叛教 3

發佈日期 : 2012年 1月6日    圖 / 文 : 巴斯

與Note相處第14天了，越來越喜歡佢，唔知點解，越是了解Note，越覺得與 iPhone 4分手係明智，

唔好講 Note個顯示屏又大過又靚過 iPhone ，單是操作上的貼心，就使我用得好滿意，

過了14天，我再問自己一次，答案都係一樣，

就算 iPhone 5推出 5.3" 屏幕，如果 iOS功能做得無 Note咁好的話，我都唔會返轉頭。

唔好講 Note有幾好，單係佢在功能上無差過 iPhone 4S都己經值回票價喇。

如果正打算買部新智能手機的朋友們，請你停一停，想一想，

今時今日，iPhone 係咪真係仲係你的第一選擇? 唯一的選擇?

如果係我的最好朋友，我一定制止佢買 iPhone ，不過如果係其他人，正所謂事不關己，乜乜物物，

我會話 : 唔好理其他人點講，唔好人話好就轉會，最緊要自己喜歡就得喇。

冬天貼身擺放 Note 好自然係外套的內袋，我也不知道夏天的時候，點放呢部Note先係最方便，

不過..........瑪雅曆都只係寫到 2012 ，究竟我有無命去到夏天都成問題，

未來的事未來再算，今日玩得開心就得啦，理得到時放邊度丫。

主頁

你睇睇 avbuzz個主頁先啦，iPhone Load唔到Flash，搞到一個二個洞都算喇，由於解像度的關係，Note 一眼睇多了好多行。

avbuzz係咁，其他網頁都會係一樣，咁試問你講我知，我點可能返得到轉頭，你講丫。

Root 機

唔好一聽到Root機，就以為係人都打算玩免費 app，所以先要Root機。

請用權限呢個角度去睇Root機，三星手機，係禁止相機有靜音功能的，

無論係用自己所屬的相機功能去拍攝，或者安裝第三方相機 app，都係無法使到拍攝和對焦變成靜音，

呢點 iPhone 在 iOS 5之下的相機係可以拍攝時變成靜音，三星就唔可以了。

先唔好話人想靜音，就話人想偷拍，好似我最多時候在交通工具上 Whatsapp影相來交代比朋友知我的行程進度，

發出 Shutter 聲往往使我好尷尬，Root機之後就可以把相機設成靜音。

另外最最最最多人關心的屏幕遍色問題，也可以利用Root機得到解決，

所以下次千萬唔好一聽人家話Root機，就以為人家一心想玩免費 app。

最近更推出一步到位的Root機程序，方便好似我呢類初學者使用，有興趣可去以下網址得到了解。

http://www.unlockroot.com/

近年好多惡得好緊要的人，所以........又係我宣讀聲明的時間喇，屬豬屬龍的朋友，勞煩請面向西 : 

我無叫大家去Root機，有問題出現完全唔關我事，我再講多次，我絕對唔建議大家去Root機，夠清楚未呢 ^^ 

「和諧不是一百人說同一番話；和諧是一百個人，有一百句不同的話之餘，而又互相尊重。」

Soft Screen Tuner

Note的畫面有三個模式給用家選擇，分別為動態，標準和電影 ，簡單D講只係顏色搶眼度的高中低咁解。

動態就比較重口味，九成人見到都會覺得好味精，但我好喜歡呀，用來娛樂好得架，如果覺得太重口味的話，咪選另外兩個囉。

不過也有一些朋友唔好彩，買了回家之後先發現個螢幕遍色，所以唔開心。

就以呢個叫 Soft Screen Tuner 為例，要Root機後先可以有權限進入調校畫面，

除了 RGB 獨立調校外，最主要係連色溫都可以調，你想點調咪點調囉。

第一次使用

我係屬於第一次使用者，對住部陌生機，鬼識搞咩，

今時今日app對一部智能手機係幾咁重要，起機的一刻，唔係要打電話，係裝app，

咁去邊度找app得架? 無信用卡又或者唔想比信用卡資料，咁點算? 

Note在呢方面，對第一次使用者就方便得多。

開機前最好有屬於自己的 gmail 戶口啦，無就拿拿臨開返過，又唔需要錢，開啦，開左先講。

在桌面一早就放了個叫 Market 的入口響度，一手篤落去，就帶用家去到市場選 app。

心急的新手，第一時間當然係裝Whatsapp，Facebook， Line.......呢堆社交app啦，理鬼得你其他apps要錢定免費咩。

唔第一時間駁返通社交 app，同企響旺角裸體係無任何分別的。

填信用卡資料咁麻煩，日後再算啦好無?丫佢真係唔會問有關信用卡資料架播。

篤一篤桌面上的Market，拿拿臨篤埋個放大鏡，再輸入想要的 app啦，到步後咁就可以Download，仲自己裝埋好方便。

搞惦晒所有要裝的社交 app ，日後摸熟部機，有需要買app時先再填信用卡資料，唔好煩我。

就係咁，我就裝好晒所有我要用的社交 app，小學生都識篤，零難度。

推送通知

iOS 5的 iPhone推送通知做得非常之好，當日使我最最最難放下的就是這個功能，

 iPhone 在休眠狀態下黑畫面，每當一有推送通知，就自動自覺第一時間在屏幕亮起，

用家完全無需接觸 iPhone，用眼尾望一望，就可以預覽到內文。但 Note 在休眠狀態下，佢真係冬眠架，

有推送通知來的時候，無錯~佢會震又會響，但無畫面呢，

究竟呢個推送通知係電郵丫，係Whatsapp丫，定 Message呢?

唔出手搞醒部機係唔會知，就算搞醒佢，第一個畫面都唔係內文架，

第一個畫面係鎖機畫面，要再開埋個鎖先可以見到預覽內容，你話係咪好煩丫?

又叫醒又開鎖，最終都可以見到究竟係什麼進送通知。

除非無乜朋友搵你或者Facebook無人回你架遮，否則幾分鐘響一次，

又唔知邊個搵，最慘係你等緊果個你成日想著的人，個心呢.........如果Group Chat 仲死多二錢重，係咪好激氣呢?

唯有做完工作，有空先一次過睇囉，呢個就係我唯一對Note不滿，但又無app救到我。

正如前教主講過，無手機係完美，呢點我接受囉。

電郵

電郵方面，iOS 5之下的 iPhone，有限單一封電郵寄出相片數量，最多只可以夾 5張相唔在講，

而收電郵之後，想夾D相在該封電郵作為回覆，就更加係唔比咁做，而 Note就無上述的限制。

假設在欣賞相片途中，突然想電郵十張八張相比朋友，咁只要如左圖就地正法地選取所需圖片，

再選用什麼方式送出，咁就可以一口氣把多張圖片發送出去。

呢個示範，我選擇以電郵送出，右圖可見，所選的 8張圖片，都被夾到電郵裡等我發出去。

iOS5 之下的 iPhone ，只能最多夾五張，多一張都唔比。

留意我選 8張並唔係 Note 的上限，只係我求求其其選 8張，我可以再選落去都無問題架。

以下示範，係反過來以電郵行先。

假設收到一封電郵，睇過內容後，發覺想夾一些相片在該封電郵作為回覆對方，在 iOS5 之下的 iPhone ，係唔比你咁做，

不過Note就可以好像電腦寄電郵一樣的操作，給用家夾多張相作為回信。

電郵呢個回合，iOS5 之下的 iPhone 在我心目中係加分定扣分，如果你係 iPhone 用家，心裡有數吧。

 SCUT gPen 手寫輸入

預設的手寫功能，真係廢到無朋友，唔好講同邊部機比，就算係同佢自己比都好唔惦，

Whatsapp時文字與心情公仔要切換先用到，你唔好去死，一日走出走入，用開 iPhone 都唔需要咁麻煩，

當我用到妖聲四起的時候，朋友叫我裝一個免費 app，叫做  SCUT gPen，如果因為咁而轉會，真係死得人多。

今後用Whatsapp時，唔再需要切換心情公仔喇~~~

寫字範圍可以去到全屏，就算寫落個Keyboard度，

都唔影響操作，在咁大個範圍寫字，不但就手仲好屍伏。

不過用開 iPhone有輸入簡體，出個繁體比我選用架嘛，SCUT gPen 就唔得喇，

雖然有部份成功，但命中率並非百份百，等同無用一樣。

整體而言，iOS 5的 iPhone 手寫係最好。

更可以透過設定來選取寫出來的筆劃顏色和線條粗幼，非常貼心。

畫公仔

跟機來的筆係我用得最少的，電視廣告上見到的剪剪貼貼，跟我拉不上任何關係，

一向喜歡畫畫的 Zoie在一程車上，就用了這枝筆畫公仔，仲填埋色，

她試完也中了少少毒，她說如果手機壞了的話， Note會是她鎖定的目標，

可想而知呢部 Note 有幾吸引人呢。

Zoie說這枝筆有壓力感，細力會淡色，留意左圖，可了解Zoie所講的感覺。

香港地區天氣

呢個香港地區天氣的app係一個好app，有埋加時鐘功能顯示，我見大部份用家都會安裝呢個。

因為佢可以把香港天氣分區來報導，分區的意思，係可以跟手機內的GPS位置，

跟機報導身處的地區天氣，去到邊都自動報導該區依家天氣情況，

亦都可以鎖死某一區，永遠只係報導該區天氣亦得，完全自動化，必裝呀~~~

報天氣的背景圖都配合返晒當時天氣，當然唔少得未來一週天氣吧。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。