即時變成靜音，而且不會震動。

用家就可以唔需要再定住部機，喜歡點擺部機都可以，由於連震動都停止了，所以放在桌面上都唔會震動到而影響到其他人，

這時來電依然是在屏幕上出現，等對方自動放棄而收線。

下一個電話再來的時候，當然是正常的響聲吧。

呢個 食碗面反碗底 靜音功能，在其他智能三星機都擁有，而且係預設功能，

無需開啟設定就可以用，如果用家唔喜歡，可進入設定內關閉呢項功能。

iPhone 有無呢項功能? 你話呢~~~~

電話功能

雖然是智能手機，但打電話的功能好唔好用先?

我最不滿是人頭像好細個，唔係因為個螢幕大而影得個頭像細，而根本個頭像只可以Set咁細個。

你睇佢搞到我個沈佳宜頭像幾細個? 勁不滿呀。

iPhone 的來電顯示頭像填滿整個螢幕架。

聯想號碼

撥號時，只要輸入前兩或三個數目字，Note就會跟據電話薄內有的聯想號碼列出來，

對於我呢個腦部長期零思考的人來講，方便好多。

不過.......我......我想講，我連頭三個號碼都想不起，打電話時只記得人名，根本由頭到尾無記號碼，對我受益唔多。

呢項功能，好多手機都一早擁有，唔係什麼新功能，不過 iOS 5之下的 iPhone 是沒有呢項功能，

不過無呢個功能，係唔係唔用得先~~~~我覺得有咪用，無又無所謂。

不過如果用作換機籍口，都可以架 。^^

如圖所見，輸入頭四個數目字，除了有最接近的一個顯示出來外，還提供多幾個給用家去選擇，非常貼心的功能。

撥號前編輯

撥號前編輯功能，係方便身在海外撥打區號時的實用功能。

好多手機都一早擁有，唔係什麼新功能，不過 iOS 5之下的 iPhone 是沒有呢項功能吧。

能源

3G上網功能加藍芽，Whatsapp.........天氣........Facebook.......等等需要長開的 apps 要推送通知，

新鮮感填滿每一分每一秒，日攪夜攪部機，加上 5.3"的彩色巨屏，區區 2500 mAh的電池又如何?

如果我咁樣都可以話呢部機省電，你都唔會信吧。

一粒電係無可能用到一日，最多只可以用到下午2:00- 4:00 咁上下就用完。

經自己個人喜好，最終我都接受唔到用尿袋，索性每日開蓋兩次來換電池，電池自己用充電機來充電。

充電池好過部機長期接上尿袋用，我知咁對個背蓋好大損耗，不過呢個係唯一解決到使用上瀟灑的方法。

我真係接受唔到一邊接著尿袋，一邊用機囉，人唔笑，狗都吠呀~~~ 

買背蓋都唔會名貴吧，點都好過要我用尿袋囉。

個螢幕 1280 x 800pixels 解析度靚得咁緊要，要減弱她的亮度，為的就是節能 ? 

對我來講，最精彩係個螢幕光又搶眼，你叫我減弱來用? 仲殘忍過煲仔飯呀陰功。

簡直係一個笑話，不如出街把上網功能全關閉，只用電話功能啦笨。

做人平日都就住就住架喇，連用部手機都要就住用? 唔係對自己咁殘忍下嘛?我做唔出囉。

iPhone 無得換電就無計遮，呢部機有得換，點解要接尿袋咁醜樣，真係影響市容架。

話用咁大部手機貼面傾電話異相，異相得過接住尿袋用?

Whatsapp 錄口訊問題

Whatsapp對我來講，其中一個強項，就係可以錄口訊，文字表達一向差的我，用口講就最好喇，呢個功能是我常用的。

左圖所見呢個位於Whatsapp內的咪，係用來錄口訊的，真係無法子想像到，用內置呢個咪錄出來的口訊，

對方如果係 iPhone用家的話，佢係聽唔到呢段錄音口訊，只對應 Android Only ，真係比佢激到你死死下。

咁用拍片丫，把鏡頭放貼書桌面來拍片，變相成為錄音咁得喇掛。

好可惜，錄片只錄得12秒最大容量，就唔比錄了，得咁短時間，講得乜?

　解決錄音呢個方法，係用第三方apps來傳口訊。

每次打算透過Whatsapp 錄口訊比對方時，就用一個叫 netMemo 的 app 來錄，

錄完就有得選在 Whatsapp 發送，咁就可以解決到問題。

由於佢都算係一步到位的 app，所以我接受到咁樣用第三方app來幫手解決問題，我無覺得反感，

不過如果下一個版本可以修正呢個問題，我會好開心囉。

捷徑

我最喜歡一步到位的事物，Note可以容許好多程式，直接放在第一頁的桌面上，就以 Whatsapp 為例，

我把常常要透過用 Whatsapp 通話的汀叮，一步到位咁把她的 Whatsapp 專屬設定鍵，放在桌面上。

只需在桌面的空白位置篤實唔放，咁就會出現如圖的選項，可見其中一個叫捷徑的選項，

透過以下幾步，就可在桌面建立 Whatsapp 汀叮的一步到位鍵，以後想利用Whatsapp聯絡汀叮，

一篤落去就進入Whatsapp談話內容，無需再在人堆中找她出來。

藍芽耳機

如果親友第一次見到我用Note的話，個個好似夾定咁，話用咁大部機來聽電話好異相，我唔覺好異相啊，

在 iPhone 年代，因為方便聽歌，一向都用藍芽耳機，

何況面油多，唔想搞到部機的螢幕咁狗肉，所以好小直接貼面聽，

來到 Note就更加啦，部機唔貼面，可以一邊講電話，一邊搞部機丫嘛。

最合我心的 Sony MW600 藍芽，依然是可以配合到 Note 來正常操作，

聽歌仔來電時，淡入淡出呢D基本功能一定做到，就算是來自 Whasapp 的推送通知，同樣能在耳機內聽到。

音色方面也沒有因為是藍芽無線而影響到我個人對這產品的聲效要求。

 USB GTO

平日用大機影相，回家途中想用個大一點的螢幕重溫返剛剛的作品，以前是 iPad 的工作，但由今日起，Note取代了她的工作，

呢個要係 iPad 先做到的倒相功能，Note做得比 iPad更好。

Copy 是包括硬照和Video一起都可以。

由於是對應讀卡器，咁用什麼記憶卡，都難唔到佢。

左圖可見，在 8:52 分開始 Copy 約 3GB合共 642 個檔 ( Video 加硬照 )，

8分鐘後 ( 即右圖所見 9:00 )就抄完，我個人非常滿意呢個速度。

提提你，這 Copy是原檔無壓縮 Copy，咁即係話，去旅行時，都可以用呢個方法來做流動軍火庫作為備份用途。

何況仲可以在回程中欣賞重溫這幾日的成果來打發時間。

來自大機的AVI檔案，雖然唔可以用跟機來的廢中廢播放器睇到，但只要安裝 MX Video Player 呢個免費 app，

就可以非常流暢地播放來自大機所拍得的 AVI 影片。

分門別類

Note的圖像檔案管理得好好，會自動把不同的圖片歸類，

圖中可見，佢會把來自相機影的相，來自Print Screen的相，來自Whasapp的相，來自Video.............  一一分類。

唔會一堆咁堆晒比用家自己掘返想要的相出來，係好有系統咁分類顯示出來，值得一讚。

最利害係其中一個Folder係把雲端之上的 Picasa 網路相簿，都顯示埋出來，

如果你係 Picasa 網路相簿的用家，就會覺得勁得呀~~~~

待續............

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。