行神蹟呀~~~

發佈日期 : 2012年 3月31日    圖 / 文 : 巴斯

去年11月開始的 Nano 回收計劃實行後，我第一時間去登記，完成有關手續後，就比返部舊機我 keep住，叫我等消息。

係咁等，等呀等~~~~直到上星期先收到電郵通知我去對換機部。

真係耐到呢~~~不過唔急啦，部 nano 咁廢，今時今日都用唔著，換了返來都係得個擺字架姐。

不過佢話明電池有問題需要回收，咁我無奶油免費都唔換走個計時炸彈架。

電郵提到，去IFC對換就要再預約邊時邊日交收，如果選擇去旺角銀城廣場就求求期期在佢辦工時間內，帶埋所需文件和舊機去就得，

我明天分分鐘比車車死啦，預乜野約 jack? 所以我選擇睇下幾時咁巧合經過銀城廣場，咪走上去換囉。

呢日帶埋跟了身幾日的 nano，來到目的地樓下，影返張變身前的相先。

呢部就係我人生第一部蘋果牌產品喇  ^_^，4GB容量架，

容量咁細，今日都唔知用來做乜。

經呢條扶手電梯上去再轉升降電梯，就會去目的地架喇。

拿~~~~就係呢度，上去到又係輪候號碼咁囉，

輪到我又係例牌簽下名呀，聽下佢講果D條款咁囉。

丫~~~~原來佢換部新款 ipod nano過我，仲要係 8GB添，

職員話，就算原本部舊機只有 2GB 的用戶，都劃一換 8GB 容量，咁又真係幾好啊。

不過你唔好幻想可以有包裝比返我播，只係得架機架炸，乜附件都無跟，

只係換來眼前呢部淨機，係咁多，所以打算用來送比人做禮物都唔好想喇。

行神蹟呀~~~~

仲記唔記得我買 Mac mini 的時候，跟機咪送了一本教主寫的經書呢，我當時咪話過可唔可以唔要經書，要呢部呀~~

哈~~~估唔到教主原來係有聽我禱告呀，佢真係使我願望成真，仲唔需要用本經書交換添啊~~~~

行神蹟呀~~~~

iPod nano有乜功能? 

你自己睇喇，點都會好過我所持有的舊款丫~~~

呢部iPod nano可以入歌仔，不過得 8GB囉，放唔到幾多首AIFF檔案歌仔架炸~~~~

或者可以插耳機作天線後，接收 FM收音機囉...........唔，我平日就算聽收音機，都用app來聽啦，點會聽ViVi WaWa的大氣電波架? 

下? 數碼電台? 你發夢咩? 無可能有啦。

睇相..........唔...........畫面細到郵票咁，點睇呀? 

仲要分九格來電顯示張相仲大張過佢，咪玩啦。

一係用來做運動的時候用囉~~~~

仲有計時功能，不過呢堆功能，我部智能手機咪有晒囉，

我的智能手機都唔會離身，咁幾時先用得著佢咁呢?

再唔係，用來做手錶丫~~~一共提供18個款式，我只選到呢幾個叫做似人用的款式出來。

係呢，條錶帶襯唔襯我咁呢? 聰明人先到條錶帶架播，你.....應該見到呵 ^_^ 

唉.........算吧喇，呢部野最大功勞睇怕都係影了呢輯相囉，我估佢餘下的日子，都係在陰暗的角落中，渡過他的餘生..............

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。